- 2016-12-13 01:40:17
- ភាពយន្ត
រឿង "វិកលចរិត" រកបានជាង ៤ម៉ឺនដុល្លារ បន្តចាក់១សប្តាហ៍ទៀត
- 2016-12-13 01:40:17
- ចំនួនមតិ 0 | ចំនួនចែករំលែក 0
រឿង "វិកលចរិត" រកបានជាង ៤ម៉ឺនដុល្លារ បន្តចាក់១សប្តាហ៍ទៀត
ចន្លោះមិនឃើញ
លោក ហ៊ុយ យាឡេង បានថ្លែងឲ្យដឹងថា គិតមកដល់ម្សិលមិញនេះ រឿង"វិកលចរិត"រកចំណូលបានខ្ទង់៤ម៉ឺនដុល្លារហើយ។
រឿង "វិកលចរិត" បានចាក់បញ្ចាំង១០ថ្ងៃហើយគិតត្រឹមថ្ងៃម្សិលមិញ ដែលដំបូងឡើយភាពយន្តមួយនេះ មិនសូវមានអ្នកមកទស្សនាច្រើន ប៉ុន្តែដោយមានការចែករំលែកតាមរយៈសារព័ត៌មានក៏ដូចជា Facebook ពីគុណភាពរឿង និងការត្អូញត្អែររបស់ផលិតករមក ភាពយន្តមួយនេះត្រូវបានមហាជនផ្ដើមចាប់អារម្មណ៍ច្រើន។
លោក ហ៊ុយ យាឡេង បានប្រាប់ថា ភាពយន្តរបស់លោកទើបតែមានទស្សនិកជនមកទស្សនាច្រើនមួយរយៈចុងក្រោយនេះ បន្ទាប់ផ្ទុះខ្លាំងពីក្រុមអ្នកលេង Facebook និង តាមបណ្ដាញសារព័ត៌មាន ខណៈដែលភាពយន្តមានគុណភាព តែអត់មានអ្នកមកទស្សនា។
ជាងនេះទៅទៀត លោកទទួលស្គាល់ថា ក្រៅពីគុណភាពនៃរឿង ទស្សនិកជនមានការអាណិតលោក ក្នុងការហ៊ានខ្ចីប្រាក់គេរាប់ម៉ឺនដុល្លារ យកមកផលិតភាពយន្តមួយនេះ ទើបនាំគ្នាមកគាំទ្រ។
លោកថា រាល់ថ្ងៃមានក្រុមហ៊ុនជាច្រើនបានទាក់ទងមកលោក ដើម្បីជួយទិញសំបុត្រចូលទស្សនាជាក់ស្ដែងក្រុមហ៊ុន B-hip បុគ្គលិកបានចូលប្រាក់គ្នាទិញសំបុត្ររហូតដល់ទៅជាង ៣០០សំបុត្រមកចូលទស្សនាកាលពីម្សិលមិញ ដើម្បីគាំទ្រក៏ដូចជាលើកទឹកចិត្តលោក។
ទន្ទឹមគ្នានោះដែរ នៅមានក្រុមហ៊ុនផ្សេងទៀតបានទាក់ទងមកកក់សំបុត្រទុក ខ្លះ១៥០ សំបុត្រ ខ្លះ១០០ សំបុត្រ ខ្លះ៥០ សំបុត្រ ជាបន្តបន្ទាប់។
ដោយសារតែឃើញសន្ទុះនៃការគាំទ្ររឿង "វិកលចរិត" ចាប់ផ្ដើមមានសន្ទុះឡើងបែបនេះ ខាងរោងកុនទាំងអស់ បានពន្យារ ក៏ដូចជាបន្តយកភាពយន្តរបស់លោកចាក់បញ្ចាំង១សប្តាហ៍ទៀត ។ លោកថា ក្នុងរយៈពេលនេះ រឿង "វិកលចរិត" ដែលចំណាយប្រាក់ក្នុងការផលិត ៤៥០០០ដុល្លារ ហាក់ដូចមានសង្ឃឹមកាន់តែខ្លាំង។
តាមការរំពឹងទុករបស់ ផលិតករដែលល្បីថាសល់តែកង់មួយហើយជំពាក់បំណុលគេច្រើនម៉ឺនដុល្លារ បញ្ជាក់ថា លោក រំពឹងថា "វិកលចរិត" អាចនឹងរកប្រាក់ដើមមកវិញ ឬអាចចំណេញបានខ្លះជាក់ជាមិនខាន។
លោក ហ៊ុយ យាឡេង បានថ្លែងអំណរគុណ ដល់ទស្សនិកជនជាខ្លាំងដែលបានមកគាំទ្រភាពយន្តខាងលើ។ លោកថា ប្រសិនបើមិនមានទស្សនិកជនមកគាំទ្រទេ លោកច្បាស់ជាជំពាក់បំណុលគេជុំទិសជាក់ជាមិនខាន៕
