- 2018-10-03 00:01:00
- ជីវិតតារា
មិនមែនដើម្បីប្រាក់ទេ តែតាម៉ែន ត្រដរថតរឿងទាំងវ័យជរា ព្រោះហេតុផលរំជួលចិត្តមួយ
- 2018-10-03 00:01:00
- ចំនួនមតិ 0 | ចំនួនចែករំលែក 0
មិនមែនដើម្បីប្រាក់ទេ តែតាម៉ែន ត្រដរថតរឿងទាំងវ័យជរា ព្រោះហេតុផលរំជួលចិត្តមួយ
ចន្លោះមិនឃើញ
វ័យ៧៩ឆ្នាំ តារាជើងចាស់ មិន សារិន ហៅ តាម៉ែន នៅតែប្រឹងទាំងត្រដាបត្រដួសទៅថតកុនទាំងខ្លួនមានជំងឺ។ ពេលខ្លះ ជិះម៉ូតូឌុបទាំងញីញ័រក៏មាន តែលោកមិនដែលរួញរាឡើយ។ មិនមែនមូលហេតុ រឿងប្រាក់កាសមួយមុខទេ តែហេតុផលសំខាន់ តារាត្រូវគេដាក់រហស្សនាមថា "មច្ចុរាជវង្វេងផ្នូរ" ចង់បន្សល់ស្នាដៃ កេរ្តិ៍ឈ្មោះតាមរយៈភាពយន្ត ដល់កូនខ្មែរជំនាន់ក្រោយ។
លោកសង្កត់ធ្ងន់ថា មិនខុសអ្វីពីលោក គង់ សំអឿន ឬតារាជើងចាស់ផ្សេងទៀត ប្រៀបដូចទូកទៅ កំពង់នៅ ថ្វីបើលាចាកទៅហើយក្ដី ក៏មានវីដេអូស្នាដៃសិល្បៈ ទុកឲ្យកូនខ្មែរបានទស្សនា ។ សព្វថ្ងៃ លោកស្នាក់នៅផ្ទះ ជាមួយកូនចៅ៧នាក់ ព្រមទាំងត្រូវមើលថែចិញ្ចឹមកូន២នាក់ ដែលមានស្មារតីមិនសូវល្អ។ លើសពីនេះ លោកក៏មានជំងឺប្រចាំកាយ ដោយឧស្សាហ៍វិលមុខ ក្អក លើសឈាម និងធ្ងន់ត្រចៀក។
ដូច្នេះហើយទើបកូនៗឲ្យលោកនៅផ្ទះ ឈប់ចេញថតបន្តទៀត តែលោកមិនព្រម។ លោក បន្តថា ទោះប្រឡូកសិល្បៈច្រើនឆ្នាំហើយនៅតែក្រយ៉ាងណា ក៏លោកស្រលាញ់ មិនបោះបង់សិល្បៈចោលទេ តស៊ូតាំងពីជិះកង់ទៅថតកុន រហូតពេលនេះមានត្រឹមម៉ូតូសង់ការ៉េចាស់មួយ ដែលផ្ទុយពីសិល្បករក្មេងៗ មានលទ្ធភាពកសាងគ្រួសារបានធូរធារ។
លោក មិន សារិន ឲ្យដឹងថា ខាងផលិតករគេមិនសូវចង់ហៅតារាចាស់ៗទេ ព្រោះចាស់ហើយភ្លេចភ្លាំងច្រើន ទន្ទេញប៉ារ៉ូរឿងក៏មិនចាំល្អ១០០%។ ប៉ុន្តែក្នុងនោះក៏មានផលិតកម្មផ្សេងៗ គេទាក់ទងហៅលោកទៅថតដែរ ដូចជា វីដេអូអប់រំរឿងខ្លី ស្ប៉តពាណិជ្ជកម្ម ជាដើម ដោយទទួលបានថវិកាសមរម្យ។
លោកជាតារាជើងចាស់តាំងពីឆ្នាំ១៩៦០ ដោយធ្លាប់សម្ដែងជាតួកាច តួសេដ្ឋី តួនាម៉ឺន និងពិសេសនោះ ជាតួមេខ្មែរក្រហម លោកសម្ដែងបានយ៉ាងស័ក្ដិសម តែអត្តចរិតខាងក្រៅ លោកស្លូតបូតនោះទេ។ រឿងដែលលោកបានសម្ដែងមានដូចជា «ភ្លើងជីវិត» «នរក៩ជាន់» «ចិត្តចងចាំ» «ទុក្ខស្រីប្ដីព្រាត់» «បិសាចក្រមុំ» និងរឿង «មួយសប្ដាហ៍លើកោះពស់» ជាដើម៕
ទស្សនាការរៀបរាប់របស់លោកតា មិន សារិន តាមរយៈវីដេអូខាងក្រោមនេះ៖
