តារាសម្ដែងជនជាតិភូមា Paing Takhon នឹងមកដល់ព្រលានយន្ដហោះអន្ដរជាតិភ្នំពេញ នៅម៉ោង ៤រសៀល ថ្ងៃទី១៩ ខែមេសា ឆ្នាំ២០២៣។ នេះបើតាមលោក លៀក លីដា ចាងហ្វាងផលិតកម្ម អិល ឌី បានបង្ហើបដំណឹងនេះតាមបណ្ដាញសង្គមហ្វេសប៊ុក ដោយមានភ្ជាប់រូបថតរបស់លោកជាមួយតួភូមារូបនេះជាច្រើនសន្លឹកទៀតផង។

លោក លៀក លីដា និយាយថា បន្ទាប់ពីរង់ចាំអស់រយៈពេល ៣ឆ្នាំ ទីបំផុតលោកបានធ្វើការផលិត និងសម្ដែងកុនជាមួយ Paing Takhon ដែលជាមិត្ដភក្ដិ និងជាតួសម្ដែងក្នុងរឿង “នាឡិកាដាស់វិញ្ញាណ”កន្លងមកនោះហើយ។ លោកបាននិយាយពាក្យស្វាគមន៍ ហើយប្រកាសឲ្យបងប្អូនដែលគាំទ្រតារាសម្ដែងរូបនេះ ទៅជួប និងអាចថតរូបអនុស្សាវរីយ៍ជាមួយតារារូបនេះទៀតផង នៅល្ងាចនេះ។

ទាក់ទងនឹងតារាសម្ដែង Paing Takhon លោក លៀក លីដា តែងតែនិយាយពីលក្ខណៈសម្បត្ដិ និងកោតសរសើរពីទេពកោសល្យរបស់លោកក្នុងវិស័យភាពយន្ដ ខណៈដែលលោកទន្ទឹងរង់ចាំផលិតខ្សែភាពយន្ដជាមួយគ្នាក្នុងរឿងដ៏អស្ចារ្យមួយនៅស្រុកខ្មែរ។ ប៉ុន្ដែតារាសម្ដែងរូបសង្ហារ Takhon ត្រូវជាប់គាំងនៅស្រុកកំណើតរបស់ខ្លួន អំឡុងពេលដែលវិបត្ដិនយោបាយនៅភូមាធ្ងន់ធ្ងរខ្លាំង គាប់ជួននឹងវិបត្ដិកូវីដ-១៩ វាយលុកទៀតនោះ ទើបធ្វើឲ្យតារាសម្ដែងរូបនេះ អាក់ខានមកស្រុកខ្មែរ ដើម្បីថតកុនជាមួយលោក លៀក លីដា។

ទោះជាយ៉ាងណា គិតត្រឹមម៉ោងនេះ ចាងហ្វាងផលិតកម្ម អិល ឌី មិនទាន់បញ្ជាក់ថា Paing Takhon នឹងមកស្រុកខ្មែររយៈពេលប៉ុន្មានថ្ងៃ ហើយមានគោលបំណងអ្វីខ្លះនោះទេ? ប៉ុន្ដែកន្លងទៅលោក លៀក លីដា ធ្លាប់បង្ហើបថា ខ្សែភាពយន្ដដ៏អស្ចារ្យ ត្រូវចំណាយដើមទុនដ៏ច្រើនមួយ នឹងត្រូវលេចជារូបរាងក្នុងពេលឆាប់ៗ ប៉ុន្ដែដោយតារាសម្ដែងភូមា Paing Takhon មានបញ្ហាមិនទាន់អាចមកចូលរួមថតបាន ទើបត្រូវរាំងស្ទះ រហូតមកដល់ពេលនេះ៕