- 2018-10-31 03:32:22
- ព័ត៌មាន
ក្រុមសិល្បករជួបជុំគ្នា ត្រៀមធ្វើរឿងមួយឲ្យគម្រោង "ភ្នំពេញស្អាត" កាន់តែប្លែក និងអស្ចារ្យកក្រើកភ្នំពេញ
- 2018-10-31 03:32:22
- ចំនួនមតិ 0 | ចំនួនចែករំលែក 0
ក្រុមសិល្បករជួបជុំគ្នា ត្រៀមធ្វើរឿងមួយឲ្យគម្រោង "ភ្នំពេញស្អាត" កាន់តែប្លែក និងអស្ចារ្យកក្រើកភ្នំពេញ
ចន្លោះមិនឃើញ
ក្រុមអ្នកមានទេពកោសល្យលើផ្នែកគំនិតច្នៃប្រឌិតសិល្បៈប្រមាណជាជាង ១០រូប មកពីផ្នែកផ្សេងៗ ដែលសុទ្ធសឹងតែជាអ្នកល្បីល្បាញក្នុងសង្គម បានជួបជុំគ្នា និងឯកភាពធ្វើរឿងមួយ ដើម្បីឲ្យគម្រោង "ភ្នំពេញស្អាត" កាន់តែអស្ចារ្យ នៅពេលខាងមុខនេះ។ ការជួបជុំគ្នានេះ ក្រោមការសម្របសម្រួលពី លោក ជី សិលា សហស្ថាបនិកគម្រោង "ភ្នំពេញស្អាត" និងជានាយកប្រតិបត្តិក្រុមហ៊ុន Sabay ដែលបានប្រព្រឹត្តិទៅនៅសាកលវិទ្យាល័យភ្នំពេញអន្តរជាតិ (PPIU) កាលពីល្ងាច ថ្ងៃទី ៣០ ខែតុលា ឆ្នាំ ២០១៨។
លោក ជី សិលា បានមានប្រសាសន៍ថា ឆ្នាំនេះគម្រោងភ្នំពេញស្អាតចង់ធ្វើឲ្យប្លែកពីឆ្នាំមុន ដោយចង់ប្រមូលផ្ដុំអ្នកមានទេពកោសល្យនៅស្រុកខ្មែរបង្កើតស្នាដៃច្នៃសំរាមធ្វើជាវត្ថុសិល្បៈ។ "សំរាមមានដូចជា សម្បកកំប៉ុង សម្បកដប ថង់ប្លាស្ទិច... យើងចង់បង្កើតជាសិល្បៈមួយ អាចជា Fashion អាចជាគំនូរ រូបថត ឬជារូបអ្វីមួយបង្កើតជាសិល្បៈមួយរួមគ្នា ឬការតាំងពិព័រណ៍សិល្បៈរួមគ្នាមួយ ដោយចង់ឲ្យមានការចូលរួមគ្រប់ភាគីពាក់ព័ន្ធ"។
គេនៅចាំបានថា កាលពីឆ្នាំ ២០១៧ គម្រោង "ភ្នំពេញស្អាត" បានផ្ដើមយុទ្ធនាការអប់រំផ្នែកបរិស្ថាន និងបញ្ហាកាកសំណល់ ការពារបរិស្ថាន និងសោភណភាពទីក្រុង។ យុទ្ធនាការនៅពេលនោះ បានធ្វើឡើងពេញ១ខែវិច្ឆិកា តាមរយៈយន្តការនៃការផ្សព្វផ្សាយ និងបញ្ជ្រាបការអប់រំស្ដីពីការទុកសំរាមឲ្យបានត្រឹមត្រូវ ក្រោមពាក្យស្លោក «សំរាមមិនធ្លាក់ដល់ដី ភ្នំពេញកាន់តែប្រពៃ»។
វិចិត្រករដ៏ចំណាន លោក លាង ស៊ីកន ដែលបានចូលរួមកិច្ចប្រជុំខាងលើ បានបញ្ចេញទស្សនៈថា "ខ្ញុំឃើញន័យសំខាន់ជារួមគឺការឯកភាពគ្នា គំនិតម្នាក់ៗដូចគ្នា ម្នាក់ៗចង់ឲ្យមានភាពស្អាត គឺចាប់ពីខ្លួនយើង ទៅណាគិតពីខ្លួនយើងស្អាត ស្លៀកពាក់ស្អាតការរស់នៅស្អាត និង សម្រស់ស្អាត ដោយផ្ដើមពីខ្លួនយើង"។
លោកលាង ស៊ីកន បានបន្តទៀតថា ការជួបជុំគ្នានេះក៏បានឯកភាពបង្កើតស្នាដៃអ្វីមួយ ដើម្បីបំផុសសតិអារម្មណ៍គំនិតអប់រំដើម្បីផ្លាស់ប្ដូរជាវិជ្ជមាន។ "ខ្ញុំឧទាហរណ៍កន្លងមកខ្ញុំធ្លាប់បានបង្កើតរូបនាគធ្វើពីសំរាមប្រវែង២២៥ម៉ែត្រ គឺថាដាស់អារម្មណ៍ប្រជាជន នាគផុសចេញពីក្នុងទឹក ដោយសំរាមចេញមកព័ទ្ធជុំវិញខ្លួនដើម្បីបង្ហាញថា យើងត្រូវប្រកាសអាសន្នហើយ ប្រសិនបើយើងពីពេលនេះ យើងមិនចាប់ផ្ដើមរៀបចំទប់ស្កាត់ទេ ទឹកដែលជាជីវិតរបស់យើងនឹងត្រូវស្លាប់...។ ការធ្វើបែបនេះគឺបានទាក់ទាញឲ្យមានការចូលរួមហើយពួកគេចង់ស្វែងយល់ពីអត្ថន័យនៃរូបនាគផលិតពីសំរាម"។
ស្រដៀងគ្នានេះដែរ លោក ភើ សុផន ជាសិល្បៈមួយរូប ដែលចូលចិត្តដំឡើងវត្ថុសិល្បៈ បានបង្ហាញចំណាប់អារម្មណ៍ដែរថា ការជួបជុំជាមួយក្រុមសិល្បករល្បីល្បាញក្នុងស្រុកខ្មែរនៅពេលនេះ បំផុសឲ្យកើតមានគំនិតច្នៃប្រឌិតថែរក្សាបរិស្ថាន ហើយការជួបជុំគ្នានេះ ស្ថិតនៅក្នុងគម្រោងរបស់ខ្ញុំដែរ។ "ខ្ញុំយកសម្បកដបមកកែច្នៃជាសិល្បៈផ្សេងៗ ហើយខ្ញុំចង់ជំរុញឲ្យមហាជនចូលរួមដូចគ្នា តើត្រូវធ្វើយ៉ាងម៉េចឲ្យខ្លួនយើង ផ្ទះយើង ក្រុងយើងស្អាត"។ ការពិភាក្សានេះក៏ជំរុញទឹកចិត្តខ្ញុំឲ្យចង់ធ្វើថែមទៀត និងចែកចាយឲ្យសាយភាយទៅដល់សាធារណជន ឧទាហរណ៍ថា យើងញុំាទឹកសុទ្ធហើយ ហើយកុំចោលដបទឹកសុទ្ធតាមផ្លូវគឺមិនសមនោះទេ"។
ទាក់ទងនឹងបញ្ហានេះដែរ លោក ឯម រៀម បណ្ឌិតច្នៃម៉ូដ បានលើកឡើងដែរថា ក្នុងនាមខ្ញុំជាសិល្បករមួយរូប នៅក្នុងកម្មវិធី "ភ្នំពេញស្អាត" នាពេលខាងមុខនេះ នឹងបង្កើតស្នាដៃសិល្បៈខ្លះៗ ដើម្បីបង្ហាញឲ្យគ្រប់គ្នាចេះគ្រប់គ្រងសំរាម និងយកសំរាមច្នៃជាវត្ថុសិល្បៈផ្សេងៗ"។
មិនខុសគ្នាពីសិល្បករប៉ុន្មានរូបខាងលើនោះទេ លោក រ៉េមមី ហូ ដែលធ្លាប់សាងភាពលេចធ្លោជាច្រើនក្នុងវិស័យរចនាម៉ូដនៅសហរដ្ឋអាមេរិក បានបង្ហាញនូវអារម្មណ៍រំភើបរីករាយ លោកនឹងសហការពេញទំហឹងជាមួយអ្នកច្នៃម៉ូដនៅស្រុកខ្មែរ ដោយយកសម្រាមមកច្នៃឲ្យចេញជាម៉ូដសម្លៀកបំពាក់ដ៏ទាក់ទាញបំផុត។ ចំពោះរូបរាងនៃ Fashion Show យ៉ាងណានោះលោកមិនទាន់អាចបញ្ជាក់បាននោះទេ តែលោកសង្ឃឹមថា ស្នាដៃច្នៃសំរាមធ្វើជាវត្ថុសិល្បៈនេះកម្លាំងចលករជំរុញឲ្យមានការផ្លាស់ប្តូរទម្លាប់នៃការ ចោលសម្រាមពាសវាលពាសកាល។
តែទោះបីជាយ៉ាងណាក៏ដោយ ក្រុមសិល្បករដែលបានជួបជុំ កាលល្ងាចមិញនេះ គឺស្ថិតនៅក្នុងការសម្រេចឯកភាពជាគោលគំនិតរួមគ្នានៅឡើយ ដែលក្រុមដដែលនេះ នឹងជួបប្រជុំច្រើនដងទៀត ដើម្បីធ្វើឲ្យគម្រោងលេចចេញជារូបរាងផ្លូវការ ដោយធ្វើឲ្យប្លែក និងអស្ចារ្យ មិនធ្លាប់មានពីមុនមក នៃការប្រមូលសំរាមច្នៃជាវត្ថុសិល្បៈផ្សេងៗ រួមផ្សំនៃកម្មវិធីផ្សេងៗជាច្រើនទៀត ដើម្បីចូលរួមយុទ្ធនាការ "ភ្នំពេញស្អាត" ដែលមានរយៈពេលពេញ១ខែ ក្នុងខែវិច្ឆិកា ២០១៨ ខាងមុខនេះ៕