- 2020-01-11 08:20:46
- ព័ត៌មាន
តាមសកម្មភាពព្រឹកមិញ ឆាយ វីរៈយុទ្ធ មុជកាន់តែជ្រៅហើយ ក្នុងជីវភាពជាអ្នកជំនួញ!
- 2020-01-11 08:20:46
- ចំនួនមតិ 0 | ចំនួនចែករំលែក 0
តាមសកម្មភាពព្រឹកមិញ ឆាយ វីរៈយុទ្ធ មុជកាន់តែជ្រៅហើយ ក្នុងជីវភាពជាអ្នកជំនួញ!
ចន្លោះមិនឃើញ
លោក ឆាយ វីរៈយុទ្ធ ត្រូវបានគេមើលឃើញថា មុជកាន់តែជ្រៅហើយនៅក្នុងមុខរបររកស៊ី ដោយដំបូងឡើយធ្វើជាលក់អង្ករបោះដុំមានយីហោ "ស្ដេចអង្ករ" ហើយក្រោយមកក៏ហក់ចូលជំនួញដីធ្លី ហើយឥឡូវលោកលូកកាន់តែជ្រៅ ក្រោយត្រូវគេប្រកាសថា លោកជាម្ចាស់ភាគហ៊ុននៃជំនួញមួយមានតម្លៃរាប់លានដុល្លារអាមេរិកឯណោះ។
តារាចម្រៀងសាន់ដេ ត្រូវបានគេឃើញបង្ហាញមុខនៅលើទឹកដីភ្នំបាសិត ធ្វើពិធីបើកមុខអាជីវកម្មរបស់លោកនៅព្រឹកនេះ ក្នុងគម្រោងអចលនទ្រព្យមានឈ្មោះថា Style Mini Villa GM Residence Baseth ដែលតាមសាមីខ្លួន គឺលោក និងម្ចាស់ភាគហ៊ុន១រូបទៀត វិនិយោគរួមគ្នាក្នុងទុនប្រមាណ២លាន៦សែនដុល្លារ។
នេះមិនមែនជាលើកទី១របស់ម្ចាស់បទ "នឹកអូនស្ទើរដាច់ខ្យល់" ក្នុងអាជីវកម្មអចលនទ្រព្យ ប៉ុន្តែបើក្រឡេកទៅមើលប្រវត្តិ លោកធ្លាប់ចុះស្នាមជាច្រើនរួចមកហើយ ក្នុងនោះ ដំណើរហក់ចូលលើកដំបូងបំផុតក្នុងជំនួញនេះ លោកបានដាក់វិនិយោគជាមួយ ខាត់ សុឃីម និងឧកញ៉ា ម៉េន កានី វិនិយោគនៅខេត្តព្រះសីហនុនាដើមឆ្នាំ ២០១៩។
ក្រោយមកទៀត លោកបានបន្តមកវិនិយោគលើគម្រោងមីនីវីឡា ដែលមានទីតាំងនៅភូមិថ្នល់បន្ទាយ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ មុនហក់មកសម្រេចជំហានទី៣នៅពេលនេះ។ យ៉ាងណា នេះជាសមិទ្ធផលដំបូងរបស់លោកក្នុងឆ្នាំ ២០២០ ក្រោយលោកប្រមូលបានទុនពីជំនួញទី១ និងទី២។
ទោះជាបែបនេះក្ដី នៅចំពោះមុខសារព័ត៌មាន ចំពោះទុនដ៏សម្បើមលើគម្រោងទី៣នេះ ឆាយ វីរៈយុទ្ធ បញ្ជាក់ថា មិនមែនជាទុនរបស់លោកតែម្នាក់នោះទេ។ ប៉ុន្តែលោកបានសហការជាមួយដៃគូម្នាក់ទៀត គឺឧកញ៉ា ម៉េន កានី ដោយរូបលោកផ្ទាល់មានទុន២៥ភាគរយ រីឯលោកឧកញ៉ា មានដើមទុនធំរហូត៧៥ភាគរយ។
និយាយពីលោកឧកញ៉ា មេន កានី រូបនេះ លោក ឆាយ វីរៈយុទ្ធ ឲ្យដឹងថា ដើមឡើយលោកឧកញ៉ា គឺជាអ្នកគាំទ្រលោកស្មោះស្ម័គ្រមួយរូប។ ជាក់ស្ដែងឧកញ៉ា ក៏ទើបនឹងចំណាយលុយទាំងស្រុងធ្វើបទចម្រៀងឲ្យលោកមួយបទមានចំណងជើងថា "រំលឹករឿងចាស់ចង់តែយំ" ដែលទើបនឹងចេញសប្ដាហ៍មុន។
ឆ្លងតាមភាពជិតស្និទ្ធនេះ ផ្សំនឹងលោកចង់រកស៊ីផ្នែកនេះ ដូចដែលបានបង្ហើបតាំងពីប៉ុន្មានឆ្នាំមុន ផ្សំនឹងការបង្ហាញផ្លូវពីឧកញ៉ាផង លោកក៏ហក់ចូលក្នុងការវិនិយោគអចលនទ្រព្យតែម្ដង។ តារាចម្រៀងសាន់ដេ បង្ហើបថា តាំងពីអាជីវកម្មទី១ ទី២ រហូតដល់ទី៣នេះមក គឺលោកចាប់ដៃជាមួយឧកញ៉ារូបនេះជានិច្ច ហើយក៏ទទួលបានផ្លែផ្ការហូតមក។ ដូច្នេះហើយ ទើបវិនិយោគរួមគ្នាជាថ្មីនាពេលនេះ។
វិលមកឧកញ៉ា មេន កានី បញ្ជាក់ថា លោកពិតជាជឿជាក់ចំពោះការវិនិយោគរួមគ្នាជាថ្មីជាមួយលោក ឆាយ វីរៈយុទ្ធ ហើយថា តាមសមិទ្ធផលរួមគ្នាកន្លងមក លោកនៅតែមានសុទិដ្ឋនិយមថា គម្រោងខាងលើរបស់លោក នឹងទទួលបានជោគជ័យខ្ពស់ ព្រោះម្យ៉ាង Style Mini Villa GM Residence Baseth ស្ថិតនៅលើទីតាំងល្អ ហើយស្រេចទៅហើយ៕
