តារាក្បាច់គុណ សុខ ដែន ចង់និមន្ត ព្រះសង្ឃ ទស្សនាស្នាដៃដំបូងខ្លួននៅរោងកុនទំនើប

2017-03-13 03:16:15
ភាពយន្ត

2017-03-13 03:16:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តរឿង"លត់ដែកថែប" ដែលជាស្នាដៃដឹកនាំដំបូងរបស់ តារាក្បាច់គុណ លោក សុខ ដែន នឹងចាក់បញ្ចាំងនៅថ្ងៃ៣០ ខែ មិនា ឆ្នាំ ២០១៦ខាងមុខនេះ។ បន្ទាប់ពីចំណាយពេលផលិតជាច្រើនខែមក តារារូបនេះថ្លែងថា ខ្លួនមានបំណងចង់និមន្តព្រះសង្ឃច្រើនអង្គ ទៅទស្សនាភាពយន្តរបស់ខ្លួនដោយមិនគិតប្រាក់ ត្បិតអីលោកធ្លាប់ជាអតីតកូនសិស្សព្រះសង្ឃកន្លងមក។

ព្រះសង្ឃដែលជាគោលដៅ របស់លោក សុខ ដែន គ្រោងនិមន្តទៅទស្សនាភាពយន្តនោះ មានវត្តចំនួន២ គឺវត្ត លង្ការ និង វត្ត មហាមន្ត្រី ព្រោះកន្លងមក លោកធ្លាប់ស្នាក់អាស្រ័យនៅវត្តទាំង២នេះ ។ តារាល្បីខាងទាត់ធាក់រូបនេះលើកឡើងថា ខ្លួនមិនថា ខាងរោងកុន អនុញ្ញាតឲ្យព្រះសង្ឃចូលទស្សនាឬយ៉ាងណានោះឡើយ ហើយចំពោះផ្នែកព្រះពុទ្ធសាសនាវិញ មិនដឹងថា ការទៅទស្សនាភាពយន្តក្នុងរោងកុន ខុសវិន័យឬអត់នោះ ឡើយ។

សុខ ដែនបានបន្ថែមថា ប្រសិនបើមិនបានទៅទស្សនានៅរោងភាពយន្តទំនើបនោះទេ លោកនៅតែប្ដេជ្ញាថា និងយកភាពយន្តរឿង"លត់ដែកថែប"នេះ ទៅចាក់នៅកុដិលោក បន្ទាប់ពីចាក់បញ្ចាំងតាមរោងភាពយន្តរួច។ លោកបានបញ្ជាក់ថា ភាពយន្តរបស់លោកមិនមានឈុតអាសអាភាសឡើយ ពោលវាគឺជាភាពយន្តបែប វាយតប់ ការសងសឹក ល្បិចកល និង មានឈុតស្នេហ៍តិចតួចប៉ុណ្ណោះ ប្រសិនបើព្រះសង្ឃបានទស្សនា ប្រហែលជាមិនប៉ះពាល់ ពុទ្ធវិន័យឡើយ។

រឿង"លត់ដែកថែប" និពន្ធឡើយដោយ លោក ពិន ណារិន ផលិតឡើយជ្រោកក្រោមផលិតកម្មEYE LOVE FILM ។ ដើមទុននៃការផលិតមានបងធម៌របស់លោកម្នាក់ជាអ្នកនៅពីក្រោយខ្នង ចំណែកលោក សុខ ដែន គឺជាអ្នកដឹកនាំសម្ដែង និង ជាតួឯកក្នុងភាគយន្តនេះតែ ម្ដង។

ការចំណាយផលិតភាពយន្តនេះឡើង ប្រហែលជាង៣ម៉ឺនដុល្លារ តារាសម្ដែងនៅក្នុងភាពយន្តនេះ មានដូចជា លោក គន់ តារាវណ្ណ លោក ចៅ ចាន់ដារី លោក សុវណ្ណគីរី កញ្ញា សំ ថារដ្ឋ កញ្ញា នីឡា នាយ ចឺម នាយ ឆើត លោក ថាត់ យុទ្ធ និងតារាសំខាន់ជាច្រើនរូបទៀត។

ទស្សនា Trailer ភាពយន្តរឿង"លត់ដែកថែប" ដែលជាស្នាដៃដំបូងរបស់លោកទាំងអស់គ្នា៖

អត្ថបទ៖ ស៊ុនហ៊ួត