អ្នកជំនាញធ្វើម៉ូដសក់ដ៏ល្បី​ម្នាក់មាន​ឈ្មោះថា Park Naeju បាន​ទម្លាយរឿងជា​ច្រើន​ពីការងារដែល​ខ្លួន​បាន​ធ្វើជាមួយនឹង​តារាល្បីៗ រួមមាន Baekhyun ជាដើម។

និយាយក្នុងវីដេអូបង្ហោះលើ YouTube អ្នកជំនាញ​រូបនេះ​បាន​លើកសរសើរចំៗ ចំពោះអត្តចរិតបែបគិតគូររបស់ Baekhyun ដែល​មាន​ចំពោះមនុស្សជុំវិញខ្លួន ពិសេសក្រុមការងារ។ លោកបាន​ឲ្យដឹង​ថា​ មានម្ដងនោះ Baekhyun ហ៊ាន​ដល់ថ្នាក់ចំណាយលុយផ្ទាល់ខ្លួន ទិញសំបុត្រយន្តហោះលំដាប់ Business Class សម្រាប់​ក្រុមការងារទៀតផង។

ពេល​ដែល​ត្រូវធ្វើដំណើរទៅក្រៅប្រទេស ជាទូទៅ តារាៗតែងធ្វើដំណើរតាម​ជើងហោះហើរ Business Class ស្របពេល​ក្រុមការងារបានជិះត្រឹម Economy Class ទេ។ ដូច្នេះ​ Baekhyun ក៏សម្រេច​យកលុយពីហោប៉ៅផ្ទាល់ ទិញសំបុត្រយន្តហោះថ្លៃសម្រាប់ក្រុមការងារដោយមិនគិតអ្វីច្រើន។

ប៉ុន្តែទោះជា​យ៉ាង​ណា​ គួរឲ្យស្ដាយ​ រាល់ការងារ​នៅក្រៅប្រទេសពេល​នោះ​ត្រូវ​បាន​រំសាយ​ចោល ហេតុនេះ​ទើបក្រុមការងារ​មិនបានជិះជើងហោះហើរថ្លៃ ដែល​ Baekhyun ខំ​កក់សំបុត្រឲ្យនោះ។

ជាទីបញ្ចប់​លោក Park Naeju បាន​លើកម្ដងទៀតថា តារាប្រុស​រូបនេះ​ពិតជា​ចិត្តល្អខ្លាំង និង​តែង​តែ​ផ្អែមល្ហែម​ដាក់គេ​ឯងជានិច្ច ចំណែក​ក្រុមការងារវិញ ពិតជាធ្វើការជាមួយទាំងកក់ក្ដៅបំផុត៕