តួ "Black Widow” ត្រូវគេរិះគន់ក្រោយយល់ព្រមសម្ដែងជាតួអង្គប្ដូរភេទក្នុងរឿងថ្មី

2018-07-05 07:05:00
ភាពយន្ត

2018-07-05 07:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងរយៈពេលមួយឆ្នាំក្រោយតារាសម្ដែង Scarlett Johansson ដែលមនុស្សភាគច្រើនបានស្គាល់តាមរយៈការសម្ដែងរបស់នាងជាតួអង្គ Black Widow នៅក្នុងភាពយន្តផ្សេងៗរបស់ Marvel ត្រូវបានគេរិះគន់ដោយសម្ដែងជាតួអង្គឯកនៅក្នុងរឿង "Ghost in the Shell” ពេលនេះនាងត្រូវគេរិះគន់ម្ដងទៀតហើយ បន្ទាប់ពីយល់ព្រមសម្ដែងនៅក្នុងភាពយន្តថ្មីមួយ។

កាលពីថ្ងៃច័ន្ទសប្ដាហ៍នេះសារព័ត៌មាន Deadline បានប្រកាសពីព័ត៌មាន ដែលផលិតកម្ម New Regency បានឈ្នះការដេញថ្លៃដើម្បីយកសិទ្ធិថតរឿង "Rug & Tug” ដែលនិយាយពីហេតុការណ៍ពិតរបស់ Dante Tex Gill។ Gill គឺជនម្នាក់មានទ្រព្យសម្បត្តិស្ដុកស្ដម្ភនៅទីក្រុង Pittsburgh ចន្លោះទសវត្សទី ៧០ និង៨០ ក្នុងការបើកអាជីវកម្ម ម៉ាស្សានិងសេវាកម្មផ្លូវភេទ។ តារាសម្ដែង Scarlett ត្រូវគេជ្រើសរើសឲ្យដើរតួជា Gill ជាស្រីកែភេទជាប្រុស ដែលមានឈ្មោះពិតថា Lois Jean Gill។

គ្រាន់តែបានឮដំណឹងនេះភ្លាម មនុស្សជាច្រើនមិនពេញចិត្តនូវជម្រើសនេះទេ ដោយចាប់ផ្ដើមបញ្ចេញយោបល់ពេញបណ្ដាញសង្គម Twitter។ ពួកគេយល់ថា Scarlett គឺជាមនុស្សស្រីធម្មតា ដែលកំណត់ថាជាភេទស្រីពីធម្មជាតិ (cisgender woman) មិនសមនឹងសម្ដែងជាតួអង្គស្រីធ្វើជាប្រុសនោះទេ។ ប៉ុន្តែការរិះគន់នេះត្រូវខាងតំណាងរបស់ តារារូបនេះឆ្លើយបកវិញថា "អ្នករិះគន់ទាំងនោះគួរតែក្រឡេកមើលតារាសម្ដែងដូចជា Jeffrey Tambor, Jared Leto និង Felicity Huffman សុទ្ធតែធ្លាប់សម្ដែងជាតួអង្គប្រុសតែងខ្លួនធ្វើស្រី។"

ទោះជាយ៉ាងណាក៏ដោយ បណ្ដាអ្នកប្រើប្រាស់បណ្ដាញអ៊ីនធឺណិតនៅតែព្យាយាមបញ្ឈប់នៅសកម្មភាពនេះ ដោយចង់ឲ្យតួអង្គកែភេទពិតប្រាកដមកសម្ដែងជាតួអង្គដែលសាកសម ដោយមិនគិតអំពីការជ្រើសរើសតែតួអង្គល្បីខ្លាំងនោះទេ៕

ប្រភព៖ popsugar ប្រែសម្រួល៖ ធារ៉ូ