នៅតែប្លែកភ្នែក...តារាសម្ដែងក្នុងឆ្នាំ១៩៩១ ក្នុងរឿងមួយរបស់លោក ហ្វៃ សំអាង

2020-07-01 04:16:49
ភាពយន្ត

2020-07-01 04:16:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករភាពយន្តចាស់វស្សា លោក ហ្វៃ សំអាង ដែលស្ងប់ស្ងាត់ក្នុងការផលិតរឿងថ្មីៗក្នុងឆ្នាំ២០២០ នេះ បានគាស់រំលើងតួអង្គសម្ដែងល្បីៗក្នុងរឿងរបស់លោកកាលពីជំនាន់មុនជារឿយៗ។

មហាជន បានចាប់អារម្មណ៍នឹងរូបថតតារាសម្ដែងជើងចាស់ដូចជា លោក ទេព រិនដារ៉ូ អ្នកនាង អម្ពរ ទេវី និងលោក ខៃ ពិសិដ្ឋជាដើម ដោយអ្នកខ្លះបានឆ្លើយឆ្លងជាមួយម្ចាស់ស្នាដៃភាពយន្តដោយផ្ទាល់ទៀតផង។ រាល់រូបថតចាស់ៗដែលបានបង្ហោះដោយ លោក ហ្វៃ សំអាង មិនភ្លេចដាក់សំណួរដល់មហាជនទេ ដោយសំណួរភាគច្រើនបានសួរពីឈ្មោះរបស់តួអង្គ ហើយលោកក៏ចូលបកស្រាយតាមក្រោយ។

នៅថ្ងៃទី១៧ និងថ្ងៃទី៣០ ក្នុងខែមិថុនា នេះ គឺជាខួប៤ឆ្នាំ នៃការរំលឹកស្នាដៃ និងតួអង្គល្បីៗក្នុងរឿងរបស់លោក ហ្វៃ សំអាង ដែលបានផលិតក្នុងឆ្នាំ១៩៩១ និងដើមឆ្នាំ១៩៩២ គឺរឿង"ជីវិតតារាភាពយន្ត"។ សារ និងរូបភាពទាំងនោះបានលេចឡើងជាថ្មីម្ដងទៀត ធ្វើឲ្យមហាជននឹកស្រណោះ និងចាប់អារម្មណ៍តួអង្គចាស់ៗជាថ្មីទៀត។

នៅក្នុងសារដែលភ្ជាប់រូបថតមួយសន្លឹកនោះ មានរូបតារាសម្ដែងប្រុស-ស្រី៤ដួង គឺលោក ទេព រិនដារ៉ូ លោក សាយ ណារា អ្នកនាង អម្ពរ ទេវី និងអ្នកនាង ឯក អមរ៉ា។

រូបថតមួយសន្លឹកនេះ បើគិតពីអាយុកាលវិញ មានរយៈពេល២៨ឆ្នាំហើយ ប៉ុន្ដែកាយវិកា និងភាពក្រមិចក្រមើមនៅក្នុងរូបថតនោះ នៅតែមើលទៅគួរឲ្យចាប់អារម្មណ៍ មិនចាញ់រូបថត ឬវីដេអូសម្ដែងក្នុងសម័យដែលមានបច្ចេកវិទ្យាទំនើបនេះឡើយ។

នៅគ្រាហ៍ដែលដំណើរការផលិត និងចាក់បញ្ចាំងខ្សែភាពយន្តតាមរោងកុន ត្រូវជាប់គាំងដោយសារបញ្ហាជំងឺកូវីដ-១៩ លោក ហ្វៃ សំអាង ក៏មិនភ្លេចបង្ហាញរូបភាពស្ដីពីសកម្មភាពថតរឿង និងតារាៗក្នុងសម័យបច្ចុប្បន្នខ្លះដែរ ដោយគេមើលឃើញថាចិត្ដអារម្មណ៍របស់កវីនិពន្ធរូបនេះនៅតែដក់ជាប់នឹងវិស័យភាពយន្ដ ហើយលោកក៏អាចធុញទ្រាន់ខ្លាំងណាស់ដែរ នឹងស្ថានភាពជំងឺកូវីដ-១៩ ដែលធ្វើឲ្យមានបញ្ហាដល់វិស័យភាពយន្ដដែលលោកស្រឡាញ់បំផុតនោះ៕

អត្ថបទ៖ ជិន សុភ័ក្ដ្រ