កែវ ពេជ្រពិសី រក្សាតម្លៃខ្លួនថេរ ទោះទីផ្សារសិល្បៈស្ងប់ស្ងាត់
ទន្ទឹមនឹងទីផ្សារការងារសិល្បៈរបស់ កែវ ពេជ្រពិសី មិនសូវមមាញឹក នាងប្រាប់ថា តម្លៃខ្លួនទីផ្សារនាងរក្សានៅដដែលមិនមានការឡើងចុះឡើយ។
កែវ ពេជ្រពិសី បន្តឲ្យដឹងទៀតថា តម្លៃខ្លួនក្នុងវិស័យសិល្បៈ មិនអាចចេះតែឡើង ឬទាមទារហួសកម្រិតបានឡើយ ព្រោះថាទីផ្សារក្នុងស្រុក នៅមានកម្រិត។ ម្យ៉ាងទៀតផលិតកម្មមួយចំនួនកំពុងប្រឈមនឹងការបិទទ្វារផងដែរ។ ជាមួយគ្នានេះ នាងលើកឡើងថា ប្រហែលជាផលិតករមួយចំនួនគិតថា នាងផ្ដាច់មុខឲ្យបាយ័ន ទើបទីផ្សារផ្នែកភាពយន្តរបស់នាងស្ងប់ស្ងាត់ឈឹងតែម្តង។
ពិសីថ្លែងក្នុងឱកាសមង្គលការប្អូនស្រី ចនច័ន្ទ លក្ខិណា៖ "រាល់ឆ្នាំបងមានមួយរឿង ពីររឿងសម្រាប់ចាក់ផ្សាយដែរ ប៉ុន្តែដោយសារឆ្នាំនេះនៅសល់រឿងមួយកាលពីឆ្នាំចាស់ហើយទើបចាក់បញ្ចាំងចប់នៅបាយ័ន។ ម្យ៉ាងការថតរឿង បងដូចរាងស្ងាត់ បងយល់ថាប្រហែលបងៗខាងផលិតករ គិតថាបងផ្ដាច់មុខឲ្យបាយ័នហើយ"។
យ៉ាងណាមិញ អតីតជយលាភីផ្នែកញញឹមស្រស់របស់កម្មវិធីអាណាចក្រតារា អះអាងថា នាងមិនបានជាប់កុងត្រាជាមួយបាយ័នទេ ហើយរាល់ការងារក្នុងវិស័យសិល្បៈដូចជាសម្ដែង និងពិធីការិនី នាងទទួលគ្រប់យ៉ាង។ដោយឡែកការងាររកស៊ីខាងសម្អាងការវិញ ពិធីការិនីរូបនេះបញ្ជាក់ទៀតថា ក៏មិនជោគជ័យខ្លាំងណាស់ណាដែរ ប៉ុន្តែដំណើរទៅមុខ ព្រោះទីផ្សារមានការប្រកួតប្រជែងខ្លាំង ហើយនាងមិនមានគម្រោងបង្កើតអ្វីផ្សេងទៀតដែរ៕
អត្ថបទ៖ ថា ម៉ាលីដា
