បន្ទាប់ពីនាយគ្រឿន ប្រកាសលែងយកខ្លួនបៀត ថ្ងៃនេះ តន់ ចន្ទសីម៉ា បញ្ជាក់ជំហរជាថ្មីរឿងផ្សព្វផ្សាយល្បែងអនឡាញ

2024-02-14 00:44:25
ព័ត៌មាន

2024-02-14 00:44:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះលោក ចែម សារឿន ហៅនាយគ្រឿន បានសុំទោសមហាជន ជាពិសេសអ្នកគាំទ្រជាសាធារណៈ ចំពោះសកម្មភាពរាំច្រៀងបង្ហាញពីការលេងល្បែងស៊ីសងតាមអនឡាញ។ នៅថ្ងៃនេះ តារាចម្រៀងម្នាក់ទៀត គឺកញ្ញា តន់ ចន្ទសីម៉ា បានចេញមុខបញ្ជាក់ជំហរមិនបន្ដផ្សព្វផ្សាយល្បែងស៊ីសង ហើយស្នើឲ្យភាគីក្រុមហ៊ុនគោរពកិច្ចសន្យា។

យោងតាមគណនីហ្វេសប៊ុកផ្លូវការរបស់តារាចម្រៀងរូបនេះ ខ្លួនបានបញ្ចប់កុងត្រាផ្សព្វផ្សាយរឿងល្បែងស៊ីសងជាមួយក្រុមហ៊ុនមួយតាំងពីចុងឆ្នាំ២០២២ ហើយកញ្ញាក៏មិនបានបន្ដកុងត្រា ឬធ្វើការងារថ្មីទាក់ទងនឹងអំពើមិនគម្បីចំពោះមហាជនផ្សេងទៀតដែរ។

តន់ ចន្ទសីម៉ា៖ "សូមមេត្តាភាគីក្រុមហ៊ុនគោរពនូវកិច្ចសន្យានិងបញ្ឈប់ការផ្សព្វផ្សាយជារូបភាពនិង វីដេអូដែលធ្វើឱ្យពុកម៉ែបងប្អូនមានការយល់ច្រឡំ។ ហើយក៏បញ្ជាក់ជូនពុកម៉ែបងប្អូនម្តងទៀតថានាងខ្ញុំមិនទទួលផ្សាយ Game online តាំងពីឆ្នាំ2022 មកម្ល៉េះ"។

ចំពោះការប្រកាសលែងយកខ្លួនបៀត ឬបញ្ចប់កុងត្រារឿងល្បែងស៊ីសងតាមអនឡាញនេះ ត្រូវបានអ្នកគាំទ្រនាយគ្រឿន និងកញ្ញា តន់ ចន្ទសីម៉ា មួយចំនួនគាំទ្រ ដោយអ្នកខ្លះនិយាយថាចង់ឃើញតារារបស់ខ្មែរលើកកម្ពស់វិស័យសិល្បៈខ្មែរគ្រប់ទម្រង់ ជាជាងផ្សព្វផ្សាយលើកកម្ពស់ល្បែង ឬគ្រឿងស្រវឹងដែលនាំទៅរកបញ្ហាសង្គម សេដ្ឋកិច្ចធ្ងន់ធ្ងរ៕

ជិន សុភ័ក្ដ្រ