Bang Si Hyuk ធ្លាប់ផ្ញើលិខិតសរសេរដៃផ្ទាល់ឲ្យ BTS ឯខ្លឹមសារទាំងស្រុងពិតជារំជួលចិត្តណាស់

2021-06-01 02:25:43
ព័ត៌មាន

2021-06-01 02:25:43
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះ Bang Si Hyuk បានវិវត្តខ្លួនក្លាយជា CEO ដ៏មានឥទ្ធិពលម្នាក់ប្រចាំប្រទេសកូរ៉េខាងត្បូង កាន់កាប់ក្រុមហ៊ុនចម្រៀងដ៏ធំគឺ HYBE។ ស្របពេល BTS ឯណេះវិញក៏មិនអន់ដែរ ដោយបានប្រឹងប្រែងរហូតក្លាយជាក្រុមចម្រៀង K-Pop ដ៏ល្បីលំដាប់ពិភពលោក។

ដោយឡែកបើនិយាយពីទំនាក់ទំនងរបស់ពួកគេមានន័យថាទាំង Bang Si Hyuk និង BTS សឹងតែមិនមែនជាកូនចៅនិងមេ ព្រោះថាពួកគេរាប់អានគ្នាបានល្អណាស់ ប្រៀបដូចជាគ្រួសារតែមួយ។ នេះក៏ព្រោះតែពួកគេបានឆ្លងកាត់រឿងលំបាកជាមួយគ្នាមកច្រើន ដូចនេះភាពជិតស្និទ្ធកាន់តែស្អិតល្មួតដូចអ្នកគាំទ្របានជ្រាបស្រាប់ ជាពិសេសមនោសញ្ចេតនាដែល Bang Si Hyuk មានចំពោះ BTS។

ដូចកន្លងមកនេះ លិខិតមួយច្បាប់សរសេរដោយដៃផ្ទាល់របស់ CEO ក្រុមហ៊ុន HYBE រូបនេះត្រូវបានបង្ហាញជាសាធារណៈលើ Naver V កាលពីខែសីហា ឆ្នាំ២០១៦ អំឡុងភាគទី៧ របស់វីដេអូស៊េរី «BON VOYAGE» របស់ BTS។ ដំបូងពេលក្រុមការងារប្រាប់ BTS ថាមានសំបុត្រពី Bang Si Hyuk ម្នាក់ៗភ្ញាក់ផ្អើលជាខ្លាំង។ ឯខ្លឹមសារទាំងស្រុងមានដូចតទៅ៖

«ជូនចំពោះ Seokjin, Yoongi, Namjoon, Hoseok, Jimin, Taehyung និង Jungkook! នៅពេលខ្ញុំបានជួបនឹងអ្នកទាំងអស់គ្នាដំបូង ទាំងអស់គ្នាពិតជានៅក្មេងណាស់កាលនោះ។ ទាំងអស់គ្នាមានភាពខុសប្លែកផ្សេងៗពីគ្នា ហើយអ្នកខ្លាចនេះខ្លាចនោះ និងគ្មានអ្នកណាហ៊ាន និងមិនដឹងគួរមើលភ្នែកខ្ញុំឲ្យចំផង។ ខ្ញុំគិតថាខ្ញុំដាក់កម្រិតតឹងរឹងឲ្យអ្នកទាំងអស់គ្នាខ្លាំងពេក។ ខ្ញុំនៅចាំបានថាពេលនោះខ្ញុំផ្ដល់ឲ្យអ្នកទាំងអស់គ្នានូវពេលលំបាក ដើម្បីឲ្យដល់កម្រិតដែលខ្ញុំចង់បាន ហើយតែងសួរថាហេតុអ្វីអ្នកមិនអាចជឿជាក់លើខ្លួនឯង ហើយសម្លឹងទៅមុខឲ្យឆ្ងាយ? ពេលគោលដៅដែលខ្ញុំដៅទុកនោះវានៅឆ្ងាយពេក ហើយពិបាកដែលធ្វើឲ្យអ្នកទាំងអស់គ្នាដែលកាលនោះទើបនៅក្មេងៗនៅឡើយមិនបានដេកពួនស្រួលបួលទេ។ ប៉ុន្តែអ្នកនៅតែអាចរកផ្លូវ និងរត់ទៅមុខបានឆ្ងាយ ហោះកាន់តែខ្ពស់ជាងគោលដៅដែលខ្ញុំធ្លាប់បានកំណត់ទៀត។ ពេលខ្ញុំរួមដំណើរជាមួយអ្នកទាំងអស់គ្នា ខ្ញុំទទួលស្គាល់ថា ចំណុចខ្លះការតឹងតែងក្នុងចិត្តរបស់អ្នក ត្រូវប្រឈមនឹងពេលវេលាប្រថុចញ៉ុច ដែលត្រូវបង្ខំឲ្យអ្នកខំប្រឹងហាត់ពេលមួយយប់ ហើយជំរុញខ្លួនឯងរហូតហួសព្រំដែនកំណត់»។

លោក Bang Si Hyuk នៅបានបន្ថែមទៀតថា៖ «ឥឡូវនេះខ្ញុំមិនចាំបាច់ចង្អុលបង្ហាញទិសទៅទីណាទៀតទេ ព្រោះអ្នកអាចហោះចេញបានដោយខ្លួនឯងជាមួយនឹងឥទ្ធិពលរៀងៗខ្លួនហើយ ហើយអ្នកពិតជាអាចទៅដល់កន្លែងខ្ពស់ដែលខ្ញុំមិនទាំងហ៊ានរំពឹងទុកថែមទៀតផង។ ពិតជាអរគុណខ្លាំងណាស់»។

គិតមកដល់ពេលនេះ ឥទ្ធិពលក្រុមចម្រៀង BTS កាន់តែហក់ឡើងមិនធម្មតា ហើយប្រជាប្រិយភាពរបស់ពួកគេមានសន្ធឹកធំធេង មិនមែនជារឿងលេងសើចទេ៕