ថ្មីៗ តារាចម្រៀងអាមេរិក Lady Gaga បានជួបជាមួយនាយករដ្ឋមន្ត្រីបារាំង Gabriel Attal ក្នុងព្រឹត្តិការណ៍ហែលទឹកនៅឯកីឡាអូឡាំពិកទីក្រុងប៉ារីសឆ្នាំ ២០២៤។ ក្នុងអំឡុងពេលនៃព្រឹត្តិការណ៍នោះតារាចម្រៀងរូបនេះបានបង្ហាញមុខអ្នកជំនួញ Michael Polansky នាមគូដណ្តឹងរបស់នាង។ នេះ​បញ្ជាក់​ថា នាងបាន​ភ្ជាប់​ពាក្យ​ជា​ផ្លូវ​ការ​ជាមួយ​មិត្ត​ប្រុស​ដ៏​យូរ​របស់​នាងហើយ។

គូស្នេហ៍មួយគូនេះបានចាប់ផ្តើមទាក់ទងគ្នានៅឆ្នាំ ២០២០។ នៅពេលនោះ ពួកគេត្រូវបានគេចាប់បានថា បានថើបគ្នាយ៉ាងផ្អែមល្ហែម នៅពិធីជប់លៀងថ្ងៃចូលឆ្នាំសកលនៅ Las Vegas (សហរដ្ឋអាមេរិក)។ ប៉ុន្មានសប្តាហ៍ក្រោយមក Lady Gaga និងពាណិជ្ជករ Polansky បានចេញមុខជាសាធារណៈ បង្ហាញ​ច្បាស់ៗនូវទំនាក់ទំនងរបស់ពួកគេ។

នេះមិនមែនជាលើកទីមួយទេ ដែល Lady Gaga ប្រកាសភ្ជាប់ពាក្យ ដោយសារនាងធ្លាប់បានភ្ជាប់ពាក្យ ២ ដងរួចហើយ ប៉ុន្តែចំណងស្នេហ៍នាមជាគូដណ្ដឹងទាំងពីរលើកនោះ ត្រូវបញ្ចប់ដូចគ្នា។ សម្រាប់ស្នេហាលើកនេះ នាងទទួលបានការសាទរ និងជូនពរសូមឲ្យនាងជោគជ័យឈានដល់ការរៀបការសាងគ្រួសារដ៏មានសុភមង្គល៕