- 2021-10-04 03:33:00
- ព័ត៌មាន
សែនស្រណោះ ជំងឺស៊ីគ្រឿងក្នុង ត្រឹម១សប្ដាហ៍ ឆក់យកជីវិតសិល្បករខ្មែរ២នាក់ គួរឲ្យសោកស្ដាយ
- 2021-10-04 03:33:00
- ចំនួនមតិ 0 | ចំនួនចែករំលែក 0
សែនស្រណោះ ជំងឺស៊ីគ្រឿងក្នុង ត្រឹម១សប្ដាហ៍ ឆក់យកជីវិតសិល្បករខ្មែរ២នាក់ គួរឲ្យសោកស្ដាយ
ចន្លោះមិនឃើញ
វិស័យសិល្បៈខ្មែរជួបរឿង តក់ស្លុតផ្ទួនៗគ្នា ដោយនៅក្នុងសប្ដាហ៍កន្លងទៅនេះ បានបាត់បង់ធនធានសិល្បៈដល់ទៅ ២រូប ដោយសាររោគចង្រៃបៀតបៀន គួរឲ្យសោកស្ដាយ។
១.សិល្បករទី១ គឺលោក សែម សង្វាត អតីតតារាចម្រៀងពេញនិយមមួយរូបកាលពីជិត ២០ឆ្នាំមុន។ តារាចម្រៀងដែលសណ្ដុំវិញ្ញាណរបស់អ្នកស្ដាប់តាមរយៈសំនៀងស្រទន់ ផ្អែម បានសាងកេរ្តិ៍ឈ្មោះតាមរយៈជាច្រើនដូចជាបទ "រាជិនីដួងចិត្ត" “ស្នេហ៍តែអូន" និងបទ "កម្មករឆ្លងដែន" ជាដើម។ ប៉ុន្តែលោកបានបាត់ខ្លួនជាច្រើនឆ្នាំ មុនពេលលេចមុខវិញនៅប្រមាណជាង ១ឆ្នាំមុនជារូបរាងស្គមកំប្រឹង។
តាមព័ត៌មាន មានជំងឺរុករានច្រើនមុខក្នុងរាងកាយដ៏តូចស្ដើងរបស់លោក ដូចជាជំងឺ រលាកក្រពះ រលាកពោះវៀន និងពិសេសជំងឺថ្លើម ដែលតាមក្រុមគ្រួសារ លោកបានតស៊ូនឹងជំងឺទាំងនេះជាច្រើនឆ្នាំមកហើយ។ លោក សែម សង្វាត បានលេចដំណឹងចូលសង្គ្រោះបន្ទាន់កាលពីថ្ងៃទី ៣០ កញ្ញា។ ប៉ុន្តែនៅយប់ថ្ងៃទី ១ តុលា លោកបានលាពួកយើងទាំងអស់គ្នាទៅហើយក្នុងវ័យ ៤៨ឆ្នាំ។
២.លោក ហង្ស បូរិន ហៅ ហង្ស អច្ឆរិយា៖ សិល្បករផ្នែកសម្ដែង និងជាអ្នកនិពន្ធសៀវភៅម្នាក់បានបាត់បង់ជីវិតនៅថ្ងៃម្សិលមិញនេះ ដែលបានធ្វើឲ្យសិល្បករជាច្រើនសោកស្ដាយគ្រប់គ្នា។ លោក ម៉ា ច័ន្ទបញ្ញា បានលើកឡើងថា លោកពិតជាមិនចង់ជឿថារឿងនេះកើតឡើងលើសិល្បកររូបនេះ។ លោកថា ហង្ស អច្ឆិយា មានសុបិនជាច្រើន និងជាសិល្បករមានទេពកោសល្យម្នាក់។
លោកថា លោកធ្លាប់មានក្ដីស្រមៃ ចង់យករឿងដែលនិពន្ធដោយលោក ហង្ស អច្ឆរិយា មកថតចេញជាភាពយន្ត ប៉ុន្តែអ្វីត្រូវបានបញ្ចប់ត្រឹមពេលនេះ គួរឲ្យសោកស្ដាយ និងអាឡោះអាល័យ។ "ធ្លាប់មានក្ដីស្រមៃមួយយករឿងគាត់ ធ្វេីការជាមួយគាត់ ថតកុន តែពេលនេះ បងទៅចោលខ្ញុំហេីយ!។
មរណភាពរបស់សិល្បកររូបនេះ នាំឲ្យមានការហួសចិត្តគ្រប់គ្នា ដោយសារថា គេឃើញលោកមានសកម្មភាពលើបណ្ដាញសង្គមប្រាប់ពីអាការរបស់លោកស្ទើររាល់ថ្ងៃ។តាមការប្រាប់ហូរហែកន្លងមកនោះ បានឲ្យដឹងថា លោក ហង្ស អច្ឆរិយា មានជំងឺរលាកក្រពះ និងពោះវៀនរុំារ៉ៃ។ ប៉ុន្តែចុងក្រោយនេះលោកបានប្រាប់ទៀតថា បានធូរស្រាលហើយ ហើយពេទ្យបានអនុញ្ញាតិឲ្យយកថ្នាំមកព្យាបាលនៅផ្ទះ។ ស្រាប់តែមិនបានប៉ុន្មានថ្ងៃផង ក៏មានដំណឹងថា លោកបាត់បង់ជីវិតទៅហើយ។
ចំណុចនេះហើយ ដែលធ្វើឲ្យមិត្តរួមអាជីព និងអ្នកស្គាល់ជាច្រើនមិនអស់ចិត្ត និងចង់ជឿ ហេតុអ្វីក៏ស្ថានភាពជំងឺផ្លាស់ប្ដូរលឿនបែបនេះ។ ប៉ុន្តែតាមប្រភពមួយផ្សេងទៀត ពីឈ្មោះ ហង្ស ពិទូ ដែលប្រាប់ថាជាប្អូនបង្កើតនឹងអ្នកស្លាប់ បានឲ្យដឹងថា លោក ហង្ស អច្ឆរិយា បានឆ្លងកូវីដ១៩ ទើបបណ្ដាលឲ្យស្ថានភាពទៅជាអាក្រក់យ៉ាងនេះ៕