- 2020-02-24 09:46:08
- ព័ត៌មាន
ហេតុអ្វីបានជាមានរថយន្ដក្រុងសាធារណៈនៅខេត្ដបន្ទាយមានជ័យ?
- 2020-02-24 09:46:08
- ចំនួនមតិ 0 | ចំនួនចែករំលែក 0
ហេតុអ្វីបានជាមានរថយន្ដក្រុងសាធារណៈនៅខេត្ដបន្ទាយមានជ័យ?
ចន្លោះមិនឃើញ
រថយន្ដក្រុងសាធារណៈទៅមកក្រុងប៉ោយប៉ែត្រ-ស្រុកម៉ាឡៃ ខេត្ដបន្ទាយមានជ័យ ត្រូវបានដាក់ឲ្យដំណើរការ ស្របពេលដែលក្រុមហ៊ុនខ្នាតយក្សពីរ កំពុងបោះទុនវិនិយោគលើវិស័យអចលនទ្រព្យ អគ្គិសនី និងតំបន់សេដ្ឋកិច្ចពិសេសទីនោះ។
ក្រុមហ៊ុនទាំងពីរ រួមមាន៖ ក្រុមហ៊ុន “ឆាយណាប៉ោយប៉ែតស៊ែតថឺឡាយ ស៊ីធី” របស់លោកឧកញ៉ា ឡេង ណាវ៉ាត្រា វិនិយោគលើផ្ទៃដីជាង១ពាន់ហិតា ដើម្បីបង្កើតជាទីក្រុងរណបថ្មីមួយ នៃខេត្តបន្ទាយមានជ័យ ដែលប្រជុំទៅដោយមជ្ឈមណ្ឌលពាណិជ្ជកម្ម ខនដូ រីសត ផ្ទះល្វែង វីឡា ភោជនីយដ្ឋាន ជាដើម។
រីឯក្រុមហ៊ុនវិនិយោគធំមួយទៀត គឺក្រុមហ៊ុន មជ្ឈិមស្ទាល អ៊ីនធើប្រាយ របស់លោក ស្រី ណាគ្រី ដែល វិនិយោគរោងចក្រអគ្គិសនី ដើរដោយពន្លឺព្រះអាទិត្យ(សូឡា) រោងចក្រផលិតទឹកកក និងតំបន់សេដ្ឋកិច្ចពិសេស។
ដូច្នេះការធ្វើចរាចរណ៍ទៅមករវាងក្រុងប៉ោយប៉ែត និងស្រុកម៉ាឡៃ នឹងមានភាពមមាញឹកខ្លាំង។ ស្របពេលគ្នានេះអាជ្ញាធរ និងអ្នកវិនិយោគធំៗ បានគិតគូរពីសុវត្ថភាពរបស់បងប្អូនប្រជាពលរដ្ឋ តាមរយៈបង្កើតរថយន្ដក្រុងសាធារណៈ ដើម្បីកាត់បន្ថយការកកស្ទះចរាចរណ៍ ធ្វើដំណើរឆាប់រហ័ស កាត់បន្ថយបញ្ហាគ្រោះថ្នាក់ចរាចរណ៍ និងចំណាយថវិកាតិច។
បើតាមអភិបាលខេត្ដបន្ទាយមានជ័យលោក អ៊ុំ រាត្រី បានឲ្យដឹងថា រថយន្ដក្រុងដែលដាក់ឲ្យដំណើរការមានចំនួន១៥គ្រឿង ហើយពលរដ្ឋគ្រប់រូបអាចជិះទៅមកក្រុងប៉ោយប៉ែត្រ-ម៉ាឡៃ ដោយឥតគិតថ្លៃរយៈពេលបីខែ គឺគិតចាប់ថ្ងៃ២២ ខែកុម្ភៈ រហូតដល់ថ្ងៃទី២៣ ខែមេសា ឆ្នាំ២០២០។ បន្ទាប់ពីនោះក្រុមហ៊ុនវិនិយោគ យកត្រឹមតែ ២ ០០០រៀលប៉ុណ្ណោះ ក្នុងមនុស្សម្នាក់ ខណៈពលរដ្ឋជិះម៉ូតូឌុបអស់ប្រាក់មិនក្រោម២ម៉ឺនរៀលឡើយ សម្រាប់់ថ្លៃទៅ ឬមកក្រុងប៉ោយប៉ែត ឬស្រុកម៉ាឡៃ។
សូមរំលឹកថា ចម្ងាយផ្លូវពីក្រុងប៉ោយប៉ែត្រ ទៅស្រុកម៉ាឡៃ មានប្រវែង ៤០គីឡូម៉ែត្រ។ រថយន្ដក្រុងទាំង ១៥គ្រឿង នឹងផ្លាស់គ្នាដឹកជញ្ជូនពលរដ្ឋក្នុងរយៈពេល២០នាទីម្ដង ដោយក្នុង១គីឡូម៉ែត មានចំណតមួយ។ បើគម្រោងនេះ ជោគជ័យ អាជ្ញាធរខេត្ដ នឹងពិចារណាដាក់ឲ្យដំណើរការរថយន្ដក្រុងសាធារណៈមួយខ្សែទៀតដើម្បីទៅមកក្រុងប៉ោយប៉ែត-ក្រុងសិរីសោភ័ណ្ឌ៕
