សពអ្នកម្នាង ឌួង ឌីយ៉ាត ដែលត្រូវជា​ជីដូនបង្កើតរបស់ ព្រះនាងតូច នរោត្តម ជេនណា នឹងត្រូវបូជា​​នៅថ្ងៃទី ១៤ ខែឧសភា ក្រោយទទួលមរណភាពកាលពីថ្ងៃទី១១ ខែឧសភា ឆ្នាំ២០២២ ដោយរោគាពាធ នៅក្នុងទីក្រុងបាងកក​ប្រទេសថៃ។

ឈាន​ចូល​ម៉ោង​ ១១យប់ ថ្ងៃដដែល សពរបស់អ្នកម្នាង ក៏បាន​មក​ដល់វត្តបុទុមវត្តី ដើម្បីតម្កល់ធ្វើបុណ្យ ទក្ខិណានុប្បទាន តាមគន្លងប្រពៃណី ព្រះពុទ្ធសាសនាផងដែរ។

ជាក់ស្ដែង ឈាន​ចូល​ថ្ងៃទី១២ ខែឧសភា ព្រះនាងតូច នរោត្តម ជេនណា ក៏បានទូលថ្វាយ និង​ជម្រាបជូនដំណឹង តាមទំព័រហ្វេសប៊ុកផ្លូវការថា៖ «ពិធីបុណ្យសពជីដូនខ្ញុំ​ អ្នកម្នាង​ ឌួង​ ឌីយ៉ាត​ កំពុងប្រារព្ធធ្វេីបុណ្យតាមគន្លងព្រះពុទ្ធសានា​ នៅវត្តបុទុមវត្តី​ រាជធានីភ្នំពេញ​។ ពិធីបូជាសពជីដូនខ្ញុំ​ និងធ្វេីឡេីងនៅម៉ោង៧​ព្រឹក​ ថ្ងៃទី១៤​ ខែឧសភា​ ឆ្នាំ២០២២​ នាបរិវេណវត្តបុទុមវត្តី​។ សូមសម្ដេច​ ព្រះអង្គម្ចាស់ក្សត្រា​ ព្រះអង្គម្ចាស់ក្សត្រី​ អ្នកអង្គម្ចាស់​ អ្នកម្នាង​ ឯកឧត្តម​ លោកឧកញ៉ា​ លោកជំទាវ​ លោក​ លោកស្រី​ ដែលស្រឡាញ់រាប់អានជីដូនខ្ញុំ​ សូមយាង​ និង អញ្ជេីញចូលរួមជាការជូនដំណេីរជាកិច្ចចុងក្រោយ។ ជាមួយគ្នា​ ពុកម៉ែបងប្អូន​ជិតឆ្ងាយ​ដែលគាំទ្រ​ និងស្រឡាញ់ខ្ញុំ​ ចង់មកចូលរួមគោរពសពជីដូនខ្ញុំ​ ក៏អាចចូលរួមបាន​ដោយមេត្រីភាព។ សូមអរព្រះគុណ​ និងសូមអរគុណ»។

អ្នកម្នាង​ ឌួង​ ឌីយ៉ាត​ គឺជាទីប្រឹក្សាអមព្រះរាជលេខាធិការដ្ឋានព្រះមហាក្សត្រ​ និងត្រូវជាអ្នកម្នាងរបស់ សម្តេចព្រះមហិស្សរា នរោត្តម ច័ក្រពង្ស ព្រមទាំងជាមាតារបស់ព្រះអង្គម្ចាស់ក្សត្រីយ៍ នរោត្តម បុប្ផារី មាតានៃអ្នកអង្គម្ចាស់ នរោត្តម ជេនណា។ អ្នកម្នាង បានទទួលមរណភាព នៅថ្ងៃពុធ ទី១១ ខែឧសភា ឆ្នាំ២០២២នេះ វេលាម៉ោង ១១:៣៩នាទីព្រឹក​ ក្នុងមន្ទីរពេទ្យ​មួយ នៃក្រុងបាងកក​ ប្រទេសថៃ​ ដោយរោគាពាធ៕