ស្ករគ្រាប់សិល្បៈ អ៊ឹម ជីវ៉ា លក់បាន៤៥០ដុល្លារ ខុសការរំពឹងទុក
យុទ្ធនាការលក់ស្ករគ្រាប់ ដើម្បីយកប្រាក់ទៅជួយដល់អ្នកសិល្បៈក្រីក្រ របស់តារាសម្ដែងលោក អ៊ឹម ជីវ៉ា បានបញ្ចប់ហើយ ដោយទទួលបានប្រាក់តែ៤៥០ដុល្លារប៉ុណ្ណោះ ដែលចំនួននេះខុសការរំពឹងទុក។
ទឹកប្រាក់ទាំងអស់ខាងលើ បានយកទៅដល់សិល្បករក្រីក្រចំនួន៦នាក់កាលពីម្សិលមិញ ក្នុងនោះមានដូចជា លោក មាស សារ៉ាន់ អតីតតារាកំប្លែង នាយ ប៉ិ គក់ លោក គុយ ហ៊ីន អ្នកស្រី ផល្លា លោក សាម៉ុត និង អ្នកស្រី ឈុន ណារី។ កម្មវិធីបានធ្វើឡើងនៅ កុដិលេខ២៤ វត្ត នាគវ័ន្ត រាជធានីភ្នំពេញ ក្រោមវត្តមាន សិល្បករសិល្បការិនី និងសប្បុរសជនមួយចំនួនទៀត។
លោក អ៊ឹម ជីវ៉ា បានថ្លែងឲ្យដឹងថា យុទ្ធនាការលក់ស្ករគ្រាប់ ដើម្បីយកប្រាក់ទៅជួយដល់រៀមច្បងសិល្បករក្រីក្រនេះ តាមគម្រោង លោកគ្រោងធ្វើចំនួនមួយសប្ដាហ៍ ឬអាចឈានទៅ១០ថ្ងៃ ដោយរំពឹងថា នឹងទទួលបានប្រាក់រាប់ពាន់ដុល្លារ ប៉ុន្តែដោយមានការរំខានពីក្រុមមនុស្សមួយចំនួន លោកចេញលក់បានតែ២ថ្ងៃប៉ុណ្ណោះ។
តារារូបនេះ បានបន្តទៀតថា អ្នកដែលរំខាននោះ ភាគច្រើនជាអ្នកសិល្បៈដូចគ្នា ដោយអ្នកទាំងនោះចោទលោកថា ធ្វើឡើងដើម្បីផលប្រយោជន៍ផ្ទាល់ខ្លួនច្រើនជាង យកទៅជួយអ្នកសិល្បៈ។ ការលើកឡើងបែបនេះ នាំឲ្យលោកក៏ដូចជាអ្នកសិល្បៈមួយចំនួនទៀតដែលបានចូលរួម មានការបាក់ទឹកចិត្ត។ "ខ្ញុំសូមប្រាប់ថា ខ្ញុំធ្វើនេះគឺដើម្បីជួយពួកគាត់ដែលខ្ញុំអត់ចង់បានអីទេ អ្នកថាចាំតែថា បើខ្លាំង ឲ្យអ្នកទាំងនោះ ចេញមកជួយរកប្រាក់ឲ្យបានដូចខ្ញុំ កុំចេះតែចាំថាចឹង បើមិនជួយចូកជួយចែវ កុំយកជើងរាទឹក " លោក អឹម ជីវ៉ា លើកឡើង។
ទោះបីជាមានការរំខាន ពីក្រុមមនុស្សមួយចំនួនបែបក្ដី ក៏តារារូបនេះមិនបានបញ្ឈប់សកម្មភាពមនុស្សធម៌របស់ខ្លួន ក៏ដូចជាក្នុងនាមសមាគមសិល្បករខ្មែរឡើយ លោក អ៊ឹម ជីវ៉ា ថ្លែងថា ឆាប់ៗខាងមុខនេះ លោកតំណាងឲ្យសិល្បករខ្មែរ គ្រោងធ្វើយុទ្ធនាការទ្រង់ទ្រាយធំមួយ ដើម្បីរកប្រាក់ទៅជួយដល់សិល្បករក្រីក្រនេះទៀត ដែលយុទ្ធការនោះ គឺការលក់អាវយឺត តែនៅមិនទាន់កំណត់ថ្ងៃច្បាស់លាស់នៅឡើយ។
ម្សិលមិញនេះក្រុមសិល្បករសិល្បការិនីជើងចាស់ក្រីក្រទាំង៦នាក់ ក្រៅពីទទួលបានប្រាក់ក្នុង១នាក់៥០ ដុល្លារ ដែលបានមកពីការលក់ស្ករគ្រាប់ ក៏មានសប្បុរសជនមួយចំនួនទៀត បានចូលរួមជួយផងដែរ ក្នុងនោះមាន អ្នកស្រី ថុង ស៊ីវទៀង ម្ចាស់ផលិតកម្មចក្រវាឡពេជ្រភាពយន្ត បានផ្ដល់ជូនបន្ថែមក្នុងម្នាក់៣០ ដុល្លារ ឯកឧត្ដមឧកញ៉ា ឃ្លោក បន្ថែមក្នុងម្នាក់៣០ ដុល្លារ ព្រះតេជព្រះគុណ នី សុវណ្ណមុនីរ៉េត បន្ថែមក្នុងម្នាក់២០ម៉ឺនរៀល មី១កេស ទឹកក្រួច១កេស។ ដោយឡែកតារាសម្ដែងជើងចាស់ អ្នកស្រី ឈុន ណារី ដែលមានជំងឺទាចទឹក ធ្ងន់ធ្ងរ ត្រូវបានអ្នកស្រី ថុង ស៊ីវទៀង និង ព្រះតេជព្រះគុណ នី សុវណ្ណមុនីរ៉េត ជូនប្រាក់២០០ដុល្លារបន្ថែមទៀត៕
អត្ថបទ៖ ខុត សីហា