ជឿជាក់ថា ប្រិយមិត្តអ្នកអាន ពិសេសអ្នកនិយមតាមដានវិស័យសិល្បៈខ្មែរបានជ្រាបស្រាប់ហើយថា មានវត្តមានកូនកាត់ជាតិសាសន៍ផ្សេងៗជាច្រើនក្នុងកំពុងរង្វង់សិល្បៈខ្មែរនាពេលបច្ចុប្បន្ន។ រូបសម្រស់ដ៏ផូរផង់ គួបផ្សំទម្រង់មុខកូនកាត់ និងសមត្ថភាពដ៏ពូកែ ធ្វើឱ្យពួកគេច្បាបប្រជាប្រិយភាពយ៉ាងឆាប់រហ័សនឹកស្មានមិនដល់។

ក្នុងចំណោមកូនកាត់ជាតិសាសន៍ជាច្រើន គេបានប្រទះឃើញកូនកាត់ឈាមជ័រខ្មែរ-អៀកឡង់ គ្រីនីហ្គេន អានណា វ័យ១៩ឆ្នាំ ដែលសព្វថ្ងៃនាងជាតារាម៉ូដែល និងជា influencer លេចធ្លោម្នាក់ផងដែរ។

កន្លងមក ម៉ូដែលវ័យក្មេងរូបនេះ បានលេចមុខថតសម្អាងជាហូរហែរ ថែមទាំងធ្លាប់ចូលរួមដើរបង្ហាញម៉ូដកម្មវិធី fashion show តូចធំជាច្រើនទៀតផង។ នាងធ្លាប់ស្ម័គ្រចិត្តចូលរួមដើរបង្ហាញម៉ូដក្នុងមហាព្រឹត្តិការណ៍សិល្បៈដ៏ធំអស្ចារ្យ «រាត្រីចងចាំ និងរាត្រីសមោសរ» លើកទី៤ ដែលបានរៀបចំឡើងយ៉ាងអធិកអធមបំផុត នៅលើទឹកដីខេត្តសៀមរាប កាលពីឆ្នាំ២០២៣។

លើសពីនេះទៅទៀត សោភាកូនកាត់រូបនេះ ក៏ធ្លាប់ចូលរួមថតម៉ូដ fashion ជាមួយ អូលីវ៉ា គង់ និងធ្លាប់បានចូលរួមថត MV ចម្រៀង រួមទាំងសម្តែងភាពយន្តផងដែរ។

ដុងទេពកោសល្យ សមត្ថភាព និងភាពស្រស់ស្អាតបែបកូនកាត់របស់សោភារូបស្រស់នេះ និងការចេះក្តោបក្តាប់ឱកាសយ៉ាងល្អ ធ្វើឱ្យនាងរឹតតែមានភាពលេចធ្លោខ្លាំងឡើង និងមានគេស្គាល់យ៉ាងឆាប់រហ័សក្នុងរយៈពេលដ៏ខ្លី។

រយៈពេលចុងក្រោយនេះ គេរមែងឃើញ គ្រីនីហ្គេន អានណា បង្ហាញខ្លួនក្នុងកម្មវិធីសិល្បៈជាមួយសិល្បករវ័យក្មេងដែលមានឈ្មោះបោះសម្លេងក្នុងរង្វង់សិល្បៈខ្មែរ ជាពិសេសក្រុម Content creator និង Influencer ល្បីៗ។

គួររំឮកផងដែរថា សព្វថ្ងៃនេះមានឈាមជ័យកូនកាត់ជាតិសាសន៍ផ្សេងៗជាច្រើនបានប្រឡូកចូលក្នុងវិស័យសិល្បៈខ្មែរ ដូចជា កូនកាត់ខ្មែរ-បារាំង, អាល្លឺម៉ង់, រស្ស៊ី, ថៃ, ចិន, ឡាវ, ម៉ិចស៊ីកូ, អាមេរិក, និងជាតិសាសន៍ផ្សេងៗជាច្រើនទៀតផងដែរ ប៉ុន្តែ គ្រីនីហ្គេន អានណា ជាឈាមជ័រខ្មែរ-អៀកឡង់ ដំបូងដែលគេប្រទះឃើញក្នុងវិស័យសិល្បៈខ្មែរយើង។

វត្តមានកូនឈាមផ្សំទាំងអស់ បានជួយជំរុញឱ្យវិស័យសិល្បៈខ្មែរកាន់តែមានភាពរស់រវើកខ្លាំងឡើង ព្រោះរូបសម្រស់ ភាពឆ្លាតវ័យ និងដុងទេពកោសល្យសិល្បៈពីកំណើតរបស់ពួកគេ។

ឈាមជ័រខ្មែរ-អៀកឡង់ គ្រីនីហ្គេន អានណា អាយុ ១៩ឆ្នាំ មានម្តាយជាជនជាតិខ្មែរ ឪពុកជាជនជាតិអៀកឡង់៕