ផលិតកម្មក្នុងស្រុកមួយ ដាក់បង្ហាញកាមេរ៉ាទំនើបៗ សម្រាប់ផលិតរឿងថ្មី
ផលិតកម្ម LD Picture បានបង្ហាញកាមេរ៉ាទំនើបចុងក្រោយរបស់ខ្លួនជាច្រើនគ្រឿងដែលទើបនឹងនាំចូល ដើម្បីផលិតខ្សែភាពយន្តភាគ ឲ្យស្ថានីយទូរទស្សន៍ PNN។
កាលបង្ហាញកាមេរ៉ាខាងលើធ្វើឡើងកាលពីម្សិលមិញនៅឯស្ទូឌីយោ ស្ថានីយទូរទស្សន៍ PNN។ លោក លៀក លីដា ចាងហ្វាងផលិតកម្ម LD Picture បានឲ្យដឹងថា ផលិតកម្មរបស់លោកត្រូវ ស្ថានីយទូរទស្សន៍ PNN អនុញ្ញាតឲ្យថតរឿងភាគ ដើម្បីផ្គត់ផ្គង់ការ ចាក់បញ្ចាំងនៅស្ថានីយទូរទស្សន៍មួយនេះ។ លោកថា ជាមួយនឹងកិច្ចសហការនេះ ទូរទស្សន៍PNN តម្រូវឲ្យផលិតកម្មរបស់លោក ផលិតខ្សែភាពយន្តដែលមានគុណភាព ទាំង ខ្លឹមសារនៃសាច់រឿង សំឡេងក៏ដូចជារូបភាព ជាដើម ដែលតម្រូវឲ្យផលិតកម្មរបស់លោក សម្រេចចិត្តទិញកាមេរ៉ាជាច្រើនគ្រឿងថែមទៀត ដើម្បីឲ្យត្រូវតាមលក្ខខណ្ឌ។
កាមេរ៉ាដែលផលិតកម្ម LD Picture យកមកបង្ហាញនោះជាប្រភេទកាមេរ៉ា4K និង Cinema Lance ដោយក្នុងមួយគ្រឿង ចាងហ្វាងផលិតកម្មបង្ហើបឲ្យដឹងថា មានតម្លៃជិត២ម៉ឺនដុល្លារឯណោះ។ លោក លៀក លីដា មិនបានបង្ហាញពីតម្លៃ កាមេរ៉ាទាំងអស់ដែល ផលិតកម្មរបស់លោកនាំចូលឡើយ។
ការសម្រេចចិត្តមកផលិតរឿងភាគ ដែលកន្លងមក LD Picture ផលិតតែរឿងខ្នាតធំនោះ ត្រូវបានលោក លៀក លីដា បញ្ជាក់ថា ក៏ព្រោះការស្រលាញ់ និងចង់ឲ្យវត្តមានខ្សែ ភាពយន្តភាគខ្មែរទទួលបានការគាំទ្រច្រើនទើបលោកសម្រេចចិត្តជំរុញការផលិតខ្សែភាពយន្តភាគនេះឡើង បើទោះបីជាការផលិតនេះ ជួបការលំបាកជាច្រើន ហើយទទួលបានប្រាក់ចំណេញតិចតួចក្ដី។
ងាកមកការផលិតខ្សែភាពយន្តឲ្យទូរទស្សន៍PNN រឿងដំបូងដែល LD Picture ថតឲ្យនោះមានចំណងជើងថា"ម្ទេសហឹរប៉ះអំបិលប្រៃ" ដែលជាខ្សែភាពយន្តស្នេហា បែបកំប្លែង ដោយមានទាំងអស់រង្វង់ពី៣៥ទៅ៤៥ ភាគ និងមួយភាគមាន២៥នាទី។
តារាសម្ដែងនៅក្នុងរឿងនេះមានដូចជា កញ្ញា ម៉ាក់ សែន សូនីតា លោក អែត វីន អ្នក នាងប៉ែន សុផានី អ្នកនាងគ្រត កញ្ញា ទឹម រដ្ឋា លោកលឹម ជាឡាយ លោកស៊ឹម សោភ័ណ្ឌ កញ្ញា គៀត សុវណ្ណាឡាង ឌីជេណាហ្គា លោកងួន សុបិន្ត លោករឿម រ៉ាម៉ូ និងតារាប្រុសស្រីជាច្រើនរូបទៀត។ កញ្ញា ម៉ាក់ សែន សូនីតា លោក អែត វីន គឺជាតួឯក។
តាមការលើកឡើងរបស់ ស៊ិន ច័ន្ទសាយ៉ា ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ បានឲ្យដឹងថា ចាប់តាំងពីក្រសួងព័ត៌មានតម្រូវឲ្យស្ថានីយទូរទស្សន៍ក្នុងស្រុកចាក់ បញ្ចាំងខ្សែភាពយន្តខ្មែរនៅម៉ោង ៧ ដល់ ម៉ោង៩ យប់ ដែលជាម៉ោងមាសមក បានធ្វើឲ្យការផលិតខ្សែភាពយន្តសម្រាប់ ផ្គត់ផ្គង់ ការចាក់បញ្ចាំងមានការកើនឡើងខ្លាំង។ លោកថា យ៉ាងតិចទូរទស្សន៍មួយត្រូវការខ្សែ ភាពយន្តយ៉ាងតិច២ភាគក្នុងមួយថ្ងៃៗ ដូចនេះយ៉ាងហោចណាស់ទូរទស្សន៍ក្នុងស្រុកទាំងអស់ត្រូវការខ្សែភាពយន្តខ្មែរប្រមាណពី៤០ទៅ៥០ភាគក្នុងមួយថ្ងៃៗ ។
ប្រធាននាយកដ្ឋានភាពយន្តខាងលើ វាយតម្លៃថា ទៅថ្ងៃខាងមុខ ខ្សែភាពយន្តខ្នាតធំដែលចាក់តាមរោងកុនរាល់ថ្ងៃ និងថយចុះ ហើយខ្សែភាពយន្តភាគនឹងកាន់តែកើនឡើងថែមទៀត ត្បិតអីស្ថានីយទូរទស្សន៍ជាច្រើនទៀតដែលមិនទាន់ចាក់បញ្ចាំងរឿងភាគខ្មែរ និងត្រូវ ផលិតផលិតឡើង ដើម្បីចាក់បញ្ចាំង៕
អត្ថបទ៖ ខុត សីហា
