មានអ្នកយល់ខុសមិនតិច រឿងបុរសអាថ៌កំបាំងស្និទ្ធជាមួយ ទ្រី ដាណា ថាជាពូម៉ៅ តាមពិតគឺជាតារាប្រុសម្នាក់សោះ!

2022-07-10 02:01:00
ព័ត៌មាន

2022-07-10 02:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សមិនតិចទេ ដែលបានធ្វើការប៉ាន់ប្រមាណខុស ដោយកាត់យល់ថា បុរសអាថ៌កំបាំងដែលឧកញ៉ា ទ្រី ដាណា បង្ហាញនោះ អាចជាតួជំនួស ពូម៉ៅ ប៉ុន្តែតាមពិតមិនមែនទេ គឺគេនោះជាតារាប្រុសដ៏ស្រស់សង្ហាម្នាក់។

នៅមុននេះបន្តិច ឧកញ៉ា ទ្រី ដាណា បានធ្វើឲ្យមានការចាប់អារម្មណ៍ ក្រោយបានទម្លាយវីដេអូខ្លីថតជាមួយបុរសសង្ហាម្នាក់ក្នុងរបៀបថតពីក្រោយ ហើយឲ្យអ្នកគាំទ្ររបស់ជំទាវឧកញ៉ា ធ្វើការទស្សន៍ទាយ និងរង់ចាំការបើកកកាយអត្តសញ្ញាណបុរសអាថ៌កំបាំងរូបនោះ។ ដោយសារតែបែបនេះ មានអ្នកខ្លះ បានធ្វើការសន្និដ្ឋានថា បុរសអាថ៌កំបាំង គឺជាពូម៉ៅ ដែលជាអតីតស្វាមីរបស់ជំទាវ។

ការសន្និដ្ឋានបែបនេះ ដោយសារមនុស្សមួយចំនួន នៅតែមិនទាន់ជឿថា ជំទាវឧកញ៉ា ទី្រ ដាណា និងពូម៉ៅចែកផ្លូវគ្នាពិតប្រាកដ ពោលគឺគិតថា អ្នកទាំងពីរគ្រាន់តែសម្ដែងដើម្បីប្រយោជន៍ខាងប្រជាប្រិយភាពប៉ុណ្ណោះ។ ប៉ុន្តែអ្វីៗខុសការគិតទាំងស្រុង បន្ទាប់ពីការពិតអំពីបុរសអាថ៌កំបាំងនោះ គឺជាតារាប្រុសម្នាក់ប៉ុណ្ណោះ។

នៅក្នុងសន្និសីទសារព័ត៌មាន រសៀលម្សិលមិញ បានឲ្យដឹងថា បុរសអាថ៌កំបាំងដែលបានធ្វើឲ្យមានការចាប់អារម្មណ៍យ៉ាងច្រើននោះ គឺជាលោក សេង មង្គល ដែលជាតារាប្រុសរូបសង្ហាមួយរូបសោះ។ តាមឧកញ៉ា ទ្រី ដាណា អ្វីដែលប្រិយមិត្តបានឃើញក្នុងវីដេអូខ្លីដែលផ្ទុះនៅលើបណ្ដាញសង្គមប្រមាណ ១សប្ដាហ៍មុននោះ គឺជាសកម្មភាពអ្នកទាំងពីរបានចូលរួមថត MV ជាមួយគ្នា។

មិនត្រឹមប៉ុណ្ណឹង លោក សេង មង្គល ក៏ត្រូវបានឧកញ៉ាស្រី ជ្រើសរើសធ្វើជាតារាតំណាងផលិតផល(Brand Ambassador) សម្រាប់ផលិតផលថ្មីរបស់ខ្លួនថែមទៀតផង គឺផលិតផល Collagen CQ10 ដែលបានប្រកាសចូលទីផ្សារប្រទេសកម្ពុជាចាប់ពីថ្ងៃសន្និសីទសារព័ត៌មាន។

ជំទាវ ទ្រី ដាណា បានពន្យល់ថា ជំទាវរើសយកលោក សេង មង្គល ជាតារាតំណាងផលិតផល ដោយសារតារាប្រុសរូបសង្ហា ស្បែកស្អាត និងក៏ជាអតិថិជន CQ10 របស់ជំទាវផងដែលតារាប្រុសបានប្រើខ្លួនឯងជាង១ខែហើយ។ ពិសេសជាងនេះ ជំទាវ បញ្ជាក់ថា ការមានទំនាក់ទំនងស្គាល់គ្នា ក៏ជាហេតុផលមួយដែរ ដែលសម្រេចរើសយកលោក មង្គល ធ្វើជា BA ព្រមទាំងថត MV មួយបទជាមួយថែមទៀត។

ពាក់ព័ន្ធនឹងវីដេអូចម្រៀងរួមគ្នាជាមួយលោក សេង មង្គល ជំទាវឧកញ៉ា ទី្រ ដាណា មិនបានប្រាប់លម្អិតឡើយ គ្រាន់តែបង្ហើបថា នឹងចេញក្នុងពេលឆាប់ៗនេះ។ ជំទាវឧកញ៉ា ទី្រ ដាណា បានធ្វើកម្មវិធីដ៏កក្រើក បើកបង្ហាញពីភាពពាក់ព័ន្ធរបស់លោក សេង មង្គល ដោយមានភ្ញៀវកិត្តិយសរាប់រយពាន់នាក់ រួមទាំងតារា Tiktok និងតារាចម្រៀងល្បីៗជាច្រើនទៀត មានដូចជា នាយ ចឺម រ៉ាប៊ី ពេជ្រ សោភា និងនីកូជាដើម៕