- 2021-02-17 04:16:59
- ព័ត៌មាន
លើកទឹកចិត្តគ្នាផង! យុវជនមានប្រវត្តិកម្សត់ថា ស្ទើរ១ជីវិតហើយ ទើបស្គាល់លុយពាន់ដុល្លារប៉ុន្មានខែនេះទេ!
- 2021-02-17 04:16:59
- ចំនួនមតិ 0 | ចំនួនចែករំលែក 0
លើកទឹកចិត្តគ្នាផង! យុវជនមានប្រវត្តិកម្សត់ថា ស្ទើរ១ជីវិតហើយ ទើបស្គាល់លុយពាន់ដុល្លារប៉ុន្មានខែនេះទេ!
ចន្លោះមិនឃើញ
យុវជនមានប្រវត្តិកម្សត់កម្រមកពីខេត្ត ពោធិ៍សាត់ ចាប់ផ្ដើមស្គាល់លុយពាន់ដុល្លារប៉ុន្មានខែចុងក្រោយនេះ បន្ទាប់ពីកេរ្តិ៍ឈ្មោះចាប់ផ្ដើមមានគេស្គាល់ ហើយវីដេអូចម្រៀងរបស់លោកបង្ហោះលើយូធូបមានអ្នកចូលទស្សនា និងស្ដាប់ច្រើន។
លុយ ពាន់ដុល្លារ វិចិត្រ ប្រាប់ថា គឺបានពីឆាណែលយូធូបរបស់លោក ដែលបច្ចុប្បន្នមានអ្នកចុចតាមដាន(Subscribe) ចំនួន 150k។ វិចិត្រ ដែលដើមឡើយ ស្ទើរគ្មានទីពឹង ដោយសារគ្រួសារអត្តខាត់ពេក សូម្បីតែផ្ទះក៏គ្មានជ្រកនោះ បានប្រាប់ថា លោកចាប់ផ្ដើមធ្វើយូធូប ប្រមាណជាង ១ឆ្នាំមុន ដោយសារតែពេលនោះ លោកមិនដឹងថា ពឹងពាក់អ្វី ដើម្បីរំដោះខ្លួនចេញពីភាពទីទ័លបាន។
មុនចាប់ផ្ដើម លោកបានសិក្សាពីយូធូប និងបានដឹងថា បណ្ដាញសង្គមមួយនេះពិតជាអាចរកលុយបាន។ ដូច្នេះហើយ ក៏ដាក់ចិត្តធ្វើវីដេអូ ដែលយកចេញពីសកម្មភាពច្រៀងប្រចាំថ្ងៃរបស់លោកនៅកន្លែងការងារតែម្ដង យកមកបង្ហោះក្នុងឆាណែលរបស់ខ្លួន។ ទោះយ៉ាងណា ដូចដាំដើមឈើអីចឹងដែរ គឺមិនបានផលភ្លាមទេ ក្នុងនោះយុវជនកម្សត់ ប្រាប់ថា វីដេអូចម្រៀងរបស់លោកដាក់ទៅក្នុងឆាណែលនោះច្រើន ប៉ុន្តែមិនមានអ្នកមើលសោះ។
“ខ្ញុំចេះតែគិតថា ធ្វើម៉េចទៀត ហើយក្រោយមកមានមិត្តភ័ក្ដិប្រាប់ថា ធ្វើដាក់កន្លែងណាដែលគេលេងច្រើន គឺ Tik Tok ហើយខ្ញុំក៏សាកធ្វើដាក់ទៅ ហើយមែន ក៏ចាប់ផ្ដើមផ្ទុះខ្លាំងតាមរយៈបទ ឧបសគ្គស្នេហ៍ និយាយទៅ ដោយសារ Tik Tok បានគេស្គាល់ខ្ញុំច្រើន...”។
បន្ទាប់ពីត្រូវបានគេស្គាល់នៅលើបណ្ដាញសង្គមរបស់ចិនមក យុវជនសំឡេងក្រអួនក្រអៅ ប្រាប់ថា ប្រិយមិត្តដែលជាអ្នកគាំទ្រលោកជាច្រើនបានចូលមកចុចតាមដានលើឆាណែល និងទស្សនាបទចម្រៀងរបស់លោកច្រើនឡើងៗរៀងរាល់ថ្ងៃ។ ដោយឡែកបទ "ឧបសគ្គស្នេហ៍" ដែលជាដើមចមនាំលោកឲ្យមានប្រិយមិត្តស្គាល់ច្រើននោះ មកដល់បច្ចុប្បន្ន មានអ្នកចូលស្ដាប់ជិត ១០លានដងហើយ។
