រឿងភាគខ្មែរនៅភីអិនអិនទទួលបានការចាប់អារម្មណ៍ខ្លាំង

2016-11-22 09:48:27
ភាពយន្ត

2016-11-22 09:48:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបានចាក់ផ្សាយរឿងភាគខ្មែរនៅលើកញ្ចក់ទូរទស្សន៍ភីអិនអិនចំនួនពីរ គឺរឿង «ម្ទេសហឹរប៉ះអំបិលប្រៃ» និងរឿង «សង្គ្រាមបេះដូង» បានអង្រួនបេះដូងប្រិយមិត្ត ទស្សនិកជនកាន់តែច្រើនឱ្យងាកមកចាប់អារម្មណ៍ខ្សែភាពយន្តភាគខ្មែរនៅភីអិនអិន។

ដោយសារតែមើលឃើញវិសាលភាពនៃការរីកដុះដាលវិស័យភាពយន្តខ្មែរ ទើបភីអិនអិនខិតខំបង្កើត និងផលិតខ្សែភាពយន្តភាគខ្មែរថ្មីៗ មានទាំងស្នេហា អប់រំ កំប្លែង និងការតស៊ូក្នុងជីវិត។

កញ្ញាទូច បុប្ផា ប្រធានផ្នែកកម្មវិធីផ្សាយរបស់ភីអិនអិនមានប្រសាសន៍ថា «ដោយសារតែយើងឃើញថា សន្ទុះនៃការគាំទ្រស្នាដៃផលិតរឿងភាគខ្មែរកាន់តែកើនឡើង បើទោះបីជាស្នាដៃផលិតនៅមានកម្រិត ប៉ុន្តែពួកគាត់ទាំងអស់គ្នា ទាំងអ្នកដឹកនាំ ទាំងអ្នកសម្តែងកំពុងខិតខំបន្ថែមទៀតក្នុងការផលិតរឿងភាគខ្មែរសម្រាប់ទស្សនិកជន។ នៅឆ្នាំ២០១៧ខាងមុខនេះ ភីអិនអិននឹងចាក់ផ្សាយរឿងភាគខ្មែរឱ្យបានច្រើនជាង៣០០ម៉ោងក្នុងមួយឆ្នាំ។ នៅឆ្នាំបន្តបន្ទាប់ទៀត ភីអិនអិនគ្រោងនឹងផលិតឱ្យបានច្រើនទ្វេមួយជាពីរ»។

ប្រធានផ្នែកកម្មវិធីផ្សាយខាងលើក៏បានសំណូមពរប្រិយមិត្តឱ្យជួយគាំទ្រស្នាដៃកូនខ្មែរយើង ប្រសើរជាងបន្តុះបង្អាប់ និងជួយគ្នាដើម្បីអភិវឌ្ឈភាពយន្តខ្មែរឱ្យកាន់តែល្បីជាងនេះទៀត។ សម្រាប់ចុងឆ្នាំ២០១៦នេះ ប្រិយមិត្តនឹងបានទស្សនាខ្សែភាពយន្តភាគខ្មែរថ្មីចំនួនពីររឿង គឺរឿង «កែវភ្នែក» និងរឿង«ភក្តីស្នេហ៍ទ្វេភព» ព្រមទាំងរឿងភាគខ្មែរជាច្រើនទៀត ដែលភីអិនអិនកំពុងតែផលិត និងត្រៀមចាក់ផ្សាយ ដោយមានការច្របាច់បញ្ចូលគ្នាគ្រប់រសជាតិជីវិត។

អ្វីដែលកាន់តែពិសេស ភីអិនអិននឹងពង្រីកម៉ោងចាក់ផ្សាយរឿងភាគខ្មែររយៈពេលមួយម៉ោងពេញនៅក្នុងម៉ោងមាស ដើម្បីតម្រូវចិត្តទស្សនិកជនជាច្រើនដែលបានសំណូមពរតាមរយៈ Facebook Page PNN Drama Fan Club ហើយការពង្រីកម៉ោងចាក់ផ្សាយនេះដែរ ក៏ដើម្បីលើកស្ទួយវិស័យភាពយន្តខ្មែរឱ្យកាន់តែទទួលបានការចាប់អារម្មណ៍ និងគាំទ្របន្ថែមទៀតពីសំណាក់ប្រិយមិត្តទស្សនិកជនទូទាំងប្រទេស៕

អត្ថបទ៖ ពាណិជ្ជកម្ម