- 2020-11-04 04:09:55
- ព័ត៌មាន
ខាំ ចេន ៖ និយាយមែន ខ្ញុំខ្លាចតែចប់ Project ហ្នឹង បង សាយ គាត់ចប់ដែរទេ!
- 2020-11-04 04:09:55
- ចំនួនមតិ 0 | ចំនួនចែករំលែក 0
ខាំ ចេន ៖ និយាយមែន ខ្ញុំខ្លាចតែចប់ Project ហ្នឹង បង សាយ គាត់ចប់ដែរទេ!
ចន្លោះមិនឃើញ
តារាចម្រៀងពេញនិយមសម្រាប់យុវវ័យ ខាំ ចេន ដែលបានចូលរួមរត់រយៈពេលខ្លីជាមួយលោក អ៊ួន បឋម ហៅ សាយ នៅឯខេត្តកោះកុងកាលពីសប្ដាហ៍មុននោះ បានប្រាប់ថា លោកបានឃើញបញ្ហាប្រឈមគួរឲ្យបារម្ភរបស់យុវជនបេះដូងប៉ុនមហាមេឃនេះ។
ចេន លើកឡើងថា “និយាយមែនបង ទម្រាំតែចប់ Project ហ្នឹង ខ្ញុំខ្លាចតែ រាងកាយរបស់បង សាយ ខ្ទេចដែរទេ!”។ អតីតបេក្ខភាពកម្មវិធី "ស្ដាប់ចម្រៀងរបស់ខ្ញុំ" រដូវកាលទី២ បានទៅចូលរួមរត់ជាមួយលោក សាយ ដើម្បីចូលរួមលើកទឹកចិត្តយុវជនមកពីខេត្តរតនគីរីនេះ។ លោកបានរើសយកកំណាត់ ផ្លូវក្នុងភូមិសាស្ត្រខេត្តកោះកុងដែលជាស្រុកកំណើតរបស់លោក ចាប់ពីស្រុកបុទុមសាគរ ដល់តាតៃ ដែលមានចម្ងាយដី ៤០គីឡូម៉ែត្រ ដោយត្រូវរត់កាត់ភ្នំផង។
ត្បិតជាអ្នកចូលចិត្តកីឡាមួយរូប តែម្ចាស់បទ "ពងទា" ប្រាប់ថា លោកខ្លួនឯងបានជួបបទពិសោធន៍ជូរចត់មិនធ្លាប់ជួប។ ចេន ឲ្យដឹងថា លោករត់បានតែប្រមាណ ៣០គីឡូ លោកចាប់ផ្ដើមមានបញ្ហាលើរាងកាយ ត្រង់ផ្នែកជង្គង់ខ្លាំង។ "ពេលខ្ញុំរត់បានប្រមាណ ៣០គីឡូ មិនអីទេ ប៉ុន្តែប្រមាណ ១០គីឡូចុងក្រោយ ខ្ញុំគិតថាជង្គង់របស់ខ្ញុំ ខ្ទេចខ្ទីអស់ហើយ ចិត្តខ្ញុំនៅពេញ១០០% តែរាងកាយខ្ញុំខ្ទេចខ្ទីអស់ហើយ!”។
យ៉ាងណាក៏ដោយ ដោយការតាំងចិត្តយកឈ្នះលើខ្លួនឯង លោក ខាំ ចេន ប្រាប់ថា លោកប្រឹងរហូតដល់គោលដៅទាំងត្រដាបត្រដួសបំផុត ដែលនេះជាបទពិសោធន៍ពិបាកបំផុតក្នុងឆាកជីវិតរបស់លោកគិតត្រឹមពេលនេះ។ មានពិសោធន៍ខ្លួនឯងបែបនេះហើយ ទើបយុវជនមកពីខេត្តកោះកុង លើកឡើងថា លោកបារម្ភ ខ្លាំងចំពោះរៀមច្បងខាងលើ។ លោកថា ទម្រាំដល់ចប់គម្រោងដ៏ធំនេះ លោកគិតថា រាងកាយរបស់ សាយ មិនដឹងជាយ៉ាងណាទេ។
"ខ្ញុំជឿថា អ្នកខ្លះ អាចនៅតែគិតថា អ្វីដែលបងសាយគាត់ធ្វើ អាចត្រឹមជារូបភាព ប៉ុន្តែសម្រាប់ខ្ញុំដែលបានទៅចូលរួមផ្ទាល់ ឃើញគាត់ផ្ទាល់...ខ្ញុំបារម្ភមែន គាត់ធ្វើបានប៉ុណ្ណេះ គឺជារឿងអស្ចារ្យណាស់!”។
