អាសូរសិល្បករជើងចាស់យើងច្រើននាក់ ឈឺធ្ងន់ធ្ងរក្នុងស្ថានភាពគួរឲ្យបារម្ភខ្លាំង នាចុងឆ្នាំនេះ

2018-12-25 03:53:34
ព័ត៌មាន

2018-12-25 03:53:34
ចំនួនមតិ 0 | ចំនួនចែករំលែក 0

ចន្លោះមិនឃើញ

កើត ចាស់ ឈឺ ស្លាប់ ជាច្បាប់ធម្មជាតិ ពិតមិនអាចចៀសផុតបាន ដូចឃើញ សិល្បករជើងចាស់យើងច្រើននាក់ មានទាំងផ្នែកចម្រៀង កំប្លែង និងសម្ដែង កំពុងគេងសម្រាកនៅលើកន្ទេល ក៏ដូចជាគ្រែពេទ្យក្នុងស្ថានភាពធ្ងន់ធ្ងរក្រោមការរុករានដោយជំងឺច្រើនមុខ ធ្វើឲ្យក្រុមគ្រួសារបារម្ភខ្លាំងបំផុត។ សិល្បករជើងចាស់យើងទាំងនោះមាន៖

អ្នកគ្រូ គង់ ណារី ៖ អ្នកគ្រូ គឺជាព្រឹទ្ធាចារ្យសិល្បៈមួយរូប ដែលធ្លាប់បានសាបព្រួសចំណេះជំនាញសិល្បៈ ទៅកាន់ជំនាន់ក្រោយជាច្រើនឆ្នាំ ក្នុងនោះសិល្បករ សិល្បការិនីទាំងសម្ដែង ពិធីករ ដែលដុះដាលក្រោមការបណ្ដុះបណ្ដាលរបស់អ្នកគ្រូ ក៏ច្រើនណាស់ដែរ។ ក្នុងវ័យ ៦៥ឆ្នាំ បាន និងកំពុងរុករានដោយជំងឺដ៏កាចសាហាវ២យ៉ាង គឺ ក្រិនថ្លើម និងដុះដុំសាច់កាច។

អ្នកគ្រូធ្លាប់ត្រូវក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ និងពេទ្យរុស្សី ក្នុងស្ថានភាពគួរឲ្យបារម្ភ។ រឹតតែគួរឲ្យសង្វេគក្នុងពេលដែលខ្លួនកំពុងតតាំងនឹងមច្ចុរាជ អ្នកគ្រូនៅមានបន្ទុកចិញ្ចឹមម្ដាយឪពុកចាស់ជរា វ័យប្រមាណ៨៨ឆ្នាំ និងទារកអាយុ៩ខែ ដែលរើសមកចិញ្ចឹមថែមទៀត។

នាយ ក្ដឹប៖ នាយ ក្ដឹប មានវ័យ ៥៨ឆ្នាំ គឺជាតារាកំប្លែងក្នុងក្រុមនាយ ក្រឹម។ លោកបានបាត់មុខពីការសម្ដែងអស់រយៈពេលយ៉ាងយូរមកហើយ ក៏ព្រោះលោកជំងឺរុករានទន្ទ្រានរាងកាយ។ តាមភរិយាប្រាប់សារព័ត៌មាន នាយ ក្ដឹប មានជំងឺស្ពោតសរសៃឈាមនៅខួរក្បាល និងបេះដូង។ ស្ថានភាពរបស់នាយ គឺស្ទើរតែអស់សង្ឃឹមទៅហើយ ដោយចុងក្រោយនេះ មានដំណឹងថា នាយ ត្រូវក្រុមគ្រួសារសម្រេចយកត្រឡប់មកផ្ទះវិញហើយ។ អ្នកស្រី ហួន ផាត ជាភរិយា និងកូន៥នាក់ ចៅ ៦នាក់ បញ្ជាក់ថា ក្រុមគ្រួសារទាំងមូលស្ថិតក្នុងភាពអស់សង្ឃឹម ខណៈបង្គោលគ្រួសារតែ១ ជីវិតកំពុងតែប្រឈម។

តាមឿក ៖ លោកតា គឺជាសិល្បករមានវ័យចំណាស់ជាងគេក្នុងចំណោមសិល្បករជើងចាស់ទាំង៥នាក់ដែលកំពុងជាន់សង្គ្រប់ដោយជំងឺ។ មកដល់ឆ្នាំនេះលោក ផ្លុង មឿក ហៅ តាមឿក មានវ័យ ៨៣ឆ្នាំ លោកបានធ្លាក់ខ្លួនឈឺជាច្រើនឆ្នាំមកហើយ។ ដោយសារវ័យជរា លោករុករានដោយជំងឺពីមុខ គឺរលាកសួត និងស្វិតខួរក្បាល។ ជំងឺទាំងពីរសុទ្ធតែកម្រិតធ្ងន់ធ្ងរ ដែលក្រុមគ្រួសារប្រាប់សារព័ត៌មាន លោកតា កាន់តែដុនដាបទៅៗ សម្រាន្តតែនៅលើកន្ទេល និងមិនអាចក្រោកបានឡើយនៅលើផ្ទះជួល ជាន់ទី២ នៅក្បែរវត្តស្វាយពពែ ទល់មុខផ្សារទំនើបអ៊ីអន២ រាជធានីភ្នំពេញ។

លោក ប្រាក់ សារួន ៖ ត្បិតថាមានវ័យក្មេងជាងគេ ប៉ុន្តែលោក ប្រាក់ សារួន ដែលគេស្គាល់ថាជាតារាសម្ដែងជើងចាស់មួយរូប ត្រូវក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យក្នុងស្រុកមួយកាលពីពាក់កណ្ដាលខែនេះ ក្នុងនោះលោក មានជំងឺថ្លើមកម្រិតធ្ងន់ធ្ងរ និងគ្រោះថង់ប្រមាត់។ ជំងឺទាំងពីរសុទ្ធកម្រិតធ្ងន់ធ្ងរ និងត្រូវការវះកាត់ ដោយចំណាយប្រាក់យ៉ាងច្រើន ប៉ុន្តែក្រុមគ្រួសារមិនមានលទ្ធភាពឡើយ។

សាន ម៉ៅ ៖ លោក សាន ម៉ៅ គឺជាសិល្បករជើងចាស់ចុងក្រោយគេ ដែលទើបធ្លាយដំណឹងធ្លាក់ខ្លួនឈឺធ្ងន់ ហើយត្រូវក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ។ តារាកំប្លែងក្នុងក្រុមនាយ កុយ មានជំងឺជាច្រើនមុខ ក្នុងនោះមាន ជំងឺទឹកដក់ក្នុងសួត បេះដូង និងជំងឺទឹកនោមផ្អែមផង។ជំងឺទាំងប៉ុន្មានមុខខាងលើ ក៏ធ្លាប់បានរុករានតារាកំប្លែងរហូតដល់ក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យម្ដងរួចមកហើយកាលពីដើមឆ្នាំ ២០១៨៕