តារាសម្ដែងហូលីវូដល្បីឈ្មោះរូបងសង្ហារ Jason Momoa ហាក់កំពុងតែផ្អែមល្ហែមខ្លាំងជាមួយមិត្តស្រីថ្មី នៅក្នុងប្រទេសជប៉ុន បន្ទាប់ពីតារាប្រុសរូបនេះបានធ្វើការលែងលះជាមួយអតីតភរិយា Lisa Bonet បាន២ឆ្នាំ។

Jason Momoa បានបញ្ជាក់ពីទំនាក់ទំនងស្នេហាជាមួយតារាសម្ដែង Adria Arjona តាមរយៈរូបផ្អែមល្ហែមស្អិតល្មួតប៉ុន្មានសន្លឹក នៅក្នុងភោជនីយដ្ឋានជប៉ុន ដែលពួកគេកំពុងទទួលទានអាហារជុំគ្នាជាមួយមិត្តផ្សេងទៀត។ តាមរយៈរូបថតបង្ហាញឱ្យឃើញថា Jason និង Ardria ហាក់ស្អិតល្មួតស្ទើរតែបេះមិនជិត គៀកកើយអំឡុងពេលថតជុំគ្នា។

នៅក្នុងរូបថតនៅសមុទ្រមួយទៀត Momoa និង Arjona ត្រូវបានគេឃើញថាអ្នកទាំងពីរហាក់ស្រឡាញ់គ្នាខ្លាំង សើចសប្បាយរីករាយនៅសមុទ្រខណៈដែលខ្យល់បក់បោកសក់របស់ពួកគេរញ៉េរញ៉ៃតែអ្នកទាំងពីរ មានក្ដីសុខខ្លាំង។

បញ្ជាក់ផងដែរថា Jacson បានរៀបអាពាហ៍ពិពាហ៍ជាតារាសម្ដែងអាមេរិក Lisa Bonet វ័យ៥៦ឆ្នាំ បន្ទាប់ពីបានស្គាល់គ្នា ១៧ឆ្នាំ ហើយបន្ទាប់ពីរៀបការរួមរស់ជាមួយគ្នាបាន៥ឆ្នាំ អាពាហ៍ពិពាហ៍របស់អ្នកទាំងពីរបានដើរដល់ផ្លូវបញ្ចប់។ បន្ទាប់ពី Jason លែងលះជាមួយ Lisa Bonet បាន២ឆ្នាំ Jason ក៏ទើបរកឃើញស្នេហាថ្មី គឺតារាស្រី Adria Arjona វ័យ៣២ឆ្នាំ អាយុប្អូន Jason ១២ឆ្នាំ៕