ត្រឹមកន្លះឆ្នាំ លោក យឹម សម្បត្តិ ទទួលបានពានរង្វាន់ធំៗនឹកស្មានមិនដល់

2016-12-13 06:28:49
ព័ត៌មាន

2016-12-13 06:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

តួឯកប្រុសក្នុងភាពយន្តខ្នាតធំរឿង "តម្លៃស្នេហ៍" ថ្លែងមកកាន់ Sabay ថា ត្រឹមរយៈពេលកន្លះឆ្នាំចុងក្រោយនេះលោកទទួលបានពានរង្វាន់ដល់ទៅ២ ពោលគឺពាន់រង្វាន់ថ្នាក់ជាតិមួយ និងអន្តរជាតិមួយទៀតដែលបានពីទីក្រុង New York។

ក្នុងខែ មិថុនា ឆ្នាំ ២០១៦នេះ លោក យឹម សម្បត្តិ បានទទួលពានរង្វាន់ប្រភេទពេជ្រខាងផ្នែក"តួសម្ដែងប្រុសល្អផ្ដាច់គេ" ឬ "Best Actor" សម្រាប់រឿង "មួយថ្ងៃនៅជនបទ" ពីការប្រកួតប្រជែងកុននៅមហោស្រពភាពយន្តអន្តរជាតិ ទីក្រុង New York ដែលជាពានធំជាងគេក្នុងចំណោមពានទាំងប្រាំ មានពានរង្វាន់ប្រភេទ ពេជ្រ មាស ប្លាទីន ប្រាក់ និង សំរឹទ្ធ។

លោកប្រាប់ថា លោកពិតជាមានភាពរំភើបក្រៃលែងក្នុងការដែលលោកទទួលបានពាននេះ ហើយវាជារឿងមួយដែលលោកមិនដែលរំពឹងទុក និងនឹកស្មានមិនដល់ ក្នុងជីវិតសិល្បៈរបស់លោកឡើយ។

ងាកទៅកាន់ពានរង្វាន់ថ្នាក់ជាតិវិញ លោក យឹម សម្បត្តិ ទើបតែទទួលបានពានខាងផ្នែក "មនោសញ្ចេតនា និង កម្សត់" ពីកម្មវិធី Apsara Award ក្នុងពេលថ្មីៗនេះ។ លោកពោលថា សម្រាប់ពានរង្វាន់នេះ គឺជាពានមួយដែលសក្ដិសមបំផុតចំពោះរូបលោក ក្នុងការប្រកួតប្រជែងអស់រយៈពេលជិតពេញមួយឆ្នាំនេះ។

យឹម សម្បត្តិបន្តថា ហើយលោកក៏មិនមានសេចក្ដីអាក់អន់ ស្រពន់ចិត្តចំពោះលទ្ធផលដែលលោកបានពានតិចជាងបេក្ខជនផ្សេងៗឡើយ ព្រោះលោកពុំមានពេលវេលាគ្រប់គ្រាន់ក្នុងការហ្វឹកហាត់ និងចូលរួមសម្ដែងច្រើនបេក្ខជនឯទៀត។

ផ្ទុយទៅវិញ ម្ចាស់ពានរង្វាន់ "Best Actor" រូបនេះអះអាងថា លោកនឹងព្យាយាមបន្ថែមសម្រាប់ឱកាស ក៏ដូចជាការប្រកួតប្រជែងក្រោយៗទៀត ថានឹងធ្វើឲ្យបានល្អបំផុតដើម្បីទទួលបានភាពជោគជ័យក្នុងវិថីសិល្បៈរបស់ខ្លួនតទៅមុខទៀត៕

អត្ថបទ៖ ម៉េន សុខណា