- 2020-09-29 10:12:09
- ចម្រៀង
បទចម្រៀងចេញតែ៣សប្ដាហ៍ អ្នកស្ដាប់ភ្លូកទឹកភ្លូកដី ប្រិយមិត្តថា ពេជ្រ ថាណា ឡើងល្បីទៀតហើយ!
- 2020-09-29 10:12:09
- ចំនួនមតិ 0 | ចំនួនចែករំលែក 0
បទចម្រៀងចេញតែ៣សប្ដាហ៍ អ្នកស្ដាប់ភ្លូកទឹកភ្លូកដី ប្រិយមិត្តថា ពេជ្រ ថាណា ឡើងល្បីទៀតហើយ!
ចន្លោះមិនឃើញ
ពេជ្រ ថាណា បានសាងកេរ្តិ៍ឈ្មោះតាមរយៈបទចម្រៀងជាច្រើននៅក្នុងផលិតកម្ម Town តែមួយរយៈចុងក្រោយក៏ថមថយបន្តិចទៅវិញ មុនពេលមកផ្ទុះជាថ្មីតាមរយៈបទចម្រៀងថ្មីមួយបទទើបចេញបាន២សប្ដាហ៍ប៉ុណ្ណោះ តែមានអ្នកចូលទៅទស្សនា និងស្ដាប់ជាង ១លានដងនៅលើ Youtube Channel ផលិតកម្មថោន។
បទចម្រៀងថ្មីរបស់លោក ពេជ្រ ថាណា នេះមានចំណងជើងថា "ក្រមុំរើសខ្យង" ជាចង្វាក់ប្រពៃណីដែល Town បានបញ្ចេញជាពិសេសដើម្បីអបអរបុណ្យភ្ជុំបិណ្ឌប្រពៃណីជាតិទើបនឹងកន្លងផុតថ្មីៗនេះ។ តាមតួលេខគិតមកដល់រសៀលថ្ងៃទី ២១ កញ្ញា ២០២០នេះ វីដេអូសំឡេង(Video Audio)នេះ មានអ្នកចុចស្ដាប់ជាង ១លានដងរួចហើយ ចាប់តាំងពីថ្ងៃចេញផ្សាយដំបូងលើយូធូប កាលពីថ្ងៃទី ៣ កញ្ញា។
តួលេខនេះ គឺជាចំនួនដ៏ខ្ពស់បំផុតមួយនៅក្នុងផលិតកម្មថោន ក្នុងរយៈពេលដូចគ្នាធៀបនឹងបទចម្រៀងដទៃទៀត ខណៈប្រិយមិត្តអ្នកគាំទ្ររបស់លោកជាច្រើន បានភ្លាត់មាត់ថា idol របស់ពួកគេបានកម្រើកទីផ្សារជាថ្មីទៀតហើយតាមរយៈបទចម្រៀងនេះ។ ប្រិយមិត្តខ្លះរបស់តារាចម្រៀង បានលាន់មាត់ថា រូបគេពិតជានឹកស្មានមិនដល់ទាល់តែសោះ ថាវីដេអូសំឡេងរបស់ ថាណា ទទួលបានការចុចចូលស្ដាប់ច្រើនដល់ម្លឹង។
ប្រិយមិត្តខ្លះទៀតក៏បានលើកឡើងថា បទនេះល្បីហើយ ព្រោះអំឡុងពេលពិធីបុណ្យភ្ជុំបិណ្ឌកន្លងទៅនេះ ទៅទីកន្លែងណា រូបគេបានលឺតែគេចាក់បទចម្រៀងមួយបទនេះហូរហែ។ ក្រៅពីលើកសរសើរដល់តារាចម្រៀង ប្រិយមិត្តខ្លះក៏បានលើកសរសើរពីបទចម្រៀងថា មានន័យ មានខ្លឹមសារល្អ ហើយអ្នកខ្លះ ក៏សរសើរចំៗចំពោះផលិតកម្មថា ធ្វើបានល្អសម្រាប់បទចម្រៀងមួយបទនេះ។
ពួកគេលើកឡើងថា ថោន ធ្វើបានល្អទាំងអត្ថន័យ និងខ្លឹមសារ ឯបទភ្លេងទៀតសោត ក៏រឹតតែល្អ ពោលគឺបានលឺភ្លេងហើយ ចង់តែឡើងរាំតែម្ដង។ ជុំវិញការលើកសរសើររបស់ក្រុមអ្នកគាំទ្ររបស់ខ្លួន ផលិតកម្ម ថោន នៅរក្សាភាពស្ងៀមស្ងាត់ធម្មតា ប៉ុន្តែសាមីខ្លួនតារាចម្រៀងនៅមិនសុខឡើយ។
លោក ពេជ្រ ថាណា បានចូលទៅសរសេរសារឆ្លើយតបទៅប្រិយមិត្តរបស់លោកនៅលើបណ្ដាញយូធូប ដោយក្នុងនោះលោកសូមថ្លែងអំណរគុណចំពោះការគាំទ្រទាំងអស់របស់ប្រិយមិត្ត។ ដូច្នេះ លោកមានតែម្រាមដៃដប់ លើកឡើងជូនពរពុកម៉ែបងប្អូនមានសុខភាពល្អគ្រប់ៗគ្នា មានតែជ័យជំនះ ជោគជ័យគ្រប់ភារកិច្ចទាំងអស់ និងជៀសផុតពីជំងឺកូវីត១៩។
ក្រោយផ្ទុះជាមួយវីដេអូ Audio ថោន ទើបនឹងបញ្ចេញវីដេអូចម្រៀងពេញលេញប៉ុន្មានថ្ងៃមុនបុណ្យភ្ជុំបិណ្ឌប៉ុណ្ណោះ ទទួលបានការគាំទ្រច្រើនដូចគ្នា។ លោក ពេជ្រ ថាណា តាំងពីបានមកចូលរួមជាមួយផលិតកម្មថោនមក លោកធ្លាប់សាងកេរ្តិ៍ឈ្មោះខ្លាំងតាមរយៈ បទជាច្រើនដូចជា "បង្គាប់១ម៉ឺន" “មានប្រពន្ធល្អមិនចេះថែ" “ដឹងទេថាខ្ញុំយំ" “ស្ដាប់ចម្រៀងអូន បងហូរទឹកភ្នែក" និងបទ "មនុស្សបែកគ្នាហើយ មិនជួបគ្នាវិញទេ" ជាដើម៕