ចាប់តាំងពីបានដំណើរការគម្រោងដំបូងកាលពីថ្ងៃទី ៦ តុលា ២០២០ មកដល់ពេលនេះ សាយ ម្ចាស់គម្រោង "Run with Sai for Charity” បានរត់ឆ្លងកាត់ខេត្តចំនួន ៧ ហើយ ដែលមានចម្ងាយដីសរុបប្រមាណ ៧៥០គីឡូម៉ែត្រ។ ដូចនឹងការបារម្ភរបស់សិស្សប្អូន សាយ ត្រូវបានគេមើលឃើញបានជួបបញ្ហាបណ្ដើរៗចំពោះសុខភាព និងរាងកាយ ពិសេសជើងទាំងពីរគួរឲ្យបារម្ភ។
ក្រៅពីនេះ សាយ បានស្រកពី ៦២ គីឡូក្រាម មកត្រឹម៥៤ គីឡូក្រាម រីឯស្បែកដែលធ្លាប់ស្រស់ថ្លា បានប្រែជាខ្មៅគគ្រាត ក្រោយពីរត់ហត់ខ្លាំងក្រោមកម្ដៅថ្ងៃ និងហាលភ្លៀងជាច្រើនថ្ងៃមក។ ត្បិតថាបែបនេះ ម្ចាស់គម្រោងវ័យ ៣០ឆ្នាំ បញ្ជាក់ថា លោកមិនផ្លាស់ប្ដូរផែនការដែលបានគ្រោងឡើយ ក្នុងនោះលោកបានថ្លែងតាំងពីដំបូងក្នុងថ្ងៃសន្និសីទសារព័ត៌មាននៅ Major Cineplex by Smart។ សាយ៖"បើទោះបីជាខ្ញុំលំបាកវេទនា ឬហត់ដល់ស្លាប់ ក៏មិនស្មើនឹងក្មេងចន្លោះពី៣០០ ទៅ៥០០នាក់ កំពុងរង់ចាំការសង្គ្រោះជីវិតពីគ្រូពេទ្យ នៅមន្ទីរពេទ្យកុមារអង្គរដែរ។ ខ្ញុំសប្បាយចិត្ដនៅពេលដែលហ្វេនគិតគូរពីសុខទុកផ្ទាល់ខ្លួនខ្ញុំ តែខ្ញុំចង់ឲ្យបងប្អូនអាណិតក្មេងៗជាងខ្ញុំ ហើយចូលរួមបរិច្ចាគទាំងអស់គ្នា"។
លោក សាយ តាំងចិត្តមោះមុតក្នុងយុទ្ធនាការដ៏ប្រឈមនេះ ដើម្បីប្រមូលនិធិឲ្យបាន ១០០០លានរៀលជួយដល់មន្ទីរពេទ្យកុមារអង្គរខេត្តសៀមរាប ជាទីកន្លែងកុមារកម្ពុជាងាយរងគ្រោះរាប់ម៉ឺននាក់ពឹងពាក់អាស្រ័យ។ ចំពោះសប្បុរសជន ដែលចង់បរិច្ចាគជាទឹកប្រាក់ អាចបរិច្ចាគបានតាមគណនីធនាគារ ABA : 000 320 555 (Angkor Hospital for Children Limited) ឬ Wing : 52714 (AHC Patient Contributions)។
សម្រាប់ព័ត៌មានលម្អិតក្នុងការចូលរួម ក៏ដូចជាតាមដានចំនួនទឹកប្រាក់ដែលបានបរិច្ចាគ សូមចូលទៅកាន់គេហទំព័រ saicambodianartist.com/ ។ ក្រៅពីគេហទំព័រនេះ ប្រិយមិត្តអាចតាមដានរាល់សកម្មភាពរបស់សាយអំឡុងពេលរត់ តាមរយៈទំព័រហ្វេសប៊ុករបស់ Sai, Channel YouTube របស់សាយ, ទំព័រហ្វេសប៊ុករបស់ Sabay ក៏ដូចជាគេហទំព័រ Sabay៕
