- 2018-09-15 23:25:00
- ចម្រៀង
ចេញបទចម្រៀងម្ដង ចាដេត តែងភ្លេងផង ទំនុកច្រៀងខ្លួនឯងផង ដោយគ្មានអ្នកបង្រៀន
- 2018-09-15 23:25:00
- ចំនួនមតិ 0 | ចំនួនចែករំលែក 0
ចេញបទចម្រៀងម្ដង ចាដេត តែងភ្លេងផង ទំនុកច្រៀងខ្លួនឯងផង ដោយគ្មានអ្នកបង្រៀន
ចន្លោះមិនឃើញ
ធ្លាប់តែសម្ដែង ពេលនេះ ស័ក្តិ ចាដេត ប្រាប់ថា ខ្លួនត្រៀមនឹងចេញបទចម្រៀង Original Song ជូនទស្សនិកជនស្ដាប់ ក្នុងអំឡុងខែកញ្ញានេះ។ បទចម្រៀងថ្មី ចាដេត ប្រើស្នាដៃខ្លួនឯងសុទ្ធសាធតែម្ដង ទាំងនិពន្ធបទភ្លេង ទំនុកច្រៀង និងច្រៀង ទោះកន្លងមកមិនធ្លាប់ហាត់រៀនក៏ដោយ។
ក្នុងនោះមានបទចម្រៀងបីបទ ដែលបានតែងនិពន្ធរួចរាល់ តែតារាអាយុ២២ឆ្នាំរូបនេះ សម្រេចចេញបទចម្រៀងមួយបទសិន មានចំណងជើងថា "អាចទេ ស្អែកនេះអូនមករកបង" ។ មិនធ្លាប់ហាត់រៀនផ្នែកនេះពីមុនមកទេ តែដោយការស្រលាញ់ ព្រមទាំងចេះខ្លះៗ និងលួចមើលពីបងៗផងនោះ ចាដេតអាចធ្វើបទចម្រៀង បានដោយខ្លួនឯង។
លើកទីមួយក្នុងការនិពន្ធបទចម្រៀង ចាដេត ថា មានការលំបាកខ្លះៗ តែបទទីមួយ សម្រាប់តួរឿង "ក្រោមមេឃតែមួយ ឬ We Are One” ចំណាយពេលត្រឹម២ម៉ោង អាចសរសេរចប់។ មិនដឹងថាមកពីអ្វីទេ តែពេលនោះ ចាដេត ហាក់ដូចជាចូលអារម្មណ៍បានល្អក្នុងអត្ថន័យចម្រៀងនោះ ទោះមិនត្រូវនឹងសាច់រឿងខ្លួនក៏ដោយ។ ចំណែកពីរបទទៀត មានចំណងជើងថា "បានត្រឹមគិត" និង "Night Love” លោកប្រើពេលយូរបន្តិច។
ចំពោះ ការងាកមកច្រៀងវិញ មិនមែនតារាទើបបញ្ចប់បរិញ្ញាបត្រនៅសាកលវិទ្យាល័យជាតិគ្រប់គ្រង ចង់បោះបង់អាជីពសម្ដែងចោលឡើយ គ្រាន់តែចង់ស្វែងរកអ្វីថ្មីសម្រាប់ទស្សនិកជនប៉ុណ្ណោះ។ ចាដេត សង្ឃឹមថា ប្រិយមិត្តនឹងគាំទ្រស្នាដៃចម្រៀង Original Song របស់ខ្លួន និងរីករាយទទួលយកការរិះគន់ក្នុងន័យស្ថាបនាផងដែរ៕
