កាលពីថ្ងៃទី ០២ ខែវិច្ឆិកា ឆ្នាំ២០២២ គឺជាថ្ងៃខួបកំណើត គម្រប់ ២ខួប របស់ វណ្ណរ៉ា រីអ៊ែលលី កូនស្រីពៅរបស់អ្នកនាង ផន សុផារី និងជាចៅស្រីរបស់ ម្ចាស់រោងល្ខោនដ៏ល្បី ភី សុគន្ធី។

ស្ថិតក្នុង​ថ្ងៃពិសេស និងមាន​ន័យនេះ​ដែរ មានការចូលរួមពីសំណាក់ភ្ញៀវកិត្តិយសជា​ច្រើន ដែលញ៉ាំងកម្មវិធី​កាន់តែមានភាព​សប្បាយរីករាយថែមមួយកម្រិត។ ពេល​ឈាន​ដល់ពេល​ដែល​ត្រូវជូនពរចៅស្រី ក្នុងថ្ងៃពិសេស​នេះ លោកស្រី សុគន្ធី ដែល​ជាជីដូនខាងម្ដាយ ក៏បាន​បង្ហើបពាក្យដ៏សែនមាន​ន័យ និងស្ដាប់ហើយមានក្ដីសុខបំផុត ហើយជាពាក្យដែល​កូនស្រីគ្រប់រូបប្រាថ្នាឲ្យក្លាយជា​ការពិតដែរ។

ក្រៅពីជូនពរ ចៅឲ្យមានតែក្ដីសុខក្នុងជីវិត លោកស្រី​បាន​បន្ថែមពាក្យមួយចំនួន ដែលស្ដាប់ហើយរំភើបបំផុតនោះគឺ ៖ «...ជាពិសេស យាយសូមជូនពរចៅ ឲ្យជួបគូគ្រងដែលល្អ នៅពេល​ដែលចៅដល់វ័យ ពេលដែលត្រូវមានគូគ្រង! កើតមកជាស្រី បើមានគូគ្រងល្អ ចៅមានសំណាងពេញមួយជីវិត បើចៅរើសគូគ្រងមិនល្អ ទឹកភ្នែកជូតក្បាលជង្គង់! ចៅរបស់យាយទាំង ២ សូមឲ្យសំណាងល្អ ជួបបុរសល្អ ស្មោះស ណាចៅណា៎...រៀនសូត្រឲ្យពូកែ ក្មេងល្អក្នុងសង្គម ស្ដាប់ម៉ាក់ ស្ដាប់ប៉ា ចម្រុងចម្រើនម៉ាក់ប៉ា...»។

ប៊ែលឡា និង អ៊ែលលី ត្រូវបាន​គេ​ស្គាល់ច្បាស់ថាជា កូនតូចរបស់ អ្នកនាង ផន សុផារី ដែល​មាន​ភាព​វៃឆ្លាត និងសុទ្ធតែជា​ក្មេង​ស្រីគួរឲ្យស្រឡាញ់។ តាមរយៈវីដេអូដែល​ម្ដាយរបស់ពួកគេ​បាន​ថត និង​បង្ហាញ​កន្លងមក បាន​ធ្វើឲ្យពួកគេ​ក្លាយជា​កុមារីដែលទទួល​បាន​ការ​ស្រឡាញ់ចូលចិត្ត និងគាំទ្រជា​ច្រើន ពីសំណាក់មហាជន​មិនថា ក្នុង ឬក្រៅប្រទេស។