- 2021-03-09 05:10:44
- ព័ត៌មាន
លែងយល់ច្រឡំ! ភរិយា នី រតនា ចេញមុខបញ្ជាក់ពីសកម្មភាពស្និទ្ធស្នាលជាមួយគ្រួសារពិធីការិនី ចាន់ កែវនិមល
- 2021-03-09 05:10:44
- ចំនួនមតិ 0 | ចំនួនចែករំលែក 0
លែងយល់ច្រឡំ! ភរិយា នី រតនា ចេញមុខបញ្ជាក់ពីសកម្មភាពស្និទ្ធស្នាលជាមួយគ្រួសារពិធីការិនី ចាន់ កែវនិមល
ចន្លោះមិនឃើញ
នៅមុនពីរថ្ងៃរកឃើញវិជ្ជមានជំងឺកូវីដ-១៩ លើពិធីការិនី កែវ ច័ន្ទនិមល ត្រូវបានគេសង្ស័យថាពិធីការិនីរូបនេះបានទៅចូលរួមក្នុងពិធីខួបកំណើតកូនស្រីរបស់រាចម្រៀង នី រតនា ដែលមានឈ្មោះថា"នីវណ្ណ មែលឡានី" កាលពីយប់ថ្ងៃទី៦ ខែមីនា ឆ្នាំ២០២១។
ការសង្ស័យរបស់មហាជន ជាពិសេសអ្នកគាំទ្ររបស់តារាចម្រៀង នី រតនា និងពិធីការិនី កែវ ច័ន្ទនិមល គឺនៅក្រោយពីគេឃើញរូបថតជាច្រើនសន្លឹកត្រូវបានបង្ហោះដោយអ្នកនាង កែវ ច័ន្ទនិមល តាមបណ្ដាញសង្គមFacebook ចំថ្ងៃខួបកំណើតកូនស្រីរបស់នី រតនា នោះ។ រូបថតទាំងនោះ បានបង្ហាញពីភាពស្និទ្ធស្នាលរវាងគ្រួសារទាំងពីរ ដោយគេឃើញកូនស្រីរបស់អ្នកនាង កែវ ច័ន្ទនិមល បានកៀកកើយកូន នី រតនា ហើយប្ដី-ប្រពន្ធទាំងសងខាងក៏ស្និទ្ធគ្នាណាស់ដែរ។
ជុំវិញភាពមន្ទិលនេះ ភរិយារបស់តារាចម្រៀង នី រតនា បានបញ្ជាក់តាមរយៈSabay នៅមុននេះបន្តិចថា គ្រួសារអ្នកនាង ខានបានជួបគ្រួសារអ្នកនាង កែវ ច័ន្ទនិមល ជាច្រើនខែមកហើយ ហើយរូបថតដែលពិធីការិនី កែវ ច័ន្ទនិមល បានបង្ហោះនោះ គឺជារូបថតចាស់តាំងពីឆ្នាំ២០២០។ ដូច្នេះពិធីខួបកំណើតកូនស្រី"នីវណ្ណ មែលឡានី" ដែលពុំហៅភ្ញៀវណាម្នាក់ចូលរួមផងនោះ ក៏ពុំមានវត្តមានរបស់គ្រួសារពិធីការិនី កែវ ច័ន្ទនិមល មកចូលរួមនៅក្នុងឱកាសនោះដែរ។
ភរិយារបស់ នី រតនា៖"ខានជួបគាត់(កែវ ច័ន្ទនិមល) រាប់ខែហើយ! ពីរថ្ងៃមុនគាត់ផុសជូនពរកូនខ្ញុំ...គាត់អត់មានរូបផុសក៏យករូបចាស់តាំងកូនខ្ញុំអាយុ៤ខែមកផុស ឥឡូវកូនខ្ញុំ១ខួបហើយហ្នឹង។ ការពិតថ្ងៃខួបកំណើតកូនខ្ញុំហ្នឹង អត់មានវត្ដមានគ្រួសារគាត់ ហើយខ្ញុំក៏អត់បានហៅភ្ញៀវណាម្នាក់ដែរ ដោយយើងដឹងថាមានបញ្ហាជំងឺកូវីដ"។
អ្នកនាង បញ្ជាក់ថា ការពិតរូបថតដែលបង្ហាញពីភាពស្និទ្ធស្នាលរវាងគ្រួសារទាំងពីរនោះ គឺបានថតតាំងពីថ្ងៃទី២០ ខែកក្កដា ឆ្នាំ២០២០។ អ្នកនាង សូមអំពាវនាវដល់ឲ្យមហាជនកុំឲ្យមានការភណ្ឌច្រឡំ ឬមានការរើសអើងចំពោះអ្នកបានរកឃើញថាវិជ្ជមានជំងឺកូវីដ-១៩៕
