ផលិតករភាពយន្ដចាស់វស្សា ហ្វៃ សំអាង បានបង្ហាញវណ្ណកម្មថ្មីដែលជាខ្សែភាពយន្តខ្នាតធំ និពន្ធឡើងដោយអ្នកនិពន្ធពីររួមគ្នា គឺលោក យូ សុភា និងរូបលោកផ្ទាល់។ លោកបង្ហើបថា វាជាខ្សែភាពយន្តបង្ហាញពីអត្តសញ្ញាណជាតិ មានទាំងអត្ថរសនិងអត្ថន័យ។

ផលិតកររូបនេះ និយាយថា ក្នុងថ្ងៃខួបកំណើតរបស់លោកកាលពីថ្ងៃទី១០ ខែមេសា ឆ្នាំ២០២២ រូបលោកពិតជាមានចិត្ដសប្បាយរីករាយ ទើបសូមបង្ហាញជូនរឿង “អប្សរាមហាអង្គរ” ដល់ទនិកជនដែលនិយមគាំទ្រស្នាដៃរបស់លោក និងផលិតកម្មហង្សមាសកន្លងមក។

លោក ហ្វៃ សំអាង៖ “ក្រុមការងារផលិតកំពុងសម្រិតសម្រាំងតួសម្តែងដែលមានតួអង្គសំខាន់ៗជាង៤០នាក់ តើមានតារាប្រុសស្រីណាខ្លះដែលលោកអ្នកស្រឡាញ់ ពេញចិត្តចង់ឲ្យមានវត្តមាននៅក្នុងខ្សែភាពយន្តខ្នាតធំនេះ? សូមចូលរួមបញ្ចេញយោបល់ និងប្រាប់ឈ្មោះតារាដែលនៅក្នុងចិត្តរបស់លោកអ្នកមក….យើងនឹងបើកCamera នាពាក់កណ្តាលឆ្នាំ២០២២នេះហើយ”។

ទន្ទឹមគ្នានឹងការប្រកាសរបស់លោក ហ្វៃ សំអាង ថានឹងផលិតរឿងថ្មីដែលជាស្នាដៃរបស់ខ្លួន រួមជាមួយផលិតករ យូ សុភា នេះ លោកក៏សម្រិតសម្រាំងខ្លាំងណាស់ដែរលើដំណើរការថតភាពយន្ដចម្រៀង និងភាពយន្ដប្រវត្ដសាស្ដ្រទាក់ទងនឹងដំណើរជីវិតតស៊ូរបស់សម្ដេចតេជោ ហ៊ុន សែន។

ទោះជាយ៉ាងណាគេមិនដឹងច្បាស់ថាដំណើរការថតខ្សែភាពយន្ដ និងចម្រៀងរបស់សម្ដេចបានដំណើរការដល់ណាហើយទេ? តែឃើញលោក ហ្វៃ សំអាង មមាញឹកណាស់ក្នុងរយៈពេល១ឆ្នាំចុងក្រោយនេះ៕