- 2020-06-17 08:01:37
- ព័ត៌មាន
ឡូយបាត់ នារីម្នាក់សុខចិត្តទិញសំបុត្រយន្តហោះក្នុងសម័យកូវីដ មកថត MV ជាមួយ នេន ទុំ
- 2020-06-17 08:01:37
- ចំនួនមតិ 0 | ចំនួនចែករំលែក 0
ឡូយបាត់ នារីម្នាក់សុខចិត្តទិញសំបុត្រយន្តហោះក្នុងសម័យកូវីដ មកថត MV ជាមួយ នេន ទុំ
ចន្លោះមិនឃើញ
នារីវ័យកណ្ដាលម្នាក់ ដែលជាអាណិកជនខ្មែររស់នៅសហរដ្ឋអាមេរិក បានសុខចិត្តជិះយន្តហោះទាំងប្រថុយប្រថានក្នុងសម័យកូវីដឆ្ពោះមកស្រុកខ្មែរ ដើម្បីបានថតវីដេអូចម្រៀង(MV)ជាមួយ នេន ទុំ។
នាវីរូបនេះ មានឈ្មោះថា Jessica Chhun ជាម្ចាស់ហាងកាត់សក់ និងតរោមភ្នែកធំមួយនៅទីក្រុងបូស្តុន រដ្ឋម៉ាសាឈូសេត សហរដ្ឋអាមេរិក។ ដំណើរមកកាន់ប្រទេសកំណើតនេះ ស្ត្រីវ័យកណ្ដាលខាងលើបញ្ជាក់ថា គោលបំណងធំ គឺដើម្បីថតវីដេអូចម្រៀងជាមួយ នេន ទុំ ចំនួន២បទ ក្រៅពីនេះ គឺក្នុងបំណងមកលេងស្រុកកំណើតឯខេត្តបាត់ដំបងផង ព្រោះបានឃ្លាតឆ្ងាយជាង ២០ឆ្នាំហើយ។
ជាម្ចាស់ហាងកាត់សក់នៅសហរដ្ឋអាមេរិក ប៉ុន្តែស្ត្រីដែលមានស្រុកកំណើតនៅឯខេត្តបាត់ដំបងរូបនេះ បញ្ជាក់ថា អ្នកចូលចិត្តចម្រៀង និងចូលចិត្តច្រៀង ហើយតែងតែឆ្លៀតធ្វើបទចម្រៀង ថតជារឿយដែលកន្លងទៅអ្នកនាង បានថតបានចំនួន៤បទហើយនៅសហរដ្ឋអាមេរិក។ ដោយឡែកជាមួយ នេន ទុំ គឺជាការជួបចាប់ដៃគ្នាលើកដំបូងរបស់អ្នកទាំងពីរ ខណៈដែលកន្លងទៅ ពួកគេមិនជាមានទំនាក់ទំនងជិតស្និទ្ធប៉ុន្មានផង។
Jessica Chhun បានលើកឡើងថា អ្នកនាងត្រូវបានម្ចាស់ភោជនីយដ្ឋាន Five Star ដ៏ល្បីនៅអាមេរិកណែនាំឲ្យស្គាល់ នេន ទុំ អ្នកនាងបានព្យាយាមស្វែងតារាចម្រៀងម្នាក់ប្រភេទរ៉េបដើម្បីផលិតបទចម្រៀងរួមគ្នា។ ក្រោយពីស្គាល់ នេន ទុំ អ្នកនាងប្រាប់ថា បានចាប់អារម្មណ៍ និងចូលចិត្តនូវស្ទីលរ៉េបរបស់សិស្សប្អូនពូឃ្លាំងរូបនេះ ទើបសម្រេចចិត្តទាក់ទងគ្នា ហើយឈានទៅចាប់ផ្ដើមកិច្ចសហការតែម្ដង។
ប្រមាណ ៤-៥ ខែមកហើយដែលពួកគេបានដាក់គម្រោងមកថតបទចម្រៀងចំនួន២បទនៅស្រុកខ្មែរ គឺបទ "ស្រឡាញ់អូនត្រង់ណា" ជាប្រភេទ Original Song និង Cover បទ "បុប្ផាព្រៃភ្នំ"។ ប៉ុន្តែអ្វីៗត្រូវរាំងស្ទះដោយសារខូវីដ១៩ ទើបចេញតែពន្យារពេលរហូតមកស្របពេលដែល អាមេរិកបានបិទជើងហោះហើរចេញចូលប្រទេសទាំងអស់។ ក្រោយពីស្ថានភាពខូវីដនៅលើទឹកដីលោកដូណាល់ ត្រាំ ហាក់គ្រប់គ្រងបាន ជើងហោះហើរក៏បានបើកឲ្យចរាចរណ៍ឡើងវិញ។
អំណោយផលលើមធ្យោបាយធ្វើដំណើរ និងចំពេលល្អ ដែលហាងរបស់ខ្លួន ព្រមទាំងសាលារៀនកូនៗនៅបិទផង អ្នកនាង Jessica Chhun ប្រាប់ថា អ្នកនាងក៏ប្រញាប់ទិញសំបុត្រហោះមកស្រុកខ្មែរតែម្ដង បើទោះស្ថានភាពហាក់នៅប្រថុយប្រថានខ្លះក៏ដោយ។ ម្ចាស់ហាងកាត់សក់ដដែល បញ្ជាក់ថា ការធ្វើដំណើរហាក់មានភាពតឹងរឹងជាងមុនច្រើន ដោយអ្នកនាងត្រូវតម្រូវឲ្យមានលិខិតធានាសុខភាព ព្រមទាំងមានការពិនិត្យតឹងតែងថែមទៀត។
អ្នកនាង Jessica Chhun បានមកដល់ប្រទេសកម្ពុជាកាលពី ៥ ថ្ងៃមុន ហើយនៅថ្ងៃនេះ បានចាប់ផ្ដើមការងារថតចម្រៀងនៅលើទឹកដីខេត្តកណ្ដាល។ តាមគម្រោងការងារនេះនឹងត្រូវបញ្ចប់ឲ្យបាននៅក្នុងថ្ងៃនេះ ហើយ២សប្ដាហ៍ក្រោយបទចម្រៀងរបស់ពួកគេនឹងចេញចែកជូនប្រិយមិត្តនៅក្នុងស្រុក និងសហរដ្ឋអាមេរិកនៅក្នុងរង្វង់ ២សប្ដាហ៍ទៀត។ ការងារដែលនៅសល់ Jessica Chhun ប្រាប់ថា នឹងធ្វើដំណើរទៅលេងខេត្តបាត់ដំបងទឹកដីកំណើត ហើយខ្ទង់ ៣សប្ដាហ៍ក្រោយ អ្នកនាង និងគ្រួសារនឹងត្រឡប់ទៅផ្ទះនៅសហរដ្ឋអាមេរិកវិញ៕
