នៅ សុនីតា ៖ វាជាហេតុការណ៍មួយតក់ស្លុតខ្លាំងបំផុត និងជាលើកទី១ក្នុងជីវិតរបស់ខ្ញុំ

2017-05-05 07:02:58
ព័ត៌មាន

2017-05-05 07:02:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងហេតុការណ៍រន្ទះបាញ់កាលពីម្សិលម្ង៉ៃទៅលើក្រុមផលិតភាពយន្តរបស់ផលិតកម្មថោនដែលធ្វើឲ្យលោក មឿន វណ្ណា ជាអ្នកកាន់កាមេរ៉ាស្លាប់នោះ តារាសម្ដែង នៅ សុនីតា ក៏នៅក្នុងនោះដែរ របួសដែរ ដែលនាងបញ្ជាក់ថា ជាហេតុការណ៍តក់ស្លុតបំផុតសម្រាប់នាង។

តារាស្រីខាងលើថ្លែងឲ្យដឹងថា មនុស្សជាច្រើននៅក្នុងហេតុការណ៍អាក្រក់នោះ ហើយទាំងអស់គ្នាទទួលរងគ្រោះដោយឥទ្ធិពលរន្ទះ ទាំងអស់ គ្រាន់តែធ្ងន់ និងស្រាលប៉ុណ្ណោះ។ ចំពោះរូបនាងវិញ គឺត្រូវដៃ និង ប៉ះពាល់ត្រចៀក ដោយសារតែសំឡេងនៃរន្ទះនោះ។

នៅ សុនីតា បានបន្តថា ពេលនេះដៃរបស់នាងនៅស្ពឹក និង ត្រចៀកហ៊ឹងជាខ្លាំង មិនទាន់បាត់ឡើយ អារម្មណ៍នៅតែតក់ស្លុត និងភ័យខ្លាចខ្លាំងណាស់ ។ "ខ្ញុំស្លុតខ្លាំងណាស់ ខ្ញុំអត់ដែលជួបហេតុការណ៍អញ្ចឹងទេ លើកទី១ក្នុងឆាកជីវិតរបស់ខ្ញុំហើយ វាជាហេតុការណ៍ដែលខ្ញុំចាំមួយជីវិត និងស្លុតខ្លាំង ហើយក៏ជារឿងមួយខ្ញុំមិននឹកស្មានបាត់បង់មនុស្សដែលខ្ញុំធ្លាប់ការងារជាមួយដែរ"។

តាមការឲ្យដឹងពីតារាស្រីខាងលើ ថ្ងៃនោះក្រុមរបស់ខ្លួន បានចាប់ផ្ដើមថតតាំងពីព្រឹក ហើយប្លង់ដែលនាងថត ជាប្លង់ចុងក្រោយគេ ម៉ោងប្រហែល៥ល្ងាច ដោយប្លង់សម្ដែងខារ៉ាអូខេ បញ្ចូលក្នុងសាច់រឿង។

លោក ស៊ឹម សោភណ្ឌ ដែលជាដៃគូសម្ដែងជាមួយ សុនីតា ដែរ មិនមានគ្រោះថ្នាក់ធ្ងន់ឡើយ ហើយលោកបានជួយសង្គ្រោះ លោក មឿន វណ្ណា ភ្លាមៗទៀត ដោយបានយកមកមន្ទីរពេទ្យ ប៉ុន្តែជាអកុសល កាមេរ៉ាមែនរូបនោះបានស្លាប់ទៅហើយ។

តាមការបញ្ជាក់ពី នៅ សូនីតា សប់លោក មឿន វណ្ណា ត្រូវបានសាច់ញាតិដឹកយកទៅធ្វើបុណ្យនៅឯខេត្ត ក្រចេះ ដែលជាស្រុកកំណើតរបស់លោក៕

អត្ថបទ៖ ស៊ុនហួត