- 2017-10-04 03:08:37
- ស្ទីលតារា
ភ្ញាក់ផ្អើលពេលដឹងអត្ថន័យ ឈុតតំណាងជាតិរបស់ Miss Grand Cambodia ខ្លឹម ស្រីគា
- 2017-10-04 03:08:37
- ចំនួនមតិ 0 | ចំនួនចែករំលែក 0
ភ្ញាក់ផ្អើលពេលដឹងអត្ថន័យ ឈុតតំណាងជាតិរបស់ Miss Grand Cambodia ខ្លឹម ស្រីគា
ចន្លោះមិនឃើញ
កញ្ញា ខ្លឹម ស្រីគា បវរកញ្ញា MISS GRAND CAMBODIA 2017 នឹងតំណាងកម្ពុជា ចេញទៅប្រកួតក្នុងកម្មវិធីប្រកួត MISS GRAND INTERNATIONAL 2017 ដែលនឹងប្រព្រឹត្តនៅថ្ងៃទី ២៥ ខែតុលា ឆ្នាំ២០១៧ ខាងមុខនេះ នៅ Vinpearl Phu Quoc Resort & Villas Convention Hall កោះភូកុក ឬកោះត្រល់ ក្រោមការរៀបចំពីដោយក្រុមហ៊ុន BKA Entertainment ។
សម្រាប់វគ្គផ្ដាច់ព្រ័ត្រនេះ កញ្ញា ខ្លឹម ស្រីគា នឹងគ្រងឈុតតំណាងជាតិ ( National Costume ) មានឈ្មោះថាឈុត “ទេវីក្រុងកម្ពុជាធិបតី”។ ការពិតឈុតនេះ បានរៀបចំឡើងតាំងពីឆ្នាំមុនមកម្ល៉េះ ពោលគឺសម្រាប់កញ្ញាឯក ហេង ចន្ថា ត្រៀមយកទៅបង្ហាញ តែដោយសារនាងខកខានពុំបានចូលរួមប្រកួត ទើបពេលនេះខាងក្រុមហ៊ុនបានផ្ដល់ឱកាសឲ្យនាងយកឈុតដដែល និងមានការច្នៃម៉ូដបន្ថែមពីលើបន្តិចបន្តួច ទៅបង្ហាញជំនួសវិញ។
សំលៀកបំពាក់មួយនេះ ជាឈុតសម័យច្នៃប្រឌិតថ្មី ដែលយកមូលដ្ឋានគ្រឹះនៃទម្រង់ឈុតសំលៀកបំពាក់របាំក្បាច់បុរាណខ្មែរនាសម័យហ្លួងព្រះស៊ីសុវត្ថិ និងការរួមបញ្ចូលគ្នាជាមួយសម័យបច្ចុប្បន្ន ដើម្បីបង្កើតបានជាឈុតតំណាងជាតិបែបច្នៃប្រឌិតមួយ។
ដោយយោងតាមរូបភាព កាសែតបារាំងមួយដែលមានចំណងជើងថា LE MONDE ILLUSTRÉ បានចុះផ្សាយពីការសម្ដែងរបស់ក្រុមរបាំព្រះរាជទ្រព្យយុគសម័យ ព្រះបាទស៊ីសុវត្ថិនៅ Elysée ទីក្រុងប៉ារីស ថ្ងៃទី ០៧ ខែមិថុនា ឆ្នាំ១៩០៦ ដែលបរិយាយអំពីនាដការីកំពុងសម្ដែងល្ខោនក្បាច់បុរាណ រឿង ព្រះសមុទ្ទ ត្រង់ឈុតព្រះសមុទ្ទចាប់កូនស្រីរបស់យក្សវិរុលចក្រ។
នៅក្នុងរូបភាពនេះ គឺតួអង្គនាងបានគ្រងឈុត "ស្បៃធំ ឬ ស្បៃច្រកក" ព្រមជាមួយសុរងកមានលំអរឥន្ទធនូ ក្បាច់នាគនៅស្មាសងខាង។ សម្រាប់ឈុត "ទេវីក្រុងកម្ពុជាធិបតី" នេះគឺបានយកចំណុចគោលនៃឈុតស្បៃធំមកច្នៃបន្ថែមដើម្បីឲ្យមានភាពទាក់ទាញ និងលេចធ្លោ។
លក្ខណៈពិសេសនៃសម្លៀកបំពាក់នេះ គឺវាបានផលិតឡើងដោយប្រើប្រាស់គ្រឿងអលង្ការតុបតែងលម្អ រួមជាមួយប្រភេទកំណាត់ចរបាប់សូត្រ និងផាមួងខ្មែរ ដោយមានរំលេចក្បាច់ប៉ាក់ភ្ញីវល្លិនៅកន្ទុយស្បៃអូសផ្នែកខាងក្រោយ ហើយមានសុរងកខ្មុករំលេចដោយត្បូងភ្លឺផ្លេក បូករួមជាមួយការច្នៃជាសំពត់កន្ទុយត្រី ចាប់ផ្នត់ផ្លិត និងផ្នត់ភ្លឺត្រង់នៅផ្នែកខាងមុខ ផ្សំនឹងមកុដនាងកំពូលស្រួចយ៉ាងស្រស់ស្អាត។
សម្លៀកបំពាក់ខាងលើនេះជាស្នាដៃ និងគំនិតច្នៃប្រឌិតរបស់លោក វង្ស វណ្ណៈ ដែលជាគ្រូបង្ហាត់សៀកនៅសាលាមធ្យមវិចិត្រសិល្បៈ និងជាអ្នករចនាម៉ូដនៅហាងកាត់ដេរសំលៀកបំពាក់ សហការជាមួយ កញ្ញា ឈុន ម៉ាលៀង និស្សិតឆ្នាំទី៤ផ្នែក តុបតែងលម្អ នៅសាកលវិទ្យាល័យភូមិន្ទវិចិត្រសិល្បៈ។
ចំណែកឯឈុតរាត្រីសមោសរដ៏ស្រស់ស្អាត ក្នុងទម្រង់ពណ៌មាស ដែលប្រិយមិត្តបានឃើញនេះ នឹងប្រើសម្រាប់បង្ហាញនៅលើវេទិការ។ វាជាស្នាដៃរចនាម៉ូដ ដោយលោកជំទាវ សុគន្ធា នៃហាងកាត់ដេរសម្លៀកបំពាក់ ធិរិកាដើម។
លោកជំទាវ បញ្ជាក់ថា ការជ្រើសរើសយកពណ៌មាសនេះ គឺផ្អែកលើពាក្យថា ដែនដីសុវណ្ណភូមិ ហើយពណ៌មាសនេះផងដែរ គឺជាពណ៌នៃស្លាកសញ្ញាកម្មវិធីប្រកួតផ្ទាល់តែម្ដង៕
ចុចអាន៖
