អតីតបេក្ខជន បេក្ខនារីរបស់កម្មវិធី Cambodia International Models ប្រមាណ១០០នាក់ បានជួបជជែកគ្នា និងបង្ហាញសមត្ថភាពដើរម៉ូដយ៉ាងអស្ចារ្យ ក្នុងកម្មវិធីសម្ពោធបើកល្បងក្រុមដើរម៉ូដ CIM នាផ្សារទំនើបអូឡាំព្យា ជាន់ផ្ទាល់ដី កាលពីយប់មិញ។

ស្ថាបនិកក្រុមដើរម៉ូដ CIM លោក ម៉ែន និមលរតន៍ មានប្រសាសន៍ថា គោលបំណងសំខាន់៣ ដែលនាំឲ្យលោកបង្កើតកម្មវិធីនេះឡើង គឺទី១ ចង់ថ្លែងអំណរគុណដល់អ្នកច្នៃម៉ូដ និងក្រុមការងារបច្ចេកទេសទាំងអស់ដែលធ្លាប់បានចូលរួមជាមួយកម្មវិធីCIM ។ ទី២ ចង់ចែករំលែកបទពិសោធន៍គ្នាទាក់ទងនឹងវិស័យដើរម៉ូដ និងទី៣ ចង់បង្កើតការជួបជុំមួយដែលពោពេញដោយក្ដីស្រឡាញ់ និងមិត្ដភាព។

ម៉ែន និមលរ័ត្ន៖ “ពេលនេះខ្ញុំអត់ទាន់បានអញ្ជើញSponsor ធំៗមកនៅឡើយទេ ហើយមិត្ដភក្ដិជិតស្និទ្ធរបស់ខ្ញុំក៏អត់ ក្រុមគ្រួសារខ្ញុំក៏អត់ ព្រោះខ្ញុំគិតថាជា Soft Opening យើងធ្វើសម្រាប់អគុណមនុស្សមួយចំនួនដែលបានចូលរួមជាមួយយើង ហើយយើងសង្ឃឹមថានៅពេលដែលពួកយើងធ្វើGrand Opening អញ្ជើញទាំងអស់”។

កម្មវិធីដ៏ឱឡរិកកាលពីរាត្រីថ្ងៃទី២ ខែមេសា ឆ្នាំ២០២២ របស់CIM គេក៏ឃើញវត្ដមានរបស់អតីតបេក្ខជន និងបេក្ខនារីដែលបច្ចុប្បន្នបានក្លាយជាតារាសម្ដែង និងដើរម៉ូដល្បីល្បាញមួយចំនួនចូលរួមផងដែរ។ ក្នុងមានដូចជា៖ លោក ជា លាងឈែ កញ្ញា រ៉េត សារីតា កញ្ញា ងិន ម៉ារ៉ាឌី កញ្ញា សំណាង អេលីណា កញ្ញា រឿន ណាត និងតារាសម្ដែងជាច្រើនរូបទៀត៕