- 2021-03-16 01:07:41
- ព័ត៌មាន
ចេញពីសិល្បៈដំបូង ទៅលក់ម្ជូរ ឥឡូវក្លាយជាថៅកែជំនួញតម្លៃជាងកន្លះលានដុល្លារ
- 2021-03-16 01:07:41
- ចំនួនមតិ 0 | ចំនួនចែករំលែក 0
ចេញពីសិល្បៈដំបូង ទៅលក់ម្ជូរ ឥឡូវក្លាយជាថៅកែជំនួញតម្លៃជាងកន្លះលានដុល្លារ
ចន្លោះមិនឃើញ
តារាសម្ដែង អេន យ៉ាដាវ ឬ Madam Ly បានបាត់មុខពីសិល្បៈខ្ទង់ជិត១០ឆ្នាំទៅហើយ ដោយក្នុងវេលានោះ នាងបានប្រឡូកជំនួញជាច្រើន ចាប់តាំងពីលក់ម្ជូរក្នុងទីតាំងតូចមួយនៅម្ដុំផ្សារស៊ីលិប រហូតដល់បច្ចុប្បន្ននាងបានក្លាយជាថៅកែក្រុមហ៊ុនមានតម្លៃជាងកន្លះលានដុល្លារអាមេរិកឯណោះ។
តាមការបញ្ជាក់របស់សាមីខ្លួន តារាសម្ដែងសាច់សខ្ចី បានសម្រេចផ្អាកការងារសិល្បៈទាំងម៉ូដែល និងសម្ដែង អំឡុងឆ្នាំ ២០១៣។ ក្រោយមកនាង ក៏បានជួបជាមួយគូស្នេហ៍ដែលជាអ្នកជំនួញមួយរូប ដែលនាំឲ្យនាងចេះរកស៊ីដែរ។ ដំបូងបំផុត គឺ យ៉ាដាវ បានលក់គ្រឿងម្ជូរនៅម្ដុំផ្សារស៊ីលិប ហើយជាមួយគ្នាតារាស្រី ក៏បានរកស៊ីផ្សេងទៀតដែរ ដូចជា លក់ឡេ និងគ្រឿងកាឡៃជាដើម។
របរទាំងនោះ ត្បិតថាមើលទៅមិនសូវធំដុំ ប៉ុន្តែបានផ្លែផ្កាច្រើនគួរសម រហូតដល់នាងអាចសន្សំបានប្រាក់មួយចំនួនបូកផ្សំប្រាក់បានពីជំនួញរបស់គូស្នេហ៍ផង យ៉ាដាវ មានលទ្ធភាពទិញផ្ទះមួយកន្លែងនៅក្នុងបុរីប៉េងហួត។ ហើយចុងក្រោយ នាងបានមានលទ្ធភាពឈានទៅបើកក្រុមហ៊ុនធំមួយដែលមានឈ្មោះថា "កំពូលម៉ូត" កាលពីប្រមាណ ២ឆ្នាំជាងមុន។
ក្រុមហ៊ុនរបស់ថៅកែស្រី មានលក់ និងចែកចាយទំនិញជាច្រើន ដូចជា៖ គ្រឿងអលង្ការ គ្រឿងសង្ហារិម ឡេលាបស្បែក និងផលិតផលសម្រាប់ស្ត្រីជាច្រើនទៀត។ យ៉ាងណា ក្នុងចំណោមនេះ បើតាមការបញ្ជាក់របស់ Madam Ly នាងបាន និងកំពុងជោគជ័យខ្លាំងជាមួយនឹងផលិតផលថែរក្សាសម្ផស្ស "JJ សស្អាត"។
ដោយសារបែបនេះ តារាស្រីដែលមានសម្រស់ស្បែកស្អាតតាំងពីប្រឡូកសិល្បៈ នៅតែមានសាច់ស្អាតបើទោះបច្ចុប្បន្នមានកូនដល់ទៅ ៤នាក់ទៅហើយក្ដី។ យ៉ាដាវ លើកឡើងថា ក្រោយចាកចេញជិត ១០ឆ្នាំ នាងក៏មានការនឹករលឹកការងារសិល្បៈណាស់ដែរ ប៉ុន្តែនៅពេលនេះ នាងមិនទាន់អាចលៃពេលបាននោះទេ ដោយសារតែអាជីវកម្មកំពុងមមាញឹក។
ប៉ុន្តែក្រោយពីអ្វីៗបានដំណើរស្រួលហើយ នាងនឹងងាកទៅរកការងារសិល្បៈខ្លះឡើងវិញ។ "ខ្ញុំមិនចោលទេសិល្បៈ តែបើឲ្យទៅសម្ដែង បែបមិនទេ យ៉ាងចាស់ហើយ គេមិនយកយើងសម្ដែងទេ បើខ្ញុំទៅវិញ គឺខ្ញុំចង់បើកផលិតកម្មមួយ តែចាំអាជីវកម្មជោគជ័យខ្លាំង ហើយកូនរាងធំៗបន្តិចសិន!” Madam Ly ថ្លែង៕