ស្ថានភាពនេះ បានជួយផ្លាស់ប្ដូរជីវិតរបស់តារាចម្រៀងមកពីខេត្តពោធិ៍សាត់ស្ទើរទាំងស្រុង។ លោកថា ពីមុនឡើយ លោកមិនដែលស្គាល់លុយពាន់ដុល្លារសោះឡើយ សំអាងលើការងារជាអ្នកយាមផ្ទះសំណាក់ឲ្យគេបានប្រាក់ខែ ៤០ដុល្លារ នោះ តែលុយហូបបាយប្រចាំថ្ងៃ លោកមិនមានគ្រប់គ្រាន់ផង។ លោកថា នៅចាំពេលមួយលោកមានជំងឺ ហើយអត់មានលុយនៅហ្នឹងខ្លួន១រៀល ពេលនោះដេកគិត ត្រូវធ្វើយ៉ាងណា។
តែចុងក្រោយក៏សម្រេចចិត្តទៅពេទ្យសិន ព្រោះសុខភាពកាន់តែធ្វើទុក្ខខ្លាំងហើយ។ លុះក្រោយមកទៀត បានមកធ្វើជាតារាចម្រៀងប្រចាំ Sky Bar ក្នុងភោជនីយដ្ឋាន "ស្លាមាស" លោកអាចរកប្រាក់បានច្រើនជាងមុនក៏ពិតមែន តែគ្រាន់តែអាចជួយឲ្យមានភាពងាយស្រួលជាងមុនសម្រាប់ការចាយវាយ តែមិនមានសល់អីដុំកំភួនដែរ។ "និយាយទៅគឺទើបតែប៉ុន្មានខែមុននេះទេ យូធូបខ្ញុំបានលុយគួរសម ខ្ទង់ពាន់ដុល្លារដែរបង ទើបបាន២ ៣ខែហ្នឹង"។ វិចិត្រ ថ្លែង។
មកដល់បច្ចុប្បន្ន សួ វិចិត្រ បានរកឃើញពន្លឺជីវិតថ្មីខ្លះៗ ក្រោយពីបានហែលទុក្ខលំបាកប្រមាណ ២០ឆ្នាំមកហើយ ។ លោកថា លោកអាចរកកម្រៃពីការចេញច្រៀងតាម Affair ផ្សេងៗខ្លះទៀត ក្នុងនោះ ១ខែលោកអាចចេញច្រៀងបាន ២ ៣ កម្មវិធីដែរ ដែលប្រាប់ថា រីករាយណាស់ និងសង្ឃឹមថា ពុកម៉ែបងប្អូននៅតែអាណិតស្រឡាញ់ ហើយលោកនឹងរឹតតែដុះខាត់សមត្ថភាពច្រៀងបន្ថែមទៀត។
សួ វិចិត្រ គឺជាកូនច្បងនៅក្នុងគ្រួសារក្រីក្រមួយក្នុងខេត្តពោធិ៍សាត់ ដោយម្ដាយជាអ្នកលក់នំបញ្ចុក។ គ្រួសាររបស់លោក បានរស់បែកខ្ញែកគ្នា២០ឆ្នាំហើយ ក្រោយអ្នកមានគុណទាំងពីរបានលែងលះគ្នា ហើយម្ដាយទៅធ្វើពលករនៅថៃ ឪពុកក៏រស់ក្នុងភាពអស់សង្ឃឹម។ ឯលោក និងប្អូនស្រីតូចៗពីរនាក់ រស់នៅកណ្ដោចកណ្ដែងគួរឲ្យស្រណោះកណ្ដាលវដ្ដសង្សារល្វឹងល្វើយ។
យ៉ាងណានៅមានភ័ព្វខ្លះ លោកនឹងប្អូនៗបានការយកអសារពីជីតាម្នាក់ដែលជាអ្នកដទៃសុទ្ធសាធ។ វិចិត្រ តស៊ូច្រើនណាស់ជាមួយការងារផ្សេងដូចជាដើរលេងភ្លេងការ ច្រៀង និងយាមផ្ទះសំណាក់ជាដើម។ លោកគ្មានផ្ទះស្នាក់ទេ ពោលគឺធ្វើការកន្លែងណាដេកកន្លែងនោះកាលពីអតីត ហើយមកទល់បច្ចុប្បន្ន ក៏លោកនៅតែមិនទាន់មានផ្ទះផ្ទាល់ខ្លួនដែរ៕
