វត្តមានកំពូលតារាចម្រៀងរ៉េប ម៉ាន់ វណ្ណដា ហៅ វណ្ណដា ក្នុងពិធីបិទព្រឹត្តិការណ៍អូឡាំពិកឆ្នាំ២០២៤ នៅទីក្រុងប៉ារីសប្រទេសបារាំង បានបង្កការភ្ញាក់ផ្អើលយ៉ាងខ្លាំងក្លាដល់ប្រជាជនកម្ពុជាទូទាំងប្រទេស ជាពិសេសវិស័យសិល្បៈខ្មែរតែម្តង។

ការបង្ហាញខ្លួនយ៉ាងអាថ៌កំបាំងរបស់តារារ៉េបកម្ពុជារូបនេះ បាននាំមកនូវមោទនភាពដ៏ធំធេងសម្រាប់ប្រជាជនកម្ពុជា ព្រោះលោកបានបំបែកកំណត់ត្រាប្រវត្តិសាស្ត្រសម្រាប់កម្ពុជា ក្នុងនាមជាសិល្បករវ័យក្មេង និងដំបូងគេបង្អស់របស់កម្ពុជា ដែលបានឡើងបកស្រាយចម្រៀងក្នុងពិធីបិទកីឡាអូឡាំពិករដូវក្ដៅឆ្នាំ២០២៤ ទីក្រុងប៉ារីស ប្រទេសបារាំង។

ក្នុងនោះ សម្តេចតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា បានបង្ហោះរូបភាពរបស់លោកលើទំព័រហ្វេសប៊ុកផ្លូវការ ភ្ជាប់ជាមួយពាក្យពេចន៍ថា៖ «សូមអបអរសាទរ និងអរគុណដល់សិល្បករកម្ពុជា កូនប្រុសវណ្ណដា-Vann Da សម្រាប់ការបង្ហាញវត្តមានលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ក្រុងប៉ារីស ប្រទេសបារាំង ឆ្នាំ២០២៤ ដោយបានជួយលើកតម្កើងមុខមាត់ប្រទេសនៅលើឆាកអន្តរជាតិ។ ពុកពិតជាមានការភ្ញាក់ផ្អើលដែលកូនបានធ្វើកិច្ចការសម្រាប់កិត្តិយសជាតិបែបនេះ។ សូមជូនពរកូនជួបតែសេចក្តីសុខ សេចក្តីចម្រើន»។

ចំណែក ទំព័រហ្វេសប៊ុកផ្លូវការ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានបង្ហោះរូបថតភ្ជាប់ជាមួយសារយ៉ាងដូច្នេះថា៖ «សូមអបអរសាទរ និងអរគុណដល់សិល្បករកម្ពុជា លោក វណ្ណដា-Vann Da សម្រាប់ការបង្ហាញវត្តមានលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ក្រុងប៉ារីស ប្រទេសបារាំង ឆ្នាំ២០២៤ ដោយបានជួយលើកតម្កើងមុខមាត់ប្រទេសនៅលើឆាកអន្តរជាតិ»។

សូម្បី ស្ថានទូតប្រចាំព្រះរាជាណាចក្រកម្ពុជា និងប្រមុខថ្នាក់ដឹកនាំជាច្រើនទៀត ក៏បានបង្ហោះសារអបអរសាទរដល់តារារ៉េបកម្ពុជារូបនេះផងដែរ។

ក្រឡេកទៅមើលវិស័យសិល្បៈឯណោះវិញ សិល្បករ-សិល្បការនីល្បីៗជួរមុខលំដាប់ប្រទេស រួមទាំងអ្នកគាំទ្ររបស់លោកបានបង្ហោះសារអបអរសាទរយ៉ាងព្រោងព្រាតលើបណ្តាញសង្គម បង្ហាញការកោតស្ញប់ស្ញែង និងសេចក្តីត្រេកអរពេលឃើញសិល្បករកម្ពុជាតែម្នាក់គត់មានវត្តមានលើឆាកកម្មវិធីបិទការប្រកួតកីឡាអូឡាំពិករដូវក្តៅ ក្រុងប៉ារីស ប្រទេសបារាំង ឆ្នាំ២០២៤។

មិនទាន់អស់នៅឡើយទេ កេរ្តិ៍ឈ្មោះដ៏ក្រអូបរបស់ តារារ៉េបវ័យក្មេងកម្ពុជា វណ្ណដា សាយភាយខ្លាំង រហូតកាសែតបារាំង Le Parisien (ឡឺ ប៉ារីស្យិន) ក៏បានចុះផ្សាយអត្ថបទអំពីតារាវ័យ ២៧ឆ្នាំរូបនេះដែរផងដែរ។

គួររំឮកផងដែរថា ក្រៅពីវត្តមានរបស់ វណ្ណដា នៅមានសិល្បករអន្តរជាតិផ្សេងៗទៀតដែលបានឡើងសម្ដែងក្នុងកម្មវិធីបិទកីឡាអូឡាំពិកឆ្នាំ២០២៤ កាលពីសប្ដាហ៍មុន មានដូចជា ក្រុមចម្រៀងរ៉ុកបារាំង Phoenix , ក្រុមចម្រៀងបារាំង Air , ក្រុមចម្រៀងអាមេរិក Vampire Weekend , តារាចម្រៀងប៊ែលហ្សិក Angèle , តារាចម្រៀងអាមេរិក Ezra Koenig តារាចម្រៀងអាមេរិក HER និងមានការសម្តែងពិសេសពីតារាសម្ដែងហូលីវូដ Tom Cruise ផងដែរ។

ក្នុងការសម្ដែងរយៈពេលជាងកន្លះនាទី វណ្ណដា បានច្រៀងបទ «Time To Rise» ក្នុងសម្លៀកបំពាក់បែបខ្មែរច្នៃចេញពីក្រណាត់ផាមួងពណ៌ខ្មៅ ជាស្នាដៃច្នៃឡើងយ៉ាងប្រណីតដោយ ណុប ដាណេ សម្អាងការ៕