មុនបោះលក់ស្នាដៃថ្មីលើកនេះ ម៉ៅ សំណាង បង្កើតសំណួរមួយ សូម្បីតែខ្លួនឯងក៏ពិបាករកចម្លើយ

2021-07-20 03:10:03
ព័ត៌មាន

2021-07-20 03:10:03
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិពន្ធសៀវភៅប្រលោមលោកជើងចាស់ ម៉ៅ សំណាង ហៅទន្សាយ ស្ទើរតែអស់កម្លាំងចិត្តក្នុងការនិពន្ធសៀវភៅរឿងថ្មីៗបន្ថែមទៀតដោយសារតែបញ្ហាប្រឈមសំខាន់ចំនួនពីរ។ នោះគឺបញ្ហាសុខភាពលោកស្រី កាន់តែទ្រុឌទ្រោម ហើយបញ្ហាមួយទៀត គឺការលួចចម្លងស្នាដៃ និងយកទៅអាននៅលើYoutube រកប្រាក់ពីលើកម្លាំងញើសឈាមរបស់លោកស្រីនៅតែបន្តកើតមាន។

សារបែបអស់សង្ឃឹមនេះ ត្រូវបានអ្នកស្រី ម៉ៅ សំណាង បញ្ចេញតាមបណ្ដាញសង្គមFacebook កាលពីថ្ងៃទី១៦ ខែកក្កដា ស្របពេលដែលអ្នកស្រីសរសេរបញ្ចប់សៀវភៅថ្មីមួយដែលមានចំណងជើងថា"នភាល័យ" ហើយត្រៀមបោះលក់ក្នុងពេលឆាប់ៗនេះ។

អ្នកស្រី បានចំណាយពេលជាង៧ខែ ទើបអាចសរសេរបញ្ចប់នូវសៀវភៅ១ក្បាលនេះ ហើយការសរសេរនេះទៀតសោតអ្នកស្រីត្រូវសរសេរដោយដៃម្ដងមួយអក្សរៗ ខុសពីអ្នកនិពន្ធបច្ចុប្បន្នប្រើកុំព្យូទ័រ។

ម៉ៅ សំណាង៖"ក្នុងឆ្នាំនេះ ខ្ញុំមានអារម្មណ៍ថាកម្លាំងខ្ញុំហាក់ចុះទ្រុឌទ្រោមជាងមុន ប៉ុន្តែខ្ញុំនៅតែខិតខំសរសេរទាំងឈឺ ទាំងជា។ ខ្ញុំត្រូវសរសេរដោយដៃម្តងមួយតួអក្សរៗដូច្នេះហើយវាប្រើពេលវេលា និងកម្លាំងច្រើនជាងអ្នកនិពន្ធថ្មីៗដែលពួកគេចេះបច្ចេកវិទ្យាអាចជួយសម្រួលការងារពួកគេច្រើន"។

អ្នកនិពន្ធវ័យជរារូបនេះ បន្ថែមថា នៅពេលដែលបញ្ចប់ការសរសេរចំណងជើងថ្មីម្តងៗ អ្នកស្រីហាក់មានអារម្មណ៍មិនសូវស្រួលទៅវិញ ព្រោះគាត់មិនដឹងថាតើសៀវភៅរបស់លោកស្រីដែលនឹងចេញផ្សាយទៅនោះ អាចលក់បានយូរប៉ុនណានៅលើទីផ្សារ បើនៅតែមានការលួចចម្លងស្នាដៃ ក៏ដូចជាការយកទៅអាននៅYoutubeរកប្រាក់ពីលើកម្លាំងញើសឈាមលោកស្រីដោយគ្មានការអនុញ្ញាត។