មានព័ត៌មាន ក្រសួងវប្បធម៌ គ្រោងចាត់វិធានការលើកទី២លើ ដេនី ក្វាន់

2016-12-07 04:29:29
ព័ត៌មាន

2016-12-07 04:29:29
ចំនួនមតិ 0 | ចំនួនចែករំលែក 0

ចន្លោះមិនឃើញ

មានព័ត៌មានដែលធ្លាយចេញនៅព្រឹកនេះ បានឲ្យដឹងថា ក្រសួងវប្បធម៌ និងវិចិត្រសិល្បៈគ្រោងកោះប្រជុំក្រុមប្រឹក្សាវិន័យ ដើម្បីមានវិធានការចាត់ការទៅលើ កញ្ញា ដេនី ក្វាន់ ជាលើកទី២។

ចំណាត់ការរបស់ក្រសួងនេះ ធ្វើឡើងបន្ទាប់ពីកញ្ញា ដេនី ក្វាន់ បង្ហាញរូបថតសិចស៊ីប៉ុន្មានសន្លឹកលេចលើលេចក្រោមនៅលើបណ្ដាញទំនាក់ទំនងសង្គមហ្វេសប៊ុក ធ្វើឲ្យសារព័ត៌មានក្នុងស្រុកចុះផ្សាយស្ទើរតែគ្រប់ទំព័រអំពីរូបនាង។

តាមព័ត៌មានដែលធ្លាយចេញពីមន្ត្រីមួយរូបនៃក្រសួង បានឲ្យដឹងថា ដើម្បីឆ្លើយតបទៅនឹងការបន្តចែកចាយរូបភាពសិចស៊ីរបស់តារាស្រីមកពីខេត្តព្រះវិហារខាងលើ ក្រសួងគ្រោងបើកអង្គប្រជុំក្រុមប្រឹក្សាពិន័យដើម្បីជជែកពិភាក្សាលើរឿងនេះ ក្នុងនោះតាមការប៉ាន់ស្មាន អាចនឹងកើតមានព្រឹកនេះ។ យ៉ាងណា មន្ត្រីដដែលសុំមិនអធិប្បាយច្រើនលើករណីនេះ មុនអ្វីៗចេញជាផ្លូវការ។

វិលមកឯកឧត្ដម ថៃ នរៈសត្យា ទីប្រឹក្សាក្រសួងវប្បធម៌ និងវិចិត្រសិល្បៈ ដែលជាអ្នកកោះហៅ ដេនី ក្វាន់ មកជួបដោយផ្ទាល់កាលពីករណីទី១នាដើមឆ្នាំនេះ ក៏មិនអធិប្បាយអ្វីវែងឆ្ងាយដែរ។ ឆ្លើយតបតាមសារអេឡិចត្រូនិក ឯកឧត្ដម បានប្រាប់យ៉ាងខ្លីថា "អាចនឹងមាន"។

យ៉ាងនេះក្ដីនៅលើបង្ហាញសង្គម ឯកឧត្ដម ថៃ នរៈសត្យា បានឆ្លើយតបទៅសារព័ត៌មានខ្លះដែលភ្ជាប់លោកជាមួយករណីរបស់ ដេនី ដោយហៅថាសកម្មភាពរបស់តារាស្រីរូបនេះ ផ្គើននឹងការណែនាំរបស់ឯកឧត្ដមកន្លងមក ក្នុងនោះឯកឧត្ដមថា មិនមានការរង្គាសចិត្តអ្វីទេ អ្វីដែលបុគ្គលបានធ្វើ ជាការផ្គើនខ្លួនឯងទៅវិញ ឯកឧត្ដមធ្វើតាមតែតួនាទី។

រូបភាព៖ហ្វេសប៊ុក ដេនី

ផ្ទុយទៅវិញ ឯកឧត្ដមមានតែការអាណិត ចំពោះបុគ្គលដែលចចេស ព្រោះថាការប្រើប្រាស់សិទ្ធិសេរីភាពរបស់ខ្លួនខ្លាំងពេក នឹងអស់សិទ្ធិប្រើប្រាស់នាពេលខាងមុខទៀត។

"យើងខ្ញុំធ្វើការងារតាមវិជ្ជាជីវ: ដែលមានលិខិតបទដ្ឋានគតិយុត្តិនានាជាមូលដ្ឋាន ហើយក៏អបស្ទបជាមួយមនោសញ្ចេតនាផងដែរ ព្រោះយើងខ្ញុំយល់ថា ច្បាប់តែឯកឯងមិនអាចធ្វើអ្វីបានឡើយ។ ដូចនេះ យើងនឹងយកក្រមសីលធម៌នៃអ្នកសិល្ប:ជាត្រីវិស័យគោលការណ៍គ្រឹះ គួបផ្សំជាមួយសត្យានុម័តនៃក្រុមប្រឹក្សាវិន័យ និងក្រុមប្រឹក្សាពិន័យ ដើម្បីអនុវត្តន៍ការងាររបស់យើងឲ្យមានប្រសិទ្ធភាពចំពោះមុខ រាជរដ្ឋាភិបាល និងស្រទាប់មហាជននៃព្រះរាជាណាចក្រកម្ពុជា នៃយើង"។ ឯកឧត្ដម បន្ថែម។

ដេនី ក្វាន់ ធ្លាប់ទទួលការព្រមានម្ដងរួចមកហើយកាលពីពាក់កណ្ដាលឆ្នាំនេះ បន្ទាប់ពីនាងបានបញ្ចេញរូបភាពសិល្បៈសិចស៊ីបន្តបន្ទាប់។ តពីនោះមក គេនាង ស្ងប់ស្ងាត់សកម្មភាពសិចស៊ីរបស់នាង ដោយងាកទៅធ្វើការងារសប្បុរសធម៌មួយចំនួនវិញ។ ទើបតែម្សិលមិញនេះប៉ុណ្ណោះ នាងបានបញ្ចេញរូបសិចស៊ីឡើងវិញ។

យ៉ាងណា ពាក់ព័ន្ធនឹងព័ត៌មាន ក្រសួង ត្រៀមចំណាត់ការករណីជាថ្មីនេះ សាមីខ្លួន ដេនី ក្វាន់ មិនទាន់អាចសុំការអធិប្បាយបានទេនៅព្រឹកនេះ ដោយទូរសព្ទរបស់នាង ទទួលការហៅចូល តែគ្មានអ្នកទទួល៕

អត្ថបទ៖ ឆុង ស៊ីណាន