រាត្រីប្រកួតថ្ងៃទី២២ ខែសីហា ឆ្នាំ២០២២ បាន​បញ្ចប់ដោយរលូន និងបន្សល់តែអនុស្សាវរីយ៍ល្អចំពោះអ្នកទស្សនា គណៈកម្មការ ពិសេស​បេក្ខភាព​ដែល​នៅសល់។ ជាមួយគ្នានោះ កម្មវិធី​ ក៏បាន​ស្វែង​រកឃើញហើយ នូវជើងខ្លាំង​ចំនួន ៤រូប ដែល​នឹង​ត្រូវត្រៀមខ្លួនឡើងប្រកួត វគ្គផ្ដាច់ព្រ័ត្រ ដែល​នឹង​ត្រូវ​ប្រព្រឹត្តិទៅ​នៅថ្ងៃទី ២៨ ខែសីហា ខាងមុខ។

មុន វគ្គ​ផ្ដាច់ព្រ័ត្រ ដ៏ស្រៀវស្រើប រំភើបបុកពោះមកដល់ គេ​នៅ​មិនភ្លេចឡើយនូវការបង្ហាញសមត្ថភាពដ៏អស្ចារ្យនៅ​សប្ដាហ៍វគ្គ ពាក់កណ្ដាលផ្ដាច់ព្រ័ត្រ ដោយបេក្ខភាពជើងខ្លាំង ៦រូប ត្រូវច្រៀងបទចម្រៀងល្បីៗរបស់ផលិតកម្មហង្សមាស។ ក្រៅពីច្រៀងទោល ពួកគេ​ក៏​បានចាប់ដៃគូគ្នាបកស្រាយរួមគ្នា ដែលពេលនោះហើយធ្វើឲ្យអ្នកទស្សនាគ្រប់គ្នា រំភើបខ្លាំង។

ក្រឡេកទៅមើលបេក្ខភាពទាំង ៤ ដែលមាន​ឱកាសពិសេសទៅវគ្គបញ្ចប់ ពួកគេបានបង្កើតភាពអស្ចារ្យអ្វីខ្លះក្នុងសប្ដាហ៍មុន?

១. លីម តិចម៉េង

បេក្ខភាព​រូបនេះ ត្រូវ​បាន​គេ​លើកថា​ជា បេក្ខភាពជើងខ្លាំងមួយរូបប្រចាំកម្មវិធី​ តាំង​ពីវគ្គ Judge Audition មកម្ល៉េះ។ សម្រាប់សប្ដាហ៍ Semi-Final លោកបាន​លើកយក​បទ «គេមិនស្រឡាញ់យើងទេ» សំនៀងដើមរបស់ រៀមច្បង ហ្សូណូ។ តបតាមការកែសម្រួលភ្លេងថ្មីរបស់ លោកគ្រូភ្លេង តិចម៉េង​ បាន​ប្រឹងប្រែងធ្វើបាន​ផ្ចិតផ្ចង់​មិនឲ្យភ្លាត់ឡើយ។

ឈានដល់ វគ្គច្រៀងចាប់គូជាមួយនឹង​ បេក្ខជន ស៊ឹម ច័ន្ទពន្លឺ ក៏ តិចម៉េង មិនញ៉ាក ដោយធ្វើបាន​យ៉ាងល្អ តាមរយៈបទ «ដំរីថ្នមស្នេហ៍» ហើយឆ្លៀតបញ្ចេញចំណីភ្នែកទៅកាន់អ្នកមើលទៀត គឺចេញក្បាច់គុនប្រចាំខ្លួន ធ្វើឲ្យសម្រែកគ្រប់គ្នាក្នុងស្ទូឌីយោ កាន់តែលាន់រំពងតែម្ដង។

អ្វី​ដែល​មិនអាច​បំភ្លេច នៅ​ថ្ងៃនោះដែរ អ្នកម្ដាយជា​ទីគោរពរបស់លោក ក៏បាន​មក​គាំទ្រ​កូនប្រុសផ្ទាល់ដែរ។ ពេល​វេលាមួយនេះ​មិនអាចឲ្យ តិចម៉េង ទប់ទឹកភ្នែកជាប់ឡើយ។

២. នាង ដាវីន

កំលោះកំពូលញញឹមរូបនេះ ក៏មិនដែលធ្វើឲ្យគណៈកម្មការដែលជ្រើសតាំងពីវគ្គ Audition ក៏ដូចជាអ្នកគាំទ្ររបស់ខ្លួនខកចិត្តដែរ។ ក្នុងវគ្គ Semi-Final បេក្ខជន នាង ដាវីន បាន​ជ្រើសយក​បទ «ស្រឡាញ់អ្នកណាក៏គេមានសង្សារ» សំនៀងដើមរបស់ ចាន់ សុបញ្ញា។ ប៉ុន្តែក្រៅពីសមត្ថភាពផ្នែក​សំឡេង ម្នាក់ៗក៏ភ្ញាក់ផ្អើល​នឹងការរៀបចំខ្លួនរបស់ ដាវីន ដែរ ដោយសប្ដាហ៍នេះ​គឺ ប្លែក​ខ្លាំង​តែម្ដង។

ចូលដល់ពេល​ច្រៀងរួមគ្នាវិញ អ្នកដែលជាដៃគូរបស់ ដាវីន គឺ បេក្ខនារីតែមួយគត់ ពៅ ស្រីមាស។ អ្នកទាំង ២ បាន​សហការគ្នាយ៉ាងល្អ ដោយលើកយក​បទ «ក្រមុំដេកយំ មេម៉ាយដេកសើច»។ គ្រប់គ្នាសប្បាយភ្នែកក្នុងការទស្សនាណាស់ ដោយសារភាពក្រមិចក្រមើមពេល​សម្ដែងរបស់ពួកគេ។ វា​ប្រៀបដូចជាពុំមែនការប្រកួត ប៉ុន្តែដូចជា​ការសម្ដែងលើឆាកប្រគំតន្ត្រីមួយទៅវិញ។

៣. ថុល សុភិទិ

ភិទិ ក៏នៅតែមិនអន់ ដោយបន្លឺសម្រែកច្រៀងដូចរាជសីហ៍ ជាមួយនឹង​បទ «ស្នេហ៍ឯកា»។ មួយបទនេះ គណៈកម្មការសែនពេញចិត្ត ភិទិ ដោយសារតែបទនេះ​ មាន​កន្លែងពិបាក​ច្រើន ហើយសរសើរនឹងភាពក្លាហានដែល​លោកហ៊ានយកបទនេះ មក​បកស្រាយ។ ដូចរាល់ដង បេក្ខជន​រូបនេះ នៅតែធ្វើបានល្អ កាន់តែបង្ហាញ​សមត្ថភាព កាន់តែអាចធ្វើឲ្យគ្រប់គ្នាជឿជាក់ ១០០ភាគរយសម្រាប់ ថុល សុភិទិ។

រហូតដល់ពេលចាប់គូជាមួយនឹង ណាន វីសារ ដែលជា​ដៃគូសប្ដាហ៍នេះ អ្នកទាំង ២ សហការគ្នា​បានយ៉ាងល្អ តាមរយៈបទ «ស៊យធំ»។ ឈុតសម្ដែង​ចេញពីការសម្ដែងទេ ប៉ុន្តែវា​ប្រៀបដូចជាការសម្ដែងលើឆាកប្រគំតន្ត្រីធមរបស់ Super Star។ គិតចាប់ពីពេលបើកឆាកភ្លាម គឺគ្រប់គ្នាចាំសាទរអ្នកទាំង ២ យ៉ាងកងរំពង ញ៉ាំងកម្មវិធីឲ្យអធិកអធមមួយកម្រិតទៀត។

៤. ស៊ឹម ច័ន្ទពន្លឺ

គ្រប់គ្នា​ច្បាស់​ជា​បាន​ជ្រាប​ច្បាស់​ថា មាន​រឿងអ្វី​កើតឡើង​ចំពោះ​បេក្ខភាពរូបនេះនៅក្នុងសប្ដាហ៍កន្លងមក។ ប៉ុន្តែចំណុចដែលធ្វើឲ្យមហាជនផ្សេង​ទៀតសរសើរ ពន្លឺ គឺ​ការតាំងចិត្តទោះពិបាកចិត្តនឹងរឿងអ្វីក៏ដោយ ដោយព្យាយាមប្រមូលអារម្មណ៍មកបញ្ចូលក្នុងបទ «អារម្មណ៍ពេលខូចចិត្ត» នេះ។ ជាលទ្ធផល បេក្ខភាព​មកពីខេត្តតាកែវរូបនេះ ក៏អាច​ធ្វើបាន ហើយកាន់តែពិសេស លោកថែមទាំងជាប់ជា​បេក្ខជនឈានទៅប្រកួតនៅវគ្គផ្ដាច់ព្រ័ត្រដែរ។

ទស្សនីយភាពពិសេសមួយទៀត គឺ ពេល​ចាប់គូច្រៀងជាមួយនឹង​ តិចម៉េង។ ជាមួយនឹង​បទ «ដំរីថ្នមស្នេហ៍» អ្នកទាំង ២ បាន​សហការគ្នា​យ៉ាងល្អ ដើម្បីជូនជា​ចំណីអារម្មណ៍ប្លែកបិទវគ្គប្រកួត ពាក់កណ្ដាល​ផ្ដាច់ព្រ័ត្រ។ បរិយាកាសកម្មវិធីទាំងមូលពិតជាមិនធម្មតា ឮតែសម្រែកហ៊ោកញ្ជៀលពីអ្នកចូលរួមទស្សនាផ្ទាល់។ ជាមួយគ្នានោះ បើងាក​មក​ចំនួនអ្នកទស្សនាតាម Facebook វិញ កើតដល់ទៅជាង 230K ដែលជា​ប្រវត្តិសាស្ត្រថ្មីរបស់ Cambodian Idol៕

ចុចទីនេះដើម្បីទស្សនាវីដេអូទាំងស្រុង