ម្ដាយ ភីម៉ៃ ស្រក់ទឹកភ្នែកក្រោយដឹងថាកូនសម្ដែងរឿង"ធ្មប់"

2018-01-12 08:31:41
ភាពយន្ត

2018-01-12 08:31:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ដាយ ភីម៉ៃ បានស្រក់ទឹកភ្នែកក្រោយពីដឹងថា កូនប្រុសខ្លួនសម្ដែងជាតួអង្គម្នាក់ក្នុងរឿង "ធ្មប់" ជាស្នាដៃថ្មីរបស់លោក ហ៊ុយ យ៉ាឡេង ផលិតករក្នុងរឿង "វិកលចរិត" ។

ជំនួបជាមួយ Sabay លោក ភីម៉ៃ ឲ្យដឹងថា បន្ទាប់ពីថតរឿង "ធ្មប់" ចប់ភ្លាមខ្លួនបានប្រញាប់រួតរះទៅសួរសុខទុក្ខអ្នកមានគុណនៅឯខេត្តមណ្ឌលគិរី ពេលទៅដល់ភ្លាមម្ដាយបានសួរសំនួរ ១ មកកាន់លោក" តើកូនថតរឿងអ្វី?” ភ្លាមៗនោះ ភីម៉ៃ ក៏បានឆ្លើយតបទៅម្ដាយវិញថា៖" ខ្ញុំថតរឿង "ធ្មប់" ម៉ែ" ។

គ្រាន់តែលឺសម្ដីកូននិយាយថាថតរឿងប្រភេទបែបនេះ បានធ្វើឲ្យម្ដាយ ភីម៉ៃ ស្រក់ទឹកភ្នែកច្រោកនៅលើផែនថ្ពាល់ទាំងគូតែម្ដង ព្រោះកាលពី៣០ មុនក្រុមគ្រួសារខ្លួនត្រូវបានអ្នកភូមិស្អប់ខ្ពើមមិនរាប់អាន ដោយសារតែពួកគេគិតថាជីតា របស់លោកចេះអំពើមន្តអាគមអាប់ធ្មប់ ធ្វើបាបអ្នកស្រុកអ្នកភូមិឲ្យឈឺ។

តារាសម្ដែងមាឌយក្សរូបនេះនិយាយថា៖ " ម៉ែខ្ញុំគាត់និយាយថា លោកតារបស់ខ្ញុំត្រូវគេចោទពេញភូមិថា ចេះអំពើអាបធ្មប់ ហើយខ្ញុំនិងបង ស្រីខ្ញុំគ្មានអ្នកស្ដីរកទេ ។ ដូច្នេះហើយទើបនឹកឃើញរឿងហ្នឹងម្ដងៗធ្វើឲ្យ ម៉ែខ្ញុំគាត់ស្រក់ទឹកភ្នែក ព្រោះស្រណោះខ្លួនដែលគេស្អប់ខ្ពើម និងការចោទប្រកាន់"។

ភីម៉ៃ ក៏មិនដឹងដែរថា ជីតា របស់ខ្លួនចេះអំពើអាបធ្មប់ ព្រោះអំឡុងពេលហ្នឹងលោក និងបងស្រីនៅតូច។ មកពីធ្លាប់ជួបហេតុការណ៍បែបហ្នឹងទើបធ្វើឲ្យតារាសម្ដែងមាឌយក្សគិតថារឿង "ធ្មប់" គឺជាភាពយន្តមួយឆ្លុះបញ្ចាំងអំពីជីវិតគ្រួសាររបស់ខ្លួន នាពេលកន្លងមកដែលត្រូវបានអ្នកភូមិស្អប់ខ្ពើម។

រឿង "ធ្មប់" ជាប្រភេទរឿងមួយប្រភេទ និយាយអំពីជីវភាព និងការរស់នៅរបស់បងប្អូនខ្មែរ ក្នុងសម័យលង្វែក មានជំនឿយ៉ាងមុតមាំទៅលើរឿងមន្តអាគមអាបធ្មប់ត្រៀមនឹងដាក់បញ្ចាំងនៅរោងភាពយន្តទំនើបៗ ក្នុងរាជធានីភ្នំពេញ និងខេត្តសៀមរាប នៅថ្ងៃទី ២៥ ខែ មករា ឆ្នាំ ២០១៨ នេះហើយ៕