តារាសម្ដែងស្រី ឈឹម អារីយ៉ា ដែលបាត់មុខពីសិល្បៈច្រើនឆ្នាំមកហើយនោះ គ្រោងចាប់អាជីពរបស់ខ្លួនឡើងវិញ បន្ទាប់ពីមានក្រុមហ៊ុន និងផលិតកម្មមួយចំនួនទាក់ទងនាងដើម្បីថតរឿង និងស្ពតពាណិជ្ជកម្ម ប៉ុន្ដែនាងថា ការលេងពណ៌សក់ និងទុកសក់វែងប្រាស្មា អាចលែងជាក្ដីប្រាថ្នារបស់នាងទៀត។

អ្នកនាង ឈឹម អារីយ៉ា បានប្រាប់Sabay នៅថ្ងៃទី២៣ ខែវិច្ឆិកា នេះ ថា ចាប់តាំងពីធំដឹងក្ដី រហូតដល់ក្លាយជាតារាសម្ដែងរាប់ឆ្នាំទៀត រូបនាងតែងតែទុកលក់វែង និងលាបពណ៌សក់ ប៉ុន្ដែក្រោយពីនាងកោរសក់បួសមុខភ្លើងស្វាមី និងម្ដាយក្មេកស្លាប់ដោយសារជំងឺកូវីដ-១៩ កន្លងទៅ បានធ្វើឲ្យនាងមានអារម្មណ៍ប្លែក គឺទុកសក់ខ្លីស្រួលដោយពុំមានហេតុផលណាផ្សេងនោះទេ។

ឈឹម អារីយ៉ា៖”អត់មានអីទេបង! គ្រាន់តែថាដល់យើងទុកលក់ខ្លីអីចឹងស្រួល យើងក៏ទុកទៅ ហើយតាំងពីស្វាមីខ្ញុំស្លាប់ដល់ឥឡូវខ្ញុំកាត់រហូត…និយាយទៅឥឡូវខ្ញុំចង់ទុកសក់ខ្លីហ្មង។ ខ្ញុំអត់ដែលកាត់សក់ខ្លីសោះតាំងពីកើតមក ទើបតែលើកទី១”។

ទន្ទឹមនឹងមានគម្រោងចូលប្រឡូកក្នុងវិស័យសិល្បៈឡើងវិញទាំងទុកសក់នៅខ្លីបែបនេះ អ្នកនាង ឈឹម អារីយ៉ា ក៏អះអាងថា នាងអាចរៀបចំចូលសិល្បៈពេលណាក៏បាន ដោយកូនតូចរបស់នាងមានម៉ែដោះ និងមីងៗរបស់គេមើលថែហើយ។ ប៉ុន្ដែអ្វីដែលនាងនៅអល់អែកនោះ គឺនៅបារម្ភខ្លាចជំងឺកូវីដ-១៩ ផ្ទុះឡើងជាថ្មីទៀត ទើបនាងពន្យារពេលទទួលការថតមួយរយៈទៀតសិន៕