កូនខ្មែរគួរដឹង! ប្រវត្តិ និងស្នាដៃកវីនិពន្ធដ៏ល្បីល្បាញ រីម គីន

2018-09-13 03:11:27
ភាពយន្ត

2018-09-13 03:11:27
ចំនួនមតិ 0 | ចំនួនចែករំលែក 0

ចន្លោះមិនឃើញ

កវីនិពន្ធ រីម គីន បានសាងស្នាដៃតាមរយៈប្រលោមលោកសម័យទំនើប រឿង "សូផាត" នៅឆ្នាំ ១៩៣៨ ដែលស្នាដៃមួយនេះទទួលការកោតសរសើរពីគ្រប់ទិសទី ហើយរាជការបានប្រគល់គ្រឿងឥស្សរិយយសមុនីសារភណ្ឌដល់លោកថែមទៀត។ ភាពល្បីល្បាញ និងដោយសារតែអត្ថន័យអប់រំជាច្រើនបង្កប់ក្នុងសាច់រឿង "សូផាត" ត្រូវបានដាក់បញ្ចូលក្នុងកម្មវិធីសិក្សាបឋមភូមិ នៅក្នុងឆ្នាំ១៩៥០។

ក្រៅពីរឿង "សូផាត" លោក រីម គីន បាននិពន្ធសៀវភៅ ពាក្យកាព្យ និងប្រលោមលោកជាច្រើនទៀត ដែលខាងក្រោមនេះជាប្រវត្តិសង្ខេប និងស្នាដៃតែងនិពន្ធរបស់លោក៖

ជីវប្រវត្តិ៖

លោក រីម គីន កើតក្នុងឆ្នាំ ១៩១១ នៅក្រុងភ្នំពេញ ក្នុងគ្រួសារមួយដែលមានឪពុកឈ្មោះ គីម ជាចៅហ្វាយខេត្តកំពង់ស្ពឺ ម្តាយឈ្មោះ សោ។ កាលវ័យកុមារ លោកបានសិក្សារៀនសូត្រជាមួយព្រះភក្តិមួយអង្គ នៅវត្តស្វាយដង្គំ រាជធានីភ្នំពេញ។ លុះចេះអក្សរ មើលសាស្ត្រាបានសព្វគ្រប់ ទើបលោកទៅចូលរៀននៅសាលា ឌូដាដឺឡាគ្រេ ហើយនៅឆ្នាំ១៩២៩ ប្រឡងចូលរៀននៅអនុវិទ្យល័យស៊ីសុវត្ថិ រយៈពេល៤ឆ្នាំ។ នៅឆ្នាំ ១៩៣៣ លោកបានចូលរៀន វិជ្ជាគរុកោសល្យ ។

ជីវិតគ្រួសារ៖

លោក រីម គីន បានរៀបការជាមួយកូនស្រីលោកចៅក្រម នាមនាង សិន ហៅ ស៊ីមន នៅខែមករា ឆ្នាំ១៩៣៥។

ជីវិតការងារ៖

ក្រោយរៀនចប់គរុកោសល្យ នៅឆ្នាំ ១៩៣៣ លោក រីម គីន ចូលធ្វើការជាគ្រូបង្រៀន នៅខេត្តបាត់ដំបង មួយឆ្នាំក្រោយមកបានផ្លាស់មកភ្នំពេញវិញ។
ខែកញ្ញា ឆ្នាំ១៩៣៤ លោកមានតួនាទីជាអនុរក្ស នៅអនុវិទ្យាល័យស៊ីសុវត្ថិ បន្ទាប់មកបានលោកទៅបង្រៀននៅសាលាចាក់អង្រែ
ឆ្នាំ១៩៤៦ រាជការបានផ្លាស់លោកឲ្យទៅបង្រៀននៅសាលាមុនីវង្ស
ឆ្នាំ១៩៤៧ លោក រីម គីន បានផ្លាស់មកភ្នំពេញ ហើយបានបង្រៀននៅសាលាគរុវិជ្ជា
នៅឆ្នាំ ១៩៥៥ ដល់ឆ្នាំ ១៩៥៦ លោកបង្រៀននៅ សាលានាយទាហាន, សាលាដេកាត និង
ឆ្នាំ ១៩៥៧ បង្រៀននៅសាលាភូមិន្ទរដ្ឋបាល។

កវីនិពន្ធ រីម គីន

ស្នាដៃនិពន្ធ៖

យុវជន រីម គីន មានចំណូលចិត្តតែងនិពន្ធតាំងពីអាយុ ១៨ឆ្នាំមក ពោលគឺពេលចូលរៀននៅអនុវិទ្យាល័យស៊ីសុវត្ថិ ក្នុងឆ្នាំ ១៩២៩-១៩៣០។ អំឡុងពេលសិក្សា យុវសិស្ស រីម គីន បានហាត់សរសេរបន្តិចម្ដងៗ ពីទេសភាពខ្លះ រឿងមនោសញ្ចេតនា និងជាពាក្យកាព្យខ្លះ។ ជំនក់ចិត្តក្នុងសំណេរបណ្ដាលឲ្យលោកសាកល្បងយករឿង«ចៅក្ដាំងបាយ» មកសរសេរជាថ្មីនៅពេលដែលលោករៀននៅថ្នាក់ទី៣ រួចលោកយកស្នាដៃនេះទៅបង្ហាញសាស្ត្រាចារ្យខ្មែរ ពេលនោះទទួលការសរសើរមិនដាច់ពីមាត់។

បន្ទាប់មកទៀតលោកបានចាប់ផ្ដើមសរសេររឿង «សេនាកំសត់» បានមួយផ្នែក លុះដល់ឆ្នាំ១៩៥១ ទើបសរសេរបញ្ចប់ដោយមានការកែប្រែឆ្ងាយពីគំនិតដើម។

ស្នាដៃប្រលាមលោក និងពាក្យកាព្យ របស់កវីនិពន្ធ រីម គីន៖

រឿង សូផាត នៅឆ្នាំ ១៩៣៨
រឿង ចិត្តចងចាំ បោះពុម្ពនៅឆ្នាំ ១៩៤៨
រឿង ស្ត្រីកំព្រា បោះពុម្ពនៅឆ្នាំ ១៩៥១
រឿង មើលព្រះចន្ទ បោះពុម្ពនៅឆ្នាំ ១៩៥២
រឿង នាងសមាភាវី បោះពុម្ពនៅឆ្នាំ ១៩៥២
រឿង ពលវង្សា បោះពុម្ពនៅឆ្នាំ ១៩៥៣
រឿង ក្លាហាន បោះពុម្ពនៅឆ្នាំ ១៩៥៣
រឿង នាង រតននារី ពាក្យកាព្យ ឆ្នាំ ១៩៣៨
រឿង ឈាមរកឈាម ពាក្យកាព្យឆ្នាំ ១៩៣៨
រឿង រៀនមិនពន្យល់ ពាក្យកាព្យឆ្នាំ ១៩៣៨

លោក រីម គីន បានទទួលមរណភាពនៅថ្ងៃទី២៨ ខែមករា ឆ្នាំ១៩៥៩ ដោយរោគរលាកស្រោមខួរ ហើយពិធីឈាបនកិច្ចសពបានប្រព្រឹត្តិទៅយ៉ាងឧឡារឹកនៅថ្ងៃ៣១ ខែមេសា នៅឈាបនដ្ឋានឧណ្ណាលោម។

ប្រលោមលោករឿង "សូផាត" ត្រូវបានស្ថានីយទូរទស្សន៍ PNN យកមកថតជាភាពយន្តភាគ ដែលពេលនេះដាក់ឲ្យទស្សនាឡើងវិញដោយឥតគិតថ្លៃ នៅលើ App Soyo ចំនួន១២ភាគដំបូង។ ប្រិយមិត្តអាចទាញយក App Soyo ឥឡូវនេះតាមរយៈតំណភ្ចាប់ខាងក្រោមនេះ ដើម្បីបានទស្សនារឿង "សូផាត" និងរឿងខ្មែរ បរទេស ជាច្រើនទៀត។

App Store: https://goo.gl/Fzx11s

Play Store: https://goo.gl/fgJbtB