ខាត់ វ៉ៃហាំង ស្លុងជាមួយតួស្រីក្នុងរឿង "និស្ស័យស្នេហ៍នាងមនោរាហ៍"

2019-09-23 09:18:21
ភាពយន្ត

2019-09-23 09:18:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងប្រុសដែលទទួលបានប្រជាប្រិយភាពពីស្រទាប់យុវវ័យ និងភាគច្រើន គេឃើញលោកត្រូវបានផលិតកររឿងតម្រូវឱ្យចាប់ដៃគូជាមួយកញ្ញា ស៊ីន យូប៊ីន នោះ បានបញ្ចេញឲ្យដឹងថា មានពេលមួយនោះ លោកស្លុងខ្លាំងតែម្ដងជាមួយតួឯកស្រី។

តួឯកស្រីក្នុងរឿង "និស្ស័យស្នេហ៍នាងមនោរាហ៍" គឺកញ្ញា ស៊ិន យូប៊ីន ដៃគូសម្ដែងដ៏សាកសមរបស់ប្រុសសង្ហា និងជាគូស្នេហ៍ផងដែរ។ និយាយពីខ្សែរឿងខាងលើនេះ តួឯកប្រុស ហាក់បញ្ចេញនូវភាពរំភើបរីករាយយ៉ាងពន់ពេក។ លោកបានលើកឡើងថា នេះជារឿងទីមួយហើយដែលខ្លួនបានស្លៀកនូវសំលៀកបំពាក់បែបប្រពៃណីបុរាណរបស់ខ្មែរ មើលទៅពិតជាស្រស់ស្អាតខ្លាំងណាស់ ដែលពីមុនលោកពុំធ្លាប់បានសម្ដែងក្នុងខ្សែភាពយន្តបុរាណណាឡើយ។

វ៉ៃហាំង បានទទួលតំណែងជាតួអង្គឯកប្រុស ដែលជាមេទ័ពខ្លាំងពូកែម្នាក់ក្នុងរឿង បានដាក់ចិត្តដាក់កាយបញ្ចូលអារម្មណ៍ទៅក្នុងសាច់រឿងឱ្យដូចជាពិតដូច្នោះដែរ។ ជាមួយនឹងឈុតមេទ័ពសម័យបុរាណដ៏អង់អាចក្លាហាននេះ ធ្វើឱ្យអារម្មណ៍របស់ វ៉ៃហាំង នៅដិតជាប់ក្នុងចិត្ត ចងចាំមិនភ្លេចឡើយ ជាពិសេសឈុតមួយដែលថតនៅប្រាសាទបុរាណមួយ ស្ថិតក្នុងទឹកដីខេត្តតាកែវ ។

ឈុតនោះ គឺឈុតបង្ហាញពីការប្រារព្ធពិធីបុណ្យក្នុងភូមិមួយ ដែលមានការជួបជុំពីមនុស្សមកពីគ្រប់ទិសទី ហើយមានការបង្ហាញជាមួយនឹងរបាំប្រពៃណីជាច្រើនទម្រង់ផងដែរ។ ជាមួយនឹងទឹកមុខញញឹមតិចៗ បែបមានមន្តស្នេហ៍ វ៉ៃហាំង បានរៀបរាប់ថា "ពេលហ្នឹង ខ្ញុំដើរមើលគេ ព្រោះយើងជាមេទ័ព យើងដើរមើលគេអញ្ចឹង មានអារម្មណ៍ថា សប្បាយចិត្ត សិល្បករ សិល្បការនី តែងខ្លួនជាអ្នករបាំ ទៅតាមប្រភេទនីមួយៗ ខុសប្លែកពីគ្នា ដូចនេះ វាស្រស់ស្អាតខ្លាំង ហើយក៏ដក់ជាប់អារម្មណ៍ខ្លាំងដូចគ្នា ជាពិសេស បានឃើញតួឯកស្រីនៅទីនោះតែម្ដង"។

នេះជាឈុតដែលលោកលង់ចិត្ត ដកមិនរួចនោះ។ ដោយឡែកឈុតផ្សេងទៀត តួឯកប្រុសមេទ័ពម្នាក់នេះ បានបង្ហើបក៏មានឈុតដែលពិបាកថតជាងគេក្នុងចំណោមឈុតទាំងអស់ក្នុងរឿងដែរ តួយ៉ាងដូចជាឈុតធ្វើសង្គ្រាម ដែលតម្រូវឱ្យមានមនុស្សច្រើន ហើយអ្វីដែលប្រឈមមុខខ្លាំង គឺអាកាសធាតុក្ដៅ ហើយមានពេលខ្លះប៉ះពាល់ទៅដល់ស្បែកក៏មាន។

ទោះជាយ៉ាងនេះក្ដី លោកបានបន្តថា យើងទទួលបានជោគជ័យក្នុងការថតឈុតដ៏លំបាកមួយនេះ ក្រោមទឹកមុខដ៏រីករាយពីក្រុមការងារទាំងអស់គ្នា។ យ៉ាងណាមិញ ដើម្បីឱ្យដឹងកាន់តែច្បាស់ទៀតថា តើការសម្ដែងរបស់តារាប្រុស តួឯកមេទ័ពរូបសង្ហានៅក្នុងរឿង "និស្ស័យស្នេហ៍នាងមនោរាហ៍" មានលក្ខណៈដូចម្ដេច និងល្អមើលយ៉ាងណានោះ សូមទស្សនិកជនរង់ចាំតាមដានទស្សនាចាប់ពីថ្ងៃ ព្រហស្បតិ៍ ដល់ថ្ងៃសុក្រ វេលាម៉ោង ០៨ យប់ ដល់ម៉ោង ០៩យប់ និងមានតែមួយគត់នៅលើកញ្ចក់ទូរទស្សន៍ភីអិនអិន៕ សូមទស្សនាវីដេអូខាងក្រោម៖

អត្ថបទ៖ ទារិកា