ពិចារណាលើហេតុផលនីមួយៗរបស់តារាសម្ដែងទាំង៣ដួងនេះ មុនធ្លោយមាត់ថាខ្លួននឹងដើរចេញពីសិល្បៈ

2021-07-19 10:12:30
ព័ត៌មាន

2021-07-19 10:12:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតនៅក្នុងស្ថានភាពដែលការងារសិល្បៈស្ទើរគ្រប់ផ្នែកមិនទាន់ងើបឡើងវិញដោយសារវិបត្តិជំងឺកូវីដ-១៩ បានអូសបន្លាយជាង២ឆ្នាំ ស្រាប់តែនៅក្នុងខែកក្កដា ឆ្នាំ២០២១ នេះ មានសិល្បករ-សិល្បការិនីខ្មែរ៣រូប ធ្លោយមាត់ថាខ្លួននឹងដើរចេញពីអាជីពសិល្បៈហើយ។

ប៉ុន្តែគិតត្រឹមថ្ងៃទី១៩ ខែកក្កដា នេះ តារាកំប្លែងក្រុមនាយពាក់មី គឺនាងខ្ញុង និងនាយក្ដី ព្រមទាំងតារាសម្ដែងស្រី ស៊ឹម ស្រីនិច ហាក់នៅអល់អែក ឬមិនទាន់ដាច់ចិត្តឃ្លាតឆ្ងាយពីរង្វង់សិល្បៈនៅឡើយ ដោយអ្នកខ្លះក៏មិនទាន់បានផ្ដល់ហេតុផលសមរម្យដែលធ្វើឲ្យអ្នកគាំទ្ររបស់ខ្លួនជឿជាក់ ហើយអ្នកខ្លះថាមិនទាន់បោះបង់អាជីពសម្ដែងរបស់ខ្លួនទាំងស្រុងនោះទេ។

ផ្ដើមចេញពីតារាកំប្លែង ស្រេង សុកាន់ដា ហៅនាងខ្ញុង។ នាងបានកសាងកេរ្តិ៍ឈ្មោះល្បីល្បាញទូទាំងប្រទេសតាមរយៈអាជីពកំប្លែងជាង១២ឆ្នាំជាមួយក្រុមលោកតាវ៉ិចទ័រ នៃស្ថានីយទូរទស្សន៍CTN ហើយដៃគូសម្ដែងដ៏ស័ក្ដិសមបំផុតរបស់នាង គឺលោក ចែម ចាន់រ៉ា ហៅពាក់មី។

"បើខ្ញុំឈប់ពីសិល្បៈនៅគាំទ្រខ្ញុំទេ?" នេះគឺជាពាក្យដំបូងរបស់ខ្ញុងនៅលើបណ្ដាញសង្គមដែលធ្វើឲ្យអ្នកគាំទ្រមានការភ្ញាក់ផ្អើល និងខ្លះយល់ថានាងបានសម្រេចចិត្តបោះបង់អាជីពសិល្បទាំងស្រុង ហើយងាកទៅរកស៊ីវិញម្ដង។ ក្រោយលេចដំណឹងនេះ នាងត្រូវមហាជនគាំទ្រផង និងរិះគន់ផង រហូតដល់មានអ្នកខ្លះចូលទៅសរសេរថា៖"នាងខ្ញុងរកស៊ីមានបាន ភ្លេចកំណើតដើមជាអ្នកសិល្បៈ" មតិនេះធ្វើឲ្យនាងប្រតិកម្មខ្លាំងៗទាំងតាមគណនី Facebook ផ្ទាល់ខ្លួន និងតាមសារព័ត៌មានក្នុងស្រុករយៈពេលពីរបីថ្ងៃជាប់ៗគ្នា។

នាងចាត់ទុកអ្នកដែលរិះគន់នាងថាជាមនុស្សមានកម្រិតវប្បធម៌ទាបជាងនាង និងជាមនុស្សអសីលធម៌។ នាងមិនបានឈប់ពីអាជីពសិល្បៈទាំងស្រុង ឬឈប់ស្រឡាញ់សិល្បៈនោះទេ គឺនាងគ្រាន់តែសុំបញ្ចប់កុងត្រាការងារសម្ដែងនៅCTN ដែលជាបុត្រសម្ព័ន្ធ នៃក្រុមហ៊ុនCBS ដោយមានហេតុផលត្រឹមត្រូវ។ ហេតុផលនោះ គឺនាងមិនចង់បន្តក្ដីលំបាកដល់ថ្នាក់ដឹកនាំ ជាពិសេសលោកតាវ៉ិចទ័រដែលគ្រប់គ្រងនាងផ្ទាល់ ព្រោះតែនាងរវល់នឹងការមើលថែកូនតូច រកស៊ីផ្ទាល់ខ្លួន ហើយពុំមានពេលវេលាគ្រប់គ្រាន់ក្នុងការសម្ដែងឲ្យក្រុម។

ស្រេង សុកាន់ដា៖"ខ្ញុំចង់ឲ្យបងឯងយកខួរក្បាលមកគិតម្ដងទៀត! បើខ្ញុំក្លាយជាអ្នកមានស្ដុកស្ដម្ភ ខ្ញុំបោះបង់សិល្បៈ ខ្ញុំមិនទៅលេងកំប្លែង ឬមួយគេជួលក្បាលខ្ញុំហើយខ្ញុំមិនទៅ...ចាំអ្នកឯងថាមានបានហើយ ឆ្លងស្ពានហើយរុះស្ពានចេញ តែនេះខ្ញុំនៅលក់ប្រហុក លក់ផ្អក របស់ចំណេញមួយពាន់ពីរពាន់ទេ"។

នៅពាក់កណ្ដាលខែកក្កដា ឆ្នាំ២០២១ នេះដែរ តារាកំប្លែងរួមក្រុមនាងខ្ញុង គឺលោក ឈុន សុវណ្ណភក្ដី ហៅនាយក្ដី ក៏បានបង្ហើបពីគម្រោងដើរចេញពីសិល្បៈដែរ។ ប៉ុន្ដែលោកមិនបោះបង់ទាំងស្រុងនោះទេ គឺនៅតែរង់ចាំទទួលថតក្នុងកម្មវិធីផ្សេងៗ លើកលែងតែអង្គុយរង់ចាំតែថតរឿងកំប្លែងក្នុងកម្មវិធី"បានមើលបានសើច" របស់ស្ថានីយទូរទស្សន៍CTN ប៉ុណ្ណោះ។ នាយក្ដី៖និយាយទៅខ្ញុំមានមុខរបរមួយ គឺបើករមណីយដ្ឋាននៅម្ដុំផ្សារបាត់ដឹងផ្លូវជាតិលេខ៥១។ ការងារសិល្បៈផ្សេងបើគេហៅទៅខ្ញុំនៅតែទៅថត តែបើការងាររង់ចាំតែថតរឿងកំប្លែងហ្មង...ខ្ញុំសម្រេចថាឈប់ហើយ...សុំទោសបង អាហ្នឹងរឿងផ្ទាល់ខ្លួនក្នុងក្រុម មិនអាចនិយាយបានទេ"។

ចំណែកតារាសម្ដែងស្រីរូបស្រស់សោភា គឺកញ្ញា ស៊ឹម ស្រីនិច វិញក៏បានប្រកាសលាឈប់ពីអាជីពសម្ដែងដែរនៅក្នុងខែកក្កដា នេះ។ ស្រីនិចបានបង្ហោះសារមួយនៅលើបណ្ដាញសង្គមថា៖”លាហើយជីវិតសិល្បៈ ៦ឆ្នាំ នាងខ្ញុំទទួលបានការសើចសប្បាយជាច្រើនហើយមេរៀនក៏រាប់មិនអស់ដែរ”។

យ៉ាងណាមិញជុំវិញរឿងរ៉ាវដើរចេញពីសិល្បភ្លាមៗនេះ កញ្ញា ស៊ឹម ស្រីនិច ប្រាប់Sabay ថានាងមានភារកិច្ចគ្រប់គ្រងអាជីវកម្ម អចលនទ្រព្យធំមួយដែលត្រូវទទួលបន្តពីអ្នកម្ដាយ ម្យ៉ាងនាងចង់មានពេលសំងំនៅផ្ទះថែទាំខ្លួនឯង ខណៈកូវីដកំពុងផ្ទុះខ្លាំងមិនចង់ចេញទៅណា៕

អត្ថបទ៖ ជិន សុភ័ក្ដ្រ