អ្នកច្នៃម៉ូដ និងជាជាងគំនូរល្បីឈ្មោះម្នាក់ គឺលោក ឯម រៀម ថាលោកមានសិល្បៈក្នុងការស្លៀកពាក់ទាំងនៅផ្ទះ និងចេញទៅកម្មវិធីនានា។ ការបញ្ជាក់របៀបស្លៀកពាក់នេះ គឺបន្ទាប់ពីលោកតែងខ្លួនកាន់តែប្លែកពីគេឯង រហូតដល់អ្នកចូលរួមក្នុងកម្មវិធីជាមួយលោកខ្លះលាន់មាត់ ហើយអៀនជំនួសលោក។

លោក ឯម រៀម បានប្រាប់ Sabay ក្នុងឱកាសដែលលោកចូលរួមក្នុងកម្មវិធីសម្ពោធខ្សែភាពយន្ដមួយនៅផ្សារទំនើបមីតថោនកាលពីពេលថ្មីៗនេះថា លោកពុំមានអារម្មណ៍អៀនខ្មាសអ្វីទាល់តែសោះចំពោះការស្លៀកពាក់ និងការតែងខ្លួនរាល់ថ្ងៃនេះ ផ្ទុយទៅវិញគឺលោកសប្បាយចិត្ដដែលមានគេឯងមើលមកកាន់លោកច្រើន។

ឯម រៀម៖ “យើងអត់មានអារម្មណ៍អៀនអីទេ បើអៀនបម្រើអារម្មណ៍ប្រិយមិត្ដយើងម៉េចកើត? បើនិយាយទៅវាជាចំណុចមួយដែលបងចូលចិត្ដប្លែក អីចឹងការរៀបចំខ្លួនប្លែកៗហ្នឹងវាអត់មានអីចម្លែកសម្រាប់បងទេ ហើយយើងចង់បង្ហាញថាការតែងខ្លួន ឬការដើរម៉ូដស្អីអស់ហ្នឹង វាគឺជាសិល្បៈ”។

ទន្ទឹមគ្នានេះក៏មានប្រិយមិត្ដ ជាពិសេសអ្នកគាំទ្រតារាប្រុសវ័យ៥២ឆ្នាំរូបនេះ ងឿងឆ្ងល់ថាតើការស្លៀកពាក់របស់លោកពេលនៅផ្ទះយ៉ាងណាដែរ? លោកបញ្ជាក់យ៉ាងខ្លីថា ការស្លៀកពាក់នៅផ្ទះ គឺដូចជាមនុស្សទៅទៅដែរ ប៉ុន្ដែសម្រាប់ចេញកម្មវិធីសិល្បៈផ្សេងៗ លោកត្រូវអង្គុយរកនឹកជាមុន ដើម្បីច្នៃម៉ូដអ្វីប្លែកសម្រាប់ខ្លួនឯងជានិច្ច។ លោកនិយមពាក់អាវ ឬរ៉ូប ជាមួយស្បែកជើងកែងខ្ពស់ៗ របៀបជានារីសិចស៊ី បើទោះបីជាសប្បុរ និងទម្រង់មុខលោក មិនស្រដៀងស្រីក៏ដោយចុះ។

បើតាមលោក ឯម រៀម អាជីពច្នៃម៉ូដ និងជាងគំនូរ ត្រូវបានលោកចាប់យកតាំងពីឆ្នាំ១៩៩៧ ហើយបច្ចុប្បន្នលោកមានការងារច្នៃម៉ូដសម្រាប់ការថតសម្ដែងរបស់តារាចម្រៀង និងសម្ដែងល្បីៗជាច្រើន។ ឆ្លងកាត់អាជីពនេះកាន់តែយូរ ធ្វើឲ្យលោកស្រឡាញ់ការស្លៀកពាក់ប្លែកៗកាន់តែខ្លាំង បើទោះបីជាអ្នកខ្លះមិនសូវពេញចិត្ដនឹងការស្លៀកពាក់របស់លោក ប៉ុន្ដែលោកយល់ថាអ្នកមានឈាមជ័រសិល្បៈ ជាពិសេសអ្នកស្រឡាញ់គាំទ្រខាងច្នៃម៉ូដច្បាស់ជាយល់តម្លៃ នៃការស្លៀកពាក់ប្លែកៗរបស់លោក៕