កំពូលអ្នកច្នៃម៉ូដកម្ពុជា លោក ម៉ែន សីហា ដែលមហាជនភាគច្រើនស្គាល់ Olivia Kong ស្រក់ទឹកភ្នែកមាត់ៗ ក្រោយបញ្ចប់ការដើរម៉ូដ ដោយតារាម៉ូដែលជាច្រើននាក់ ក្រោមការដឹកនាំ និងស្នាដៃច្នៃម៉ូដសំលៀកបំពាក់ ដោយលោកផ្ទាល់ ក្នុងកម្មវិធី រាត្រីចង់ចាំ ព្រឹត្តិការណ៍ រាត្រីសម្បុរសធម៌។

ការដែលស្រក់ទឹកភ្នែកហូរហាមនេះ មិនមែនជាបញ្ហា តែវាជាការយំចេញពីក្រអៅបេះ របស់ Olivia Kong ដែលលោកបានបញ្ជាក់ថា គឺយំព្រោះរំភើបចិត្តខ្លាំងពេក បន្ទាប់ពីបានសម្រេចក្ដីសុបិនដ៏ធំក្នុងឆាកជីវិត យំព្រោះតែខ្មែរធ្វើបាន។

គោលបំណងរបស់ Olivia គឺចង់បង្ហាញពីការដឹងគុណដល់បុព្វបុរសខ្មែរដែលបានបន្សល់ទុកនូវស្នាដៃដល់មហាសច្ចាដល់កូនចៅជំនាន់ក្រោយ ហើយលោកចង់បន្តការគោរពថែរក្សានិងផ្សព្វផ្សាយ អភិវឌ្ឍន៍សម័យ អភិរក្សបុរាណផងដែរ។

Olivia Kong ថ្លែង៖ «ញុំបាទចង់ផ្សព្វផ្សាយនូវសិល្បៈវប្បធម៌អរិយៈធម៌ដ៏ល្អផូរផង់របស់ប្រទេសកម្ពុជាតាមរយៈការច្នៃប្រឌិតខ្ពស់បែបសម័យថ្មី ដែលប្រកបដោយការគិតនិងការអនុវត្តព្រមទាំងមានទឹកតាងដែលច្បាស់លាស់ចេញពីទឹកដីកំណើតរបស់យើងផ្ទាល់។»

ទន្ទឹមនឹងនេះ មិនត្រឹមតែជួយលើកស្ទួយវប្បធម៌អរិយធម៌ផូផង់កម្ពុជាប៉ុណ្ណោះទេ អ្នកច្នៃម៉ូដល្បីឈ្មោះរូបនេះ ថែមទាំងបានលើកទឹកចិត្តដល់ ក្មេងៗជំនាន់ក្រោយដែលគាត់កំពុងស្ថិតនៅក្នុងសម័យកាលទំនើបដែលអ្នកច្នៃប្រឌិតក្ដីឬជាអ្នកច្នៃម៉ូតឬជាសិល្បៈករសិល្បការិនីទាំងឡាយឲ្យបានយល់ថា នេះជាការចាប់ផ្ដើមថ្មីមួយរបស់កម្ពុជា រួបរួមគ្នាដើម្បីប្រទេសជាតិយើងរីកចម្រើន។

បញ្ជាក់ផងដែរថា កាលពីយប់ថ្ងៃទី ១៣ ធ្នូ ម្សិលមិញនេះ Olivia Kong បានដឹកនាំ ក្រុមតារាបង្ហាញម៉ូដ សិល្បករសិល្បការិនី កុមារី ជាច្រើននាក់ដើរម៉ូដសំលៀកបំពាក់នៅប្រាសាទតែម្ដង។ ដោយក្រុមម៉ូដែលទាំងនោះបាន គ្រងឈុតចម្រុះពណ៌ ចម្រុះក្បាច់ ដែលឈុតនីមួយៗសុទ្ធតែបានបង្កើតអត្ថន័យយ៉ាងជ្រាលជ្រៅ នៅក្នុងកម្មវិធី រាត្រីចង់ចាំ នាព្រឹត្តិការណ៍ រាត្រីសម្បុរសធម៌៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB