- 2018-09-17 03:57:05
- ភាពយន្ត
រឿង «ផ្នូរគ្មានឈ្មោះ» របស់លោក ប៉ាន់ រិទ្ធី កំពុងត្រូវការគាំទ្រក្នុងស្រុក មុនទៅដណ្ដើមពានរង្វាន់អូស្ការ
- 2018-09-17 03:57:05
- ចំនួនមតិ 0 | ចំនួនចែករំលែក 0
រឿង «ផ្នូរគ្មានឈ្មោះ» របស់លោក ប៉ាន់ រិទ្ធី កំពុងត្រូវការគាំទ្រក្នុងស្រុក មុនទៅដណ្ដើមពានរង្វាន់អូស្ការ
ចន្លោះមិនឃើញ
ភាពយន្ត «ផ្នូរគ្មានឈ្មោះ» របស់អ្នកដឹកនាំរឿងដ៏ល្បីល្បាញ ប៉ាន់ រិទ្ធី កំពុងស្ថិតនៅក្រោមក្រសែភ្នែករបស់គណៈកម្មការជ្រើសរើសអន្តរជាតិ សម្រាប់យកទៅប្រកួតពានរង្វាន់អូស្ការ លើកទី៩១។ ប៉ុន្តែមុនបោះជំហានទៅភាពយន្តមួយនេះត្រូវការដាច់ខាតពីការគាំទ្ររបស់ទស្សនិកជននៅកម្ពុជា ដោយបច្ចុប្បន្នកំពុងចាក់បញ្ចាំងនៅតាមរោងភាពយន្តទំនើបៗទាំងអស់ នៅរាជធានីភ្នំពេញ និងខេត្តសៀមរាប។
លោក ជា សុភាព នាយកប្រតិបត្តិមជ្ឈមណ្ឌលបុប្ផាណា ដែលបានរួមចំណែកផលិតភាពយន្តនេះ លើកឡើងក្នុងសន្និសីទសារព័ត៌មានមួយកាលពីចុងសប្ដាហ៍កន្លងទៅថា ថារឿង «ផ្នូរគ្មានឈ្មោះ» ជាប្រភពដ៏សំខាន់មួយ ដើម្បីឱ្យក្មេងជំនាន់ក្រោយ បានស្វែងយល់បទពិសោធន៍ពីអតីតកាល ដើម្បីសិក្សាពីបច្ចុប្បន្ន និងអនាគត។ មជ្ឈមណ្ឌលបុប្ផាណាជាកន្លែងរក្សាទុកភាពយន្តឯកសារ ដូច្នេះភាពយន្តមួយនេះមជ្ឈមណ្ឌល បានធ្វើការគាំទ្រ និងមោទកភាព ដែលបានស្ថិតក្នុងក្រសែភ្នែកគណៈកម្មការជ្រើសរើសរឿងចូលរួមទៅលើការប្រកួតនៃពានរង្វាន់ Oscar បែបនេះ។
រឿង «ផ្នូរគ្មានឈ្មោះ» និយាយពីព្រលឹងតែលតោល ដែលបានស្លាប់នៅក្នុងរបបប្រល័យពូជសាសន៍ ខ្មែរក្រហម។ ភាពយន្តឯកសារនេះឆ្លុះបញ្ចាំងពីភាពឈឺចាប់ និងការព្យាយាម របស់អ្នកនៅរស់រានមានជីវិត ដើម្បីតាមស្វែងរកឆ្អឹងសាច់ញាតិរបស់ពួកគេ។ រឿងនេះក៏បានឆ្លុះបញ្ចាំងពីជំនឿអរូបីរបស់ខ្មែរផងដែរ។ សម្រាប់ភាពយន្តឯកសាររឿង «ផ្នូរគ្មានឈ្មោះ» នេះ មិនមែនមានគុណតម្លៃសម្រាប់តែប្រជាជនខ្មែរប៉ុណ្ណោះទេ តែវាថែមទាំងមានសារសំខាន់សម្រាប់មនុស្សជាតិលើពិភពលោក ដោយសារតែវាបានបង្ហាញពីសោកនាដកម្មដ៏គួរឱ្យសោកសង្រេង។
គណៈកម្មាធិការជ្រើសរើសរឿងនៃពានរង្វាន់ Oscar នៅកម្ពុជា អ្នកស្រី Mariam Arthur ឱ្យដឹងថា ភាពយន្តរបស់ផលិតករ ប៉ាន់ រិទ្ធី នេះ កំពុងស្ថិតក្នុងការពិចារណារបស់គណៈកម្មាធិការជ្រើសរើសរឿងនៅឡើយ (គណៈកម្មាធិការអន្តរជាតិ) មិនទាន់សម្រេច១០០%ថា យកទៅចូលរួមប្រកួតឬអត់នោះទេ។ អ្នកស្រីថា ភាពយន្តនេះអាចមានឱកាសច្រើនដើម្បីក្លាយខ្លួន ជាជម្រើសសម្រាប់យកទៅប្រកួតប្រជែងពានរង្វាន់ Oscar លុះត្រាណាតែរឿងនេះបានបញ្ចាំងនៅក្នុងស្រុកយ៉ាងហោចណាស់មួយសប្ដាហ៍ ហើយមានអ្នកគាំទ្រច្រើន។ អ្នកស្រីលើកឡើងថា ក្នុងនាមជាគណៈកម្មាធិការជ្រើសរើសរឿង អ្នកស្រីពេញចិត្តភាពយន្តមួយនេះ ព្រោះវាបានបង្ហាញអំពីស្ថានភាពសង្គមពិត។
ដូចបានលើកឡើងដោយ អ្នកស្រី Mariam Arthur ដូចនេះ ប្រសិនបើបងប្អូនប្រជាជនកម្ពុជាចង់ឲ្យភាពយន្តរបស់កម្ពុជាខាងលើ អាចមានឱកាសច្រើនដើម្បីក្លាយខ្លួនជាជម្រើសសម្រាប់យកទៅប្រកួតប្រជែងពាន់រង្វាន់ Oscar សូមទៅគាំទ្រឲ្យបានច្រើន។ បច្ចុប្បន្ន រឿង «ផ្នូរគ្មានឈ្មោះ» កំពុងតែដាក់បញ្ចាំងនៅរោងភាពយន្ត ប៉ារីស អេដិន ក្នុងមជ្ឈមណ្ឌលបុប្ដាណា, Legend Cinema, Prime Cineplex, Major Cineplex តម្លៃសំបុត្រត្រឹមតែ៣ដុល្លារ និង២ ដុល្លារ ហើយថវិកាទាំងអស់ដែលទទួលបាន រោងភាពយន្តនឹងផ្ដល់ជូនដល់មជ្ឈមណ្ឌលបុប្ផាណា ដើម្បីទ្រទ្រង់មជ្ឈមណ្ឌលមួយនេះ។
សូមបញ្ជាក់ផងដែរ កាលពីឆ្នាំ២០១៤ ភាពយន្តរឿង «កង្វះរូបភាព» (The Missing Picture) របស់លោក ប៉ាន់ រិទ្ធី ដដែល ក៏ធ្លាប់ត្រូវគណៈកម្មការជ្រើសរើសភាពយន្តយកទៅប្រកួតក្នុងមហោស្រពភាពយន្តពិភពលោក ពានរង្វាន់អូស្ការនេះផងដែរ ដោយបានជាប់ជម្រើស៥រឿងចុងក្រោយ៕
