- 2020-03-13 05:21:00
- ព័ត៌មាន
ក្រោយបែករឿង ទិត្យ វិច្ឆិកា បានទៅជួបជាមួយម្ចាស់លុយភ្លាមៗ ស្នើសុំសង១ខែ ២០០ដុល្លារ!
- 2020-03-13 05:21:00
- ចំនួនមតិ 0 | ចំនួនចែករំលែក 0
ក្រោយបែករឿង ទិត្យ វិច្ឆិកា បានទៅជួបជាមួយម្ចាស់លុយភ្លាមៗ ស្នើសុំសង១ខែ ២០០ដុល្លារ!
ចន្លោះមិនឃើញ
លោក ទិត្យ វិច្ឆិកា បានឲ្យដឹងថា លោកបានទៅជួបជាមួយម្ចាស់លុយជាហ្គារ៉ាសឡានដែលជាម្ចាស់ប្រាក់ដែលលោកជំពាក់ហើយ ក្រោយពីសាច់រឿងលោកជំពាក់ប្រាក់ថ្លៃជួសជុលឡានចំនួនជាង ១ពាន់ដុល្លារអាមេរិក ត្រូវបែកខ្ចរខ្ចាយលើបណ្ដាញសង្គមថ្មីៗ។
មុននិយាយការជួបចរចា លោក ទិត្យ វិច្ឆិកា បានឲ្យដឹងថា អំឡុងពេលលោកនៅធ្វើការងារសង្គម លោក និងម្ចាស់ហ្គារ៉ាស គឺជាមនុស្សស្គាល់គ្នា ហើយនៅពេលរថយន្តខូច លោកតែងតែយកទៅធ្វើនៅទីនោះ ហើយការធ្វើនោះ លោកក៏បានបង់ប្រាក់ភ្លាមៗខ្លះ ជំពាក់ខ្លះ ហើយប្រាក់នៅសល់ប៉ុន្មាន ក៏មកដល់បច្ចុប្បន្ន។ ដោយសារដាច់រយៈគ្នាយូរ ម្ចាស់ប្រាក់ក៏បានបង្ហោះនៅលើបណ្ដាញសង្គមធ្វើឲ្យមានការភ្ញាក់ផ្អើល។
តារាដែលបានធ្វើការងារសង្គមជាច្រើនរូបនេះ បញ្ជាក់ថា ក្រោយបានឃើញព័ត៌មាននោះ លោកមិនបានខឹងនោះទេ ប៉ុន្តែការពិតលោកមានការអន់ចិត្តខ្លះ ក្នុងនោះ ក៏អន់ចិត្តនឹងខ្លួនឯងដែលធ្លាក់ដល់ដំណាក់កាលនេះ។ ដូច្នេះហើយ ក្រោយឃើញព័ត៌មានបង្ហោះដោយម្ចាស់ហ្គារ៉ាស់ លោកក៏បានចូលជួបចរចារកដំណោះស្រាយ ដោយលោកគ្មានបំណងគេចវេះឡើយ។
បញ្ហាដែលកើតឡើង គឺដោយសារតែលោក រកស៊ីខាត ទើបមិនមានប្រាក់សងទៅម្ចាស់ប្រាក់នានាទាន់ពេលដែលលោកជំពាក់ ហើយលោកមានឆន្ទៈក្នុងការសងប្រាក់ដែលជំពាក់នោះ គ្រាន់តែថាពេលនេះ លោកពិតមិនទាន់មានប្រាក់ពិតមែន។ ដូច្នេះហើយ លោកសុំផ្ដល់ពេលវេលាខ្លះដល់លោក។
ជុំវិញការចូលទៅជួបដោះស្រាយជាមួយម្ចាស់បំណុល លោក ទិត្យ វិច្ឆិកា បញ្ជាក់ថា មិនទាន់បានឯកភាពគ្នានោះទេ។ "ម៉ោង២ជាង ខ្ញុំបានទៅជួបចរចាជាមួយគាត់ហើយ...ហើយខ្ញុំប្រាប់គាត់ថា ខ្ញុំសុំសងគាត់១ខែ២០០ដុល្លារ តែគាត់អត់ព្រម គាត់ថាឲ្យសង១ខែ ៣០០...ខ្ញុំឆ្លើយថាអូខេព្រមសងគាត់...ប៉ុន្តែក្រោយមកគាត់អត់ព្រមទេ គាត់ទាមទារឲ្យខ្ញុំសងគាត់ឥឡូវនេះ ចំនួន ៣០០ដុល្លារ ប៉ុន្តែខ្ញុំអត់ទាន់មានប្រាក់ទេ!”។
ក្រោយពីការចរចាសងប្រាក់ និងទទួលប្រាក់សង មិនទាន់ឯកភាពគ្នា លោក ទិត្យ វិច្ឆិកា បានឲ្យថា លោកក៏បានត្រឡប់មកវិញ ព្រោះថា លោកមិនដឹងថា ដោះស្រាយយ៉ាងម៉េច ហើយលោកសន្យាថា នឹងចូលខ្លួនទៅជួបដោះស្រាយបន្តទៀតនាពេលក្រោយ។ លោក នៅតែអះអាងថា លោកនឹងព្យាយាមរកប្រាក់មកសងម្ចាស់បំណុលលោក ដោយមិនគេចវេះនោះទេ គ្រាន់តែលោកសុំការយោគយល់ ផ្ដល់ពេលវេលាឲ្យលោកសិន។
ក្រោយផ្ដាច់ខ្លួនពីសិល្បៈជាតារាចម្រៀង លោក ទិត្យ វិច្ឆិកា ត្រូវបានគេដឹងថា លោកក៏ជានាយទាហានមួយរូបដែលទទួលប្រាក់បៀវត្សរបស់រដ្ឋាភិបាល។ ក្រៅពីនេះ លោកក៏បានងាកទៅរកស៊ីបន្ថែមទៀត ក្នុងរបរលក់ខ្សាច់។ ប៉ុន្តែរបរនេះមិនបានជួយយឹតយោងលោកទេ ប៉ុន្តែរឹតតែធ្វើឲ្យលោកដុនដាបថែមទៀត ដោយសារខាតបង់រហូតដល់ក្ស័យធន។ លោក វិច្ឆិកា បានបន្ទោសលើការគ្រប់គ្រងរបស់ខ្លួន ទើបធ្វើឲ្យជំនួញនេះបរាជ័យ ហើយជីវិតកាន់តែដុនដាប។
ដូច្នេះហើយ ទើបធ្វើឲ្យលោកមិនទាន់មានប្រាក់សងទៅម្ចាស់បំណុលវិញ។ លោកឡើងលើកថា លោកសូមអរគុណដល់ម្ចាស់លុយ ដែលឲ្យជំពាក់ និងឲ្យលោកខ្ចីទៅរកស៊ី ហើយឥឡូវមុខរបរលោកកំពុងលិចលង់។ ប៉ុន្តែលោកថា ឆ្នាំថ្មីនេះលោកមានជំនឿថា មុខរបររបស់លោកនឹងដំណើរការល្អវិញ ហើយលោកនឹងខិតខំធ្វើយ៉ាងណារកប្រាក់មកសងម្ចាស់បំណុលរបស់លោកវិញ។ យ៉ាងណាដូចប្រាប់ពីខាងលើ គឺលោកសុំការយោគយល់ ទុកពេលវេលាឲ្យលោកសិន៕
