- 2020-12-02 08:57:08
- ព័ត៌មាន
ខកចិត្ដមិនស្ទើរ! តារាពីរដួងនេះ ត្រូវខកពេលរៀបការដល់ទៅពីរដង តែនៅចិញ្ចឹមចិត្ដចង់រៀបការដដែល
- 2020-12-02 08:57:08
- ចំនួនមតិ 0 | ចំនួនចែករំលែក 0
ខកចិត្ដមិនស្ទើរ! តារាពីរដួងនេះ ត្រូវខកពេលរៀបការដល់ទៅពីរដង តែនៅចិញ្ចឹមចិត្ដចង់រៀបការដដែល
ចន្លោះមិនឃើញ
តាមជំនឿរបស់ខ្មែរ មុននឹងឈានដល់ការរៀបចំពិធីមង្គលការមួយបាន ត្រូវឆ្លងកាត់ការគុណគូរ ឬដេញវេលាយ៉ាងម៉ត់ចត់ពីលោកអាចារ្យ។ ប៉ុន្តែតារាចម្រៀង និងសម្ដែងទាំងពីរដួងនេះ បានឆ្លងកាត់ការដេញវេលា និងប្ដេជ្ញាចិត្ដ ថានឹងរៀបការឲ្យបានក្នុងឆ្នាំ២០២០ ប៉ុន្ដែមិនបានសម្រេចដូចបំណង។
តារាចម្រៀងប្រចាំនៅផលិតកម្ម អឹម លោក អាន គុណកូឡា ប្រកាសពន្យារពេលរៀបការរបស់ខ្លួនយ៉ាងតក់ក្រហល់កាលពីល្ងាចមិញ ទាំងដែលលោកធ្លាប់អះអាងម្ដងហើយម្ដងទៀតថា លោកនឹងរៀបការឲ្យបាននៅថ្ងៃទី១២ ខែធ្នូ ឆ្នាំ២០២០ ព្រោះលោកធ្លាប់ខកម្ដងហើយ ហើយពេលនេះសំបុត្រអញ្ជើញភ្ញៀវក៏ចែកជិតអស់ដែរ។
ការប្រកាសផ្អាករៀបការរបស់តារាចម្រៀងរូបនេះ គឺនៅក្រោយពីមានករណីឆ្លងជំងឺកូវីដ-១៩ ក្នុងសហគមន៍ ហើយរាជរដ្ឋាភិបាល បានសម្រេចមិនអនុញ្ញាតឲ្យមានការជួបជុំ ឬរៀបចំពិធីមង្គលការដែលមានមនុស្សចូលរួមច្រើន ដើម្បីទប់ស្កាត់ការឆ្លងរីករាលដាល នៃជំងឺនេះរយៈពេល១៥ថ្ងៃ គឺគិតចាប់ពីថ្ងៃទី១ ដល់ថ្ងៃទី១៥ ធ្នូ។
លោក អានគុណ កូឡា៖"ក្នុងនាមខ្ញុំជាកូនកំលោះ អាន គុណកូឡា និងអាណាព្យាបាលកូនប្រុស-ស្រី សូមប្រកាសផ្អាកកម្មវិធីរៀបមង្គលការជាបណ្ដោះអាសន្ន សម្រាប់ព័ត៌មានលម្អិតនឹងជូនដំណឹងជាថ្មីទៀត។ ដូច្នេះសូមគោរពជម្រាបជូន ឯកឧត្ដម លោកជំទាវ និងភ្ញៀវកិត្តិយសទាំងអស់ មេត្តាយោគយល់ និងអធ្យាស្រ័យដល់ក្រុមគ្រួសារយើងខ្ញុំផង"។
លោក អាន គុណកូឡា គ្រោងចូលរោងជ័យជាមួយនារីរកស៊ីត្បូងដ៏ស្រស់ស្អាតម្នាក់នៅខេត្តប៉ៃលិន នៅបុរីផ្លរ៉ា ខណ្ឌជ្រោយចង្វា រាជធានីភ្នំពេញ នាថ្ងៃទី១២ ខែ១២ ឆ្នាំ២០២០ បន្ទាប់ពីលោកលើកពេលរៀបការម្ដងហើយកាលពីអំឡុងខែឧសភា ឆ្នាំ២០២០ ដោយសារបញ្ហាជំងឺកូវីដ-១៩។
ងាកមកមើលគម្រោងរៀបការរបស់តារាកំប្លែងស្រី វ៉ាន់ នីឡា វិញម្ដង។ នីឡា និងចាស់ទុំទាំងសងខាង បានឯកភាពគ្នា ហើយមានគម្រោងរៀបការចំនួនពីរដងដែរ ពោលគឺនៅក្នុងខែឧសភា ឆ្នាំ២០២០ ម្ដង និងម្ដងទៀតនៅក្នុងខែវិច្ឆិកា ឆ្នាំ២០២០ ប៉ុន្តែគម្រោងរៀបការទាំងពីរលើក ត្រូវបានរាំងស្ទះដោយសារជំងឺកូវីដ-១៩។
ការផ្អាកគម្រោងរៀបការជាលើកទី២ នេះ បានធ្វើឲ្យកញ្ញា វ៉ាន់ នីឡា ខកចិត្ដយ៉ាងខ្លាំង ហើយប្រលយពាក្យយ៉ាងខ្លីថា"មានពីរជម្រើស គឺសែន និងចុះអេតាស៊ីវិល"។
ចំណងស្នេហ៍របស់តារាកំប្លែងវ័យក្មេង វ៉ាន់ នីឡា ជាមួយបុរសក្រៅសិល្បៈវ័យស្របាលគ្នា ជាង៣ឆ្នាំ បានធ្វើឲ្យអ្នកទាំងពីរកាន់តែស្រឡាញ់គ្នា និងយល់ចិត្តថ្លើមគ្នាខ្លាំង រហូតមិនអាចខ្វះគ្នាបាន ដោយពួកគេតែងតែទៅណាមកណាជាមួយគ្នាទៀតផង។
ទោះជាយ៉ាងណាតារាទាំងពីរដួងដែលត្រៀមនឹងស្គាល់ការរស់នៅជាមួយដៃគូជីវិតក្នុងភាពជាប្ដី-ប្រពន្ធ នៅតែចិញ្ចឹមចិត្តចង់រៀបការជាទ្រង់ទ្រាយធំឲ្យបាននៅថ្ងៃណាមួយ ប៉ុន្តែស្ថានភាពជាក់ស្ដែងសម្រាប់ឆ្នាំ២០២០ នេះ គឺមិនអំណោយផលសម្រាប់ពួកគេឡើយ ព្រោះជំងឺកូវីដ-១៩ កំពុងវាយលុក៕